ޗެޓް ޖީޕީޓީ ބޭނުންކޮށްގެން ކޯޗުކުރާތީ އޮބިނޯވެގެން ރަޝިއާ ޕްރިމިއާ ލީގުގެ ކުލަބެއް ކަމަށްވާ ސޯޗީގެ ހެޑު ކޯޗުކަމުން ސްޕެއިންގެ ރޮބަޓް މޮރޭނޯ ވަކިކޮށްފިއެވެ. އޭނާ ހެޑު ކޯޗުކަމުން ވަކިކުރީ ޓީމުގެ ނަތީޖާތައް ދަށްވުމާއި ގުޅިގެންނެވެ. އަދި މަސައްކަތްކުރުމުގެ ގޮތުން އޭނާ ގެންގުޅޭ ވައްޓަފާޅީގައި މާ ބޮޑަށް ޗެޓް ޖީޕީޓީ ބޭނުންކުރާތީ ގިނަ ބައެއްގެ ފާޑުކިޔުން އަމާޒުވިއެވެ. ޗެޓް ޖީޕީޓީ އޭނާ ބޮޑަށް ބޭނުންކުރީ ސްޕޯޓިން އަދި ލޮޖިސްޓިކަލް ޕްލޭނިންތަކުގައެވެ. އޭނާ ކޯޗުކަމުން ބޭރުކުރި މައިގަނޑު ސަބަބުތަކުގެ ތެރެއިން އެންމެ ބޮޑު އެއް ސަބަބަކީ އެއީ އެވެ. މިކަން ހާމަކޮށް ސޯޗީގެ ޑިރެކްޓަރު ޖެނެރަލް އޯލޯވް ވިދާޅުވީ ކުލަބުގެ ޓްރެއިނިން ސެޝަންތަކާއި މެޗުތަކަށް ތައްޔާރުވާ ގޮތާއި ޓީމާއެކު ކުރާ ދަތުރުތަކުގައި ވެސް ބޭނުންކުރަނީ ޗެޓް ޖީޕީޓީ ކަމަށެވެ. އޭގެ ސަބަބުން ގިނަ މައްސަލަތަކެއް ކުރިމަތިވެފައިވާ ކަމަށް ބުންޏެވެ. އޯލޯވް ބުނީ ޗެޓް ޖީޕީޓީ ބޭނުންކުރުމަކީ މައްސަލައެއް ނޫން ކަމަށާއި ނަމަވެސް ކޮންމެ ކަމެއްވެސް އޮބިނޯންނަވަރަށް ބޭނުންކުރުމަކީ ރަނގަޅު ގޮތެއް ނޫން ކަމަށެވެ. މޮރޭނޯގެ ކޯޗުކަމުގެ ދަށުން އެންމެ ފާހަގަކޮށްލެވޭ އެއް ކަމެއްގެ ގޮތުގައި ފެނުނީ ލީގު މެޗެއް ކުޅުމަށް ރަޝިއާގެ ޚަބަރޮވްސްކް އަށް ދަތުރު ކުރަން ތައްޔާރުވަމުން ދަނިކޮށް ކުރިމަތިވި ކަންތައްތަކެވެ. "ރޮބަޓް ބުނީ ޗެޓްޖީޕީޓީއާ އެކު ހުރިހާ ކަމެއް ވެސް ޕްލޭން ކުރެވިފައި އޮތްކަމަށް،" އޯލޯވް ބުންޏެވެ. އެ ޓޫލް އިން ތައްޔާރުކުރި ޕްރެޒެންޓޭޝަން އެ ކްލަބުގެ އެގްޒެކެޓިވްސް ރިވިއުކުރުމުން އެ މީހުންނަށް އެނގުނީ އެ ޓީމުގެ ކުޅުންތެރިންނަށް 28 ގަޑިއިރު ވަންދެން ނިދި ނުލިބި ތިބި ކަމަށެވެ. އެޕްލިކޭޝަންގެ ސެޓިންގްސް އެޖަސްޓް ކުރުމަށްފަހު ޕްލޭން ބަދަލުކުރި ނަމަވެސް، އެންމެ ފަހުން އެ ޓީމުން ދިޔައީ އޭއައި އިން ޑިޒައިން ކުރި ޝެޑިއުލްއާ އެއްގޮތަށެވެ. މި ހާދިސާގެ ސަބަބުން މޮރޭނޯ ޓެކްނޮލޮޖީއަށް ބަރޯސާވެފައިވާ މިންވަރާ މެދު ވަނީ ކަންބޮޑުވުން ފާޅުކޮށްފައެވެ.