މިދިޔަ ސަރުކާރުގެ އެންމެ ބޮޑު މަޝްރޫއު ކަމަށްވާ ތިލަމާލެ ބުރިޖުގެ ބައިތަކުގެ ތެރެއިން ގިރާވަރުފަޅާ ގުޅާލާ ބައިގެ މަސައްކަތް އަންނަ އަހަރު ފެށޭނެކަމުގެ ޔަގީންކަން ރައީސް ޑރ. މުޙައްމަދު މުޢިއްޒު ދެއްވާފައިވާ ކަމަށް މާލޭ ގެދޮރުވެރިންގެ ޖަމިއްޔާއިން ބުނެފިއެވެ. މާލޭ ރައްވެހިންގެ ޖަމިއްޔާއާއި ގިރާވަރު ޖަމިއްޔާއާއި ގުޅީފަޅާއި ގިރާވަރުން ގޯތި ލިބުނު ބައެއް މީހުންނާ އިއްޔެ ރައީސް ޑރ. މުޙައްމަދު މުޢިއްޒު ވަނީ ބައްދަލުކުރައްވައިފައެވެ. އެ ބައްދަލުވުމުގައި އަންނަ އަހަރު ގިރާވަރު ގުޅާލެވޭ ބުރިޖުގެ މަސައްކަތް ފެށޭނެ ކަމަށް ރައީސް ވިދާޅުވި ކަމަށާއި ބޯހިޔާވަހިކަމުގެ ގާނޫނަށް އަންނަ ބަދަލުތަކުގެ ސަބަބުން ދިމާވާ ބައެއް މައްސަލަތައް ހައްލުވާނެކަމުގެ ޔަގީންކަން އެ މަނިކުފާނު ދެއްވިކަމަށް މާލޭ ގެދޮރުވެރިންގެ ޖަމިއްޔާއިން ބުންޏެވެ. މާލެއާއި ވިލިމާލެއާއި ގުޅީފަޅާއި ތިލަފުށި ގުޅުވާލަދޭ ތިލަމާލޭ ބްރިޖުގެ މަސައްކަތް ކުރާ އިންޑިއާގެ އެފްކޯންސް ކުންފުނިން އެ މަސައްކަތާ ހަވާލުވީ ކުރީގެ ރައީސް އިބްރާހީމް މުޙައްމަދު ޞާލިޙުގެ ސަރުކާރުގައި 2021ވަނަ އަހަރެވެ. މަސައްކަތް ފެށީ އޭގެ ގާތްގަނޑަކަށް އެއް އަހަރު ފަހުންނެވެ. https://sun.mv/215964 ތިލަމާލެ ބުރިޖުގެ މަސައްކަތް ފުރަތަމަ ނިންމަން ދީފައި އޮތީ މިދިޔަ އަހަރަށް ނަމަވެސް، މިދިޔަ ޑިސެންބަރު މަހު ފަހުކޮޅު ބޭއްވި ނޫސްވެރިންގެ ބައްދަލުވުމުގައި ކޮންސްޓްރަކްޝަން މިނިސްޓަރު ޑރ. ޢަބްދުالله މުއްޠަލިބް ވިދާޅުވީ، ބުރިޖުގެ 67.35 ޕަސެންޓު މިހާރު ނިމިފައިވާ ކަމަށެވެ. ބުރިޖުގެ މަސައްކަތް މިހާރު ދާ ދުވެލީގައި ކަނޑައަޅާފައިވާ ތާރީޚަށް ނުނިންމިދާނެ ކަމަށް ވިދާޅުވާ ވިދާޅުވުން އޭނާ އެ ދުވަހު ތަކުރާރުކުރެއްވިއެވެ. ފާހަގަކުރެވޭ ގޮތުގައި ރައީސް ޑރ. މުހައްމަދު މުއިއްޒު، ވިލިމާލެ އަވަށުގެ ރައްޔިތުންނާ ބައްދަލުކުރެއްވުމަށް މިދިޔަ ނޮވެންބަރު މަހުގެ 23 ވަނަ ދުވަހު ބޭއްވި ބައްދަލުވުމުގައި ވާހަކަދައްކަވަމުން މުއްތަލިބު ވިދާޅުވީ، ސަރުކާރުން ބޭނުންވި ދުވެލީގައި ބުރިޖުގެ މަސައްކަތް ކުރިއަށް ނުދާ ކަމަށެވެ. އެހެންކަމުން ކޮންޓްރެކްޓަރުގައި ބުރިޖުގެ މަސައްކަތް ނިމޭނެ ކަމަށް ލަފާކޮށްފައިވާ ތާރީޚަށް ނުނިމިދާނެ ކަމަށް މުއްތަލިބު ވިދާޅުވި ނަމަވެސް، ސީދާ ނިމޭނެ ތާރީޚެއް ވިދާޅެއްނުވެއެވެ. މީގެ ހަފުތާއެއް ކުރިން 'ސަން'އަށް ދެއްވި ޚާއްސަ އިންޓަވިއުއެއްގައި ތިލަމާލެ ބްރިޖުގެ ޕްރޮޖެކްޓް މެނޭޖަރު އެސްއެމް ވިސްވަމުރްތީ ވިދާޅުވީ, ތިލަމާލެ ބްރިޖުގެ މަސައްކަތް ކުރަނީ އެންމެ މަތީ ފެންވަރުގައި ކަމަށެވެ. އަދި ފެންވަރު ހިފެހެއްޓުމުގެ އެއްވެސް ކަމެއް ދޫކޮށްނުލައްވާ ކަމަށް އޭނާ ވިދާޅުވިއެވެ. https://sun.mv/214307 މި މަސް ނިމޭއިރު މާލެއާއި ވިލިމާލެއާ ދެމެދު މަސައްކަތުގެ 70 ޕަސެންޓު ނިމޭނެ ކަމަށާއި، މާލެއާއި ވިލިމާލެއާ ދެމެދު ސެގްމަންޓް ޑިރެކްޝަންގެ މަސައްކަތް ނިމުމުން ވަރަށް ގިނަ ކަންކަން ފަސޭހަ ވާނެ ކަމަށް ވެސް އޭނާ ވިދާޅުވިއެވެ. ތިލަމާލެ ބްރިޖުގެ 68 ޕަސެންޓު މަސައްކަތް މިހާރު ނިމިފައިވާކަމަށާއި، މާލެއާއި ވިލިމާލެއާ ދެމެދު ބްރިޖުގެ ސެގްމަންޓުތައް އޮކްޓޯބަރުގެ ނިޔަލަށް ނިންމާލެވޭނެކަމަށް ލަފާކުރެވޭ ކަމަށްވެސް، ވިސްވަމުރްތީ ވިދާޅުވެފައިވެއެވެ. ޖުމުލަ ހަތް ކިލޯމީޓަރެއްހައި ދިގުމިނަށް ދެމިގެން ދާނެ މި ބްރިޖަކީ މާލޭން ވިލިމާލެއަށް، ވިލިމާލޭން ގުޅީފަޅަށް، އަދި ގުޅީފަޅުން ތިލަފުށްޓަށް ގުޅުވައިދޭނެ ބޮޑު, މުހިންމު ބްރިޖެކެވެ. ކޮޅަކަށް ދެ ލޭނު ހުންނަ މި ބުރިޖުގެ އެއް ކޮޅުގައި ހިނގާ މީހުންނަށް ޖާގައެއް އޮންނައިރު، އަނެއް ކޮޅުގައި ކަރަންޓު، ފެން ފަދަ ކަންކަމަށް ޚާއްސަ ހޮޅި ބަހައްޓަން ޖާގައެއް އޮންނާނެއެވެ. https://x.com/sunbrk/status/2013119974743908670/video/1 ތިލަމާލެ ބުރިޖު ނިންމަން ނުވަތަ ނުނިމޭނަމަ, ބުރިޖުގެ ވަކި ބައެއް ހުޅުވަން ޞާލިޙްގެ ސަރުކާރުން އެކި ތާރީޚުތައް ދިން ނަމަވެސް އެ މަސައްކަތް ކުރެވިފައިނުވެއެވެ. އަދި، އެ ސަރުކާރު ނިމުމުގެ ކުރިން ސަޕްލިމަންޓަރީ އެގްރިމަންޓެއްގައި ސޮއިކޮށް އެ މަޝްރޫއު ނިންމަން އޮތް މުއްދަތު ވަނީ އިތުރުކޮށްފައެވެ. އެ މަޝްރޫއު ލަސްވާތީ ޞާލިޙާއި މިހާރުގެ ރައީސް ޑރ. މުހައްމަދު މުއިއްޒަށް ވެސް ވަނީ ފާޑުކިޔުންތައް އަމާޒުވެފައެވެ. އެ ގޮތުން, ރާއްޖޭގައި ސިނާއީ އެންމެ ބޮޑު މަޝްރޫއުތައް ފެއްޓެވި ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވަނީ އެ މަސައްކަތް ކުރިއަށްދާ ގޮތުން މި ދައުރުގައި ވެސް ތިލަމާލެ ބުރިޖުގެ މަސައްކަތް ނުނިމޭނެ ކަމަށް ވިދާޅުވެފައެވެ.