އީރާނާއެކު ކުރަމުންދާ ހަނގުރާމައިގައި އެމެރިކާ ސިފައިންގެ މަޤްޞަދުތައް ގާތްގަނޑަކަށް ފުރިހަމަވެފައިވާ ކަމަށާއި، ނަމަވެސް މި ހަނގުރާމަ ނިންމާލާނެ ވަކި ތާރީޚެއް ދެވެން ނެތް ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުނެފިއެވެ.
ބުދަ ދުވަހުގެ ރޭ ޓީވީ މެދުވެރިކޮށް ދިން 19 މިނެޓުގެ ތަޤުރީރުގައި ޓްރަމްޕް ބުނީ، އެމެރިކާގެ ހަމަލާތަކުގައި އީރާނުގެ ކަނޑުގެ ސިފައިންނާއި ވައިގެ ސިފައިން މިހާރު ހަލާކުކޮށްލާފައިވާ ކަމަށެވެ. އަދި އީރާނުގެ މިސައިލް ޕްރޮގްރާމާއި ނިއުކްލިއާ މަސައްކަތްތައް ވެސް ވަނީ ވަރަށް ބޮޑަށް ހުއްޓުވާލެވިފައި ކަމަށް އޭނާ ބުންޏެވެ.
ނަމަވެސް، އީރާނުން ފައްކާކޮށްފައިވާ ޔުރޭނިއަމްގެ ހާލަތާއި، ފެބުރުއަރީ 28 ގައި އެމެރިކާއާއި އިސްރާއީލުން ހަނގުރާމަ ފެށި ފަހުން ބަންދުކޮށްފައިވާ ހޯރްމޫޒް ކަނޑުއޮޅީގެ މައްސަލައާ މެދު ޓްރަމްޕް މާ ބޮޑު ވާހަކައެއް ނުދައްކައެވެ. އީރާނުން އެ ކަނޑުއޮޅި ބަންދުކުރުމުގެ ސަބަބުން ދުނިޔޭގެ ތެލުގެ ބާޒާރަށް ވަނީ ބޮޑެތި ދަތިތަކެއް ކުރިމަތިވެފައެވެ.
އެމެރިކާއާއި އިސްރާއީލުން ގުޅިގެން އީރާނާ ދެކޮޅަށް ފުޅާދާއިރާއެއްގައި ހަނގުރާމަ ފެށީ މިދިޔަ ފެބުރުއަރީ މަހުގެ 28 ވަނަ ދުވަހުއެވެ. މި ހަނގުރާމަ ފެށުމުގެ ސަބަބެއް ކަމަށް އެމެރިކާއިން ބުނަމުންދަނީ އީރާނުގެ ނިއުކްލިއާ ހަތިޔާރު އުފެއްދުމުގެ ގާބިލްކަން ނައްތާލުމާއި، މެދުއިރުމަތީގައި އީރާނުން ފަތުރަމުންދާ ނުފޫޒު ހުއްޓުވުމެވެ.
ހަނގުރާމަ ފެށުމާއެކު އީރާނުން ވަނީ ބަދަލުހިފުމުގެ ގޮތުން ދުނިޔޭގެ ތެލުގެ ވިޔަފާރީގެ މުހިންމު މަގަކަށްވާ ހޯރްމޫޒް ކަނޑުއޮޅި ބަންދުކޮށްފައެވެ. މީގެ ސަބަބުން ދުނިޔޭގެ ބާޒާރުގައި ތެލުގެ އަގު އިންތިހާއަށް އުފުލި، އެމެރިކާގެ އިގްތިސާދަށާއި ޓްރަމްޕްގެ މަގުބޫލުކަމަށް ވަނީ ވަރަށް ބޮޑަށް އަސަރުކޮށްފައެވެ.