ޒަމާނީ ފެންވަރަކަށް އަމީނީމަގު ހެދުމުގެ މަސައްކަތް ކުރިއަށްދާއިރު ސްޓެލްކޯގެ ހިދުމަތްތަކަށް ބުރޫ އަރަމުންދާ މައްސަލަ ހައްލުކުރަން މަސައްކަތް ކުރަމުންދާ ކަމަށް އެ ކުންފުނިން ބުނެފި އެވެ.
ސްޓެލްކޯ އިން ބުނީ މަސައްކަތް ހިނގަމުންދާ ސަރަހައްދުތަކުން ހިދުމަތްތަކަށް ބުރޫ އަރާ ހާލަތްތަކުގައި ހިދުމަތް މެދުކެނޑޭ ސަރަހައްދުތަކަށް އަލުން ހިދުމަތް ދިނުމަށް ކުރަންޖެހޭ ހުރިހާ މަސައްކަތެއް ވަގުތުން ވަގުތަށް ކުރަމުން ގެންދާ ކަމަށެވެ. ހިދުމަތް މެދުކެނޑޭ މިފަދަ ދަނޑިވަޅުތަކުގައި ރައްޔިތުންނަށް ދިމާވާ އެންމެހާ ދަތިތަކަށް ސްޓެލްކޯ އިން ވަނީ މައާފަށް އެދިފަ އެވެ.
ސްޓެލްކޯ އިން ވަނީ މިފަދަ ކަންކަން ދިމާވިޔަ ނުދިނުމަށްޓަކާ ކުރެވެން ހުރި ހުރިހާ މަސައްކަތެއް ކުރަމުންގެންދާނެ ކަމަށްވެސް ބުނެފަ އެވެ.
އަމީނީ މަގު ހެދުމުގެ އަމަލީ މަސައްކަތް އާރުޑީސީއިން ފަށާފައިވަނީ މިދިޔަ އަހަރުގެ އޮގަސްޓް މަހުގެ 30 ވަނަ ދުވަހު އެވެ. މި މަސައްކަތް އާރްޑީސީއަށް ހަވާލުކޮށްފައިވަނީ 84،414،546.83ރ. އަށް 210 ދުވަހުގެ ތެރޭގައި ނިންމުމަށެވެ. އަމީނީ މަގުގެ އިރުން ފެށިގެން ސްޓެލްކޯއާ ހަމައަށް ތާރު އަޅާފައިވާއިރު ތާރު އެޅުމުގެ މަސައްކަތް ކޮށްފައިވަނީ އެމްޓީސީސީންނެވެ.
މި މަސައްކަތުގެ ދަށުން 1.7 ކިލޯމީޓަރުގެ މަގުގައި ތާރުއެޅުމާއި މަގުގައި ފެންހިންދާ ނިޒާމް ގާއިމްކުރުމާއި މަގުގައި މަގު ބައްތިޖަހާނެ އެވެ.