ތުރުކީގެ ހޮސްޕިޓަލެއްގެ އިމާރާތުގައި ހެލިކޮޕްޓަރެއް ޖެހިގެން ވެއްޓި ހިނގި ހާދިސާގައި ހަތަރު މީހުން މަރުވެއްޖެއެވެ.
ތުރުކީގެ ދެކުނު ހުޅަނގު ސަރަޙައްދުގައި އާދީއްތަ ދުވަހު ހިނގި އެ ނުރައްކާތެރި ހާދިސާގައި އެމްބިއުލާންސް ހެލިކޮޕްޓަރެއް ހޮސްޕިޓަލުގެ އިމާރާތުގައި ޖެހިގެން ވެއްޓުމުން 4 މީހުން މަރުވެފައިވާކަން އެ ހޮސްޕިޓަލުން ވަނީ ކަށަވަރު ކޮށްފީފައެވެ.
ތުރުކީގެ ޞިއްޙީ ވުޒާރާއާއި ހަވާލާދީ ރޮއިޓާސްއިން ބުނެފައިވާ ގޮތުން، މި ހާދިސާ ހިނގީ މުގުލާ ޓްރެއިނިންގ އެންޑް ރިސާރޗް ހޮސްޕިޓަލުން ހެލިކޮޕްޓަރު ދަތުރެއް ފަށަމުންދަނިކޮށެވެ. މި ހެލިކޮޕްޓަރުގައި ތިބީ ދެ ޕައިލެޓުންނާއި، ޑޮކްޓަރަކާއި އަދި އިތުރު މެޑިކަލް މުވައްޒަފެކެވެ.
މުގުލާގެ ސަރަޙައްދީ ގަވަރުނަރު އިދްރިސް އަކްބިޔިކް ނޫސްވެރިންނަށް މަޢުލޫމާތު ދެމުން ބުނެފައިވަނީ ހެލިކޮޕްޓަރު ފުރަތަމަ ޖެހުނީ ހޮސްޕިޓަލް އިމާރާތުގެ 4 ވަނަ ފަންގިފިލާގައި ކަމަށާއި، އޭގެ ފަހުން ބިމަށް ވެއްޓުނު ކަމަށެވެ. އިމާރާތުގެ އެތެރޭގައި ތިބި މީހުންނަށާއި ބިމުގައި ތިބި މީހުންނަށް އެއްވެސް ގެއްލުމެއް ލިބިފައެއް ނުވެއެވެ. މި ހާދިސާ ހިނގި ވަގުތު ވަރަށް ބޮޑަށް ދުން އަރާފައިވާކަމަށް ބުނެފައިވާއިރު، ހާދިސާ ހިނގި ސަބަބު ދަނީ ތަޙުޤީޤު ކުރަމުންނެވެ.
ހާދިސާ ހިނގި ސަރަޙައްދުން ނެގިފައިވާ މަންޒަރުތަކުގައި ދައްކާގޮތުން ހޮސްޕިޓަލް އިމާރާތުގެ ބޭރުގައި ހެލިކޮޕްޓަރުގެ ބައިތައް ވަނީ ބިމަށް ފެތުރިފައެވެ. އަދި ގިނަ އަދަދެއްގެ އެމްބިއުލާންސްތަކާއި ކުއްލި ނުރައްކަލުގެ ޓީމުތައް ވަނީ އެ ސަރަޙައްދަށް ޖަމާވެފައެވެ.
Thiladhun © 2019 – 2023| Made with ❤️ in #Thiladhunmathi
Thiladhun © 2019 – 2022
Made with ❤️ in #Thiladhunmathi