ދުނިޔޭގެ އިގްތިސާދުގެ ހަތަރު ބައިކުޅަ އެއް ބައި ހިއްސާކުރާ ވަރުގަދަ ވިޔަފާރީގެ އެއްބަސްވުމެއް އިންޑިއާ އާއި ޔޫރަޕިއަން ޔޫނިއަން (އީޔޫ)އާ ދެމެދު ނިންމާފައިވާ ކަމަށް އިންޑިއާގެ ބޮޑުވަޒީރު ނަރެންދުރަ މޯދީ މިއަދު ވިދާޅުވެއްޖެ އެވެ.
މިއީ އެމެރިކާއާ އެކު އޮންނަ ގުޅުން ހީނަރުވަމުންދާ ދަނޑިވަޅެއްގައި، ދެ ފަރާތުގެ މަސްލަހަތު ހިމާޔަތްކުރުމަށް އެޅި މުހިންމު ފިޔަވަޅެކެވެ.
ގާތްގަނޑަކަށް 20 އަހަރަށް ދެމިގެންދިޔަ މަޝްވަރާތަކަށް ފަހު، މި އެއްބަސްވުމުގެ ސަބަބުން އިންޑިއާގެ މާކެޓް އީޔޫގެ 27 ގައުމަށް ހުޅުވިގެންދާނެ އެވެ. އީޔޫއަކީ މިހާރު ވެސް އިންޑިއާގެ އެންމެ ބޮޑު ވިޔަފާރި ބައިވެރިޔާ އެވެ.
"އިއްޔެ އިންޑިއާ އާއި އީޔޫއާ ދެމެދު މި ތާރީހީ އެއްބަސްވުމުގައި ވަނީ ސޮއިކޮށްފައި،" މޯދީ ވިދާޅުވި އެވެ.
"ދުނިޔޭގެ އެކި ކަންކޮޅުތަކުގެ މީހުން މި އެއްބަސްވުމަށް 'ހުރިހާ އެއްބަސްވުންތަކުގެ މައި' އެއްބަސްވުމުގެ ނަމުން މުހާތަބުކުރޭ. މި އެއްބަސްވުމުގެ ސަބަބުން އިންޑިއާގެ 1.4 ބިލިއަން ރައްޔިތުންނަށާއި ޔޫރަޕްގެ މިލިއަނުން ގުނާލެވޭ ރައްޔިތުންނަށް ބޮޑެތި ފުރުސަތުތަކެއް ފަހިވެގެންދާނެ."
މޯދީ ފާހަގަކުރެއްވި ގޮތުގައި، މި އެއްބަސްވުމަކީ ދުނިޔޭގެ އުފެއްދުންތެރިކަމުގެ %25 އަދި ދުނިޔޭގެ ވިޔަފާރީގެ ތިން ބައިކުޅަ އެއް ބައި ހިއްސާކުރާ ވަރުގަދަ ގުޅުމެކެވެ.
މޯދީ އާއި ޔޫރަޕިއަން ކޮމިޝަންގެ ރައީސް އުރުސުލާ ފޮން ޑާ ލޭޔަން، ނިއުދިއްލީގައި ބާއްވާ އިންޑިއާ-އީޔޫ ސަމިޓުގައި މި އެއްބަސްވުމުގެ ތަފްސީލުތައް ރަސްމީކޮށް ހާމަކުރައްވާނެ ކަމަށް ބެލެވެ އެވެ. މާޗު 2025ގެ ނިޔަލަށް އިންޑިއާ އާއި އީޔޫއާ ދެމެދު ކުރެވުނު ވިޔަފާރީގެ އަގު 136.5 ބިލިއަން ޑޮލަރަށް އަރަ އެވެ.
މި އެއްބަސްވުން ގާއިމުކުރެވިފައި މިވަނީ، އީޔޫން ދެކުނު އެމެރިކާގެ ގްރޫޕާ އެކު މުހިންމު އެއްބަސްވުމެއްގައި ސޮއިކުރިތާ މަދު ދުވަސްކޮޅެއްގެ ތެރޭގަ އެވެ.
މިދިޔަ އަހަރުގެ ތެރޭގައި އީޔޫން ވަނީ އިންޑޮނޭޝިއާ، މެކްސިކޯ އަދި ސުވިޒަލޭންޑާ އެކު ވެސް ވިޔަފާރީގެ އެއްބަސްވުންތައް އެކުލަވާލާފަ އެވެ.
އިންޑިއާއިން ވެސް ވަނީ އިނގިރޭސިވިލާތް، ނިއުޒީލޭންޑް އަދި އޮމާންއާ އެކު ވެސް އެފަދަ އެއްބަސްވުންތައް ނިންމާފަ އެވެ.
މިފަދަ ގިނަ އެއްބަސްވުންތަކެއް ގާއިމް މި ކުރަނީ އެމެރިކާގެ ރައީސް ޑޮނަލްޑް ޓްރަމްޕްގެ ސިޔާސަތުތަކުގެ ސަބަބުން ދުނިޔޭގެ ގައުމުތަކުގެ މެދުގައި އޮތް ޒަމާންވީ ގުޅުންތަކަށް ބުރޫއަރަމުންދާތީ އެވެ. ޓްރަމްޕް ވަނީ އިންޑިއާގެ މުދަލުން %50ގެ ޓެކްސްއެއް ނަގަން ނިންމަވާފަ އެވެ. އަދި އިންޑިއާ އާއި އެމެރިކާއާ ދެމެދު ކުރިއަށްދިޔަ ވިޔަފާރީގެ މަޝްވަރާތައް މިދިޔަ އަހަރު ވަނީ މެދުކެނޑިފަ އެވެ.