ކޮރަޕްޝަނަށް މަގުފަހިވާ ގޮތަށް ބިން ހިއްކުމުގެ މަޝްރޫއުތައް ކުރިއަށް ގެންދާ ކަމަށް ތުހުމަތުކޮށް، އެންޓި ކޮރަޕްޝަން ކޮމިޝަން (އޭސީސީ) އަށް މައްސަލައެއް ހުށަހަޅައިފި އެވެ.
އެ މައްސަލަ އޭސީސީއަށް ހުށަހެޅުއްވުމަށްފަހު އެމްޑީޕީގެ ގައުމީ މަޖިލިސް މެންބަރު އަހުމަދު ސަލީމް (މާޒް ސަލީމް) ރާއްޖެ ޓީވީއަށް ވިދާޅުވީ ބިން ހިއްކުމުގެ މަޝްރޫއުތައް ކުރިއަށްގެންދަނީ ތިމާވެށި ރައްކާތެރިކޮށް ދެމެހެއްޓުމަށް ހެދިފައި އޮތް ގާނޫނާ ހިލާފަށް ކަމަށެވެ.
ރާއްޖޭގެ ފަރުތަކާއި ފަޅުތައް ގޮތެއް ފޮތެއް ނުބަލާ ކޮރަޕްޝަނަށް މަގުފަހިވާ ގޮތަށް ދައުލަގެ ބަޖެޓުން ފައިސާތައް ހަރަދުކުރަމުންދަނީ ވަކި ބަޔަކަށް ނާޖާއިޒް ފައިދާ ހޯދައިދިނުމަށް ކަމަށް އޭނާ ވިދާޅުވި އެވެ.
އޭނާ ވިދާޅުވީ ބިން ހިއްކަމުންދަނީ ގާނޫނު އަސާސީގެ 22 ވަނަ މާއްދާއާއި އަދި ހަމަ އެއާއެކީގައި ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމަށް ހަދާފައި އޮތް ގާނޫނާ ހިލާފަށް ކަމަށެވެ.
މީގެއިތުރުން ބިން ހިއްކުމުގެ މަޝްރޫއުތަކުގެ ސަބަބުން ފަތުރުވެރިކަމާއި މަސްވެރިކަމަށް ވެސް އޭގެ އަސަރު ކުރަމުންދާ ކަމަށް ސަލީމް ވިދާޅުވި އެވެ.
މިއީ މި ސަރުކާރު ވެރިކަމަށް އައި ފަހުން މާޒް ސަލީމް އޭސީސީއަށް ހުށަހެޅުއްވި 17 ވަނަ މައްސަލަ އެވެ.
މި ސަރުކާރާ ގުޅޭ ކޮރަޕްޝަންގެ ގިނަ މައްސަލަތަކެއް އެކި މީހުން އޭސީސީއަށް ހުށަހަޅާފައިވާއިރު، މިހާތަނަށް އޭގެއިން އެއްވެސް މައްސަލައަކާ ގުޅޭގޮތުން ފިޔަވަޅެއް އަޅާފައެއް ނުވެ އެވެ.