ކުއްޖާގެ ގާބިލްކަން ރަނގަޅުކުރަން ޖެހޭ ހާލަތުގައި ރިޕީޓްކުރާ ހަމައިން އުމުރަށް ވުރެ ތޫނުފިލި ކުދިންނަށް ކިޔެވުން މަތިން ފޫހި ނުވާނެ ގޮތަށް ނިޒާމެއް އޮންނަން ޖެހޭ ކަމަށް ހައި ކޯޓުން ކުރި ހުކުމެއްގައި ފާހަގަކޮށްފި އެވެ. 
ވީކިހިނެއް؟ - ކެންގަރޫ ކިޑްސްގައި ކިޔަވަމުން އަންނަ ދަރިވަރެއްގެ ބެލެނިވެރިއަކު މައްސަލަ ހުށަހެޅީ ކުރިން ސްކޫލް ނިޒާމަށް ވަދެފައިވާ ދަރިވަރަކު ވެސް އަލުން ނެރުނު ސާކިއުލާއެއްގެ ތެރެއަށް ފައްތައި ރިޕޯޓްކުރުމުންނެވެ. 
އެ މައްސަލާގައި ބެލެނިވެރިޔާގެ ބަހުސްގައި އިތުރަށް ފާހަގަކުރި އެއް ނުކުތާ އަކީ އުމުރަށް ވުރެ އެ ދަރިވަރުގެ ތޫނުފިލިކަމަށް ބެލެވޭ ކަންކަމެވެ. 
ތަފްސީލް - ހައި ކޯޓުން ކުރި ހުކުމުގައި އެކަން ފާހަގަކުރަމުން ބުނެފައިވަނީ:
ކުއްޖާގެ ހެދިބޮޑުވުމުގެ ތަބީއީ ދުވެލީގެ ސަބަބުން ކުއްޖާގެ ހެދިބޮޑުވުމަށް އައި ކުރިއެރުންތަކަށް ނުވަތަ ކުއްޖާގެ އުމުރަށް ވުރެ ތަބީއީ ތޫނުފިލިކަން އިތުރުވެފައިވާ މިންވަރަށް، މިނިސްޓްރީން ރިއާޔަތްކޮށްފައިވާ ކަމަށް ނުބެލެވޭ
ތައުލީމުގެ ގާނޫނާއި ރާއްޖޭން ބައިވެރިވެފައިވާ ކޮންވެންޝަން އޮން ދަ ރައިޓްސް އޮފް ދަ ޗައިލްޑްގެ މުއާހަދާގެ އުސޫލުތަކުގެ އަލީގައި ކުއްޖާގެ ހާއްސަ ހާލަތްތަކަށް ރިއާޔަތްކޮށް ކުއްޖާގެ ތައުލީމު ބައްޓަންކުރުމުގެ ޒިންމާއެއް ދައުލަތުގެ މައްޗަށް އޮންނާނެ
ތޫނުފިލި ކުއްޖާ ކިޔެވުން މަތިން ފޫހިކޮށްނުލައި ކުއްޖާގެ ތޫނުފިލިކަމާ އެކަށީގެންވާ ގޮންޖެހުންތައް ކުރިމަތިކުރުވަނިވި އުނގެނުމުގެ ނިޒާމެއްގެ ތެރެއިން ކުއްޖާގެ އެންމެ މަތީ ގާބިލުކަމަށް ވާސިލުކުރުމަށް ދައުލަތުން މަގުކޮށައިދޭން ޖެހޭ
ކުއްޖާގެ މައިންބަފައިން އަމިއްލަ ހައިސިއްޔަތުން ހަދާ ޓެސްޓުތަކަށް އެކަނި ބެލުމުގެ ބަދަލުގައި، އާދަޔާ ހިލާފު ގާބިލުކަން ހުރި ކުދިންގެ ތައުލީމީ މަގު އެ ކުދިންގެ ގާބިލުކަމުގެ ދުވެއްޔާ އެއްހަމަކުރުމަށްޓަކައި އުމުރަށް ވުރެ ގާބިލުކަން އިތުރު ކުދިންތައް ވަޒަން ކުރާނެ އެއްހަމަ ސިޔާސަތުތަކަކާއި މިންގަނޑުތަކަކާއި އުސޫލުތަކެއް މިނިސްޓްރީން އެކުލަވާލަން ޖެހޭ
ހައި ކޯޓުން ބުނީ އޭ-ލެވެލްގެ އުމުރުފުރާ ފުރިހަމަ ނުވަނީސް އޭ-ލެވެލްގައި ބައިވެރިވުމެގެ ފުރުސަތު ދައުލަތުން ދިނުމުން ނަތީޖާ ނެރުނު ދަރިވަރުން އެބަ ތިބި ކަމަށެވެ. އެހެންކަމުން، ރާއްޖޭގައި ވެސް އުމުރަށް ވުރެ ތޫނުފިލި ކުދިން ތިބޭކަން ގަބޫލުކުރަން ޖެހޭ ކަމަށް ހައި ކޯޓުގެ ހުކުމުގައިވެ އެވެ.
ރާއްޖޭގެ ތައުލީމުގެ ނިޒާމުގައި ކުއްޖާއަށް އިތުރު އެހީއަށް ބޭނުންވާ ނަމަ އަދި ބައެއް ހާލަތުގައި ކުއްޖާގެ ގާބިލްކަން ހުރި ނެތް މިންވަރަށް ރިއާޔަތްކޮށް، ތައުލީމުގެ އެއް ހަރުފަތުން އަނެއް ހަރުފަތަށް ބަދަލުނުކޮށް ރިޕީޓް ކުރަމުންދާކަން ވެސް ހައި ކޯޓުގެ ހުކުމުގައިވެ އެވެ.