ރާއްޖޭގެ މަސްވެރިކަމުގެ ސިނާއަތުގައި ހުރި އިންވެސްޓްމަންޓު ފުރުސަތުތަކުގެ މައުލޫމާތު ޗައިނާގެ ވިޔަފާރިވެރިންނާ ހިއްސާކޮށްފިއެވެ.
ފިޝާރީސް މިނިސްޓްރީން ބޭއްވި ބައްދަލުވުމެއްގައި ޗައިނާގެ ވިޔަފާރިވެރިންނާ ހިއްސާކޮށްފައިވަނީ މިނިސްޓަރު އަޙުމަދު ޝިޔާމު އަދި އެމިނިސްޓްރީގެ އިސްވެރިންނެވެ. ޗައިނާގެ ވިޔަފާރިވެރިންތަކެއް ރާއްޖޭގައި ހުރި އިންވެސްޓުމަންޓުތަކުގެ ފުރުސަަތުތަކާއި ގުޅޭ މައުލޫމާތު ހޯދުމަށް ކުރަމުންދާ ދަތުރުގައި މިނިސްޓަރު ޝިޔާމު ވަނީ ރާއްޖޭގެ މަސްވެރިކަމުގެ ސިނާއަތުގައި، މެރިކަލްޗަރ އަދި ބްލޫ އިކޮނޮމީ ދާއިރާއިން ހުރި ފުރުސަތުތަކުގެ މައުލޫމާތު ހިއްްސާކޮށްފައެވެ.
މީގެ އިތުރުން މިނިސްޓަރުވަނީ ސަރުކާރުން މިދާއިރާ ކުރިއެރުވުމަށްކުރަމުންދާ މަސައްކަތްތުގެ މައުލޫމާތުވެސް ހިއްސާކޮށްފައެވެ. އެގޮތުން ސްޕޯޓްސް ފިޝިން ބަނދަރުތައް ތަރައްގީކުރުމުގެ މަސައްކަތާއި، މެރިކަލްޗަރ ސިނާއަތުގެ ދާއިރާއިން މަސައްކަތްތައް ކުރެވެމުންދާކަމަށް މިނިސްޓަރުވަނީ ފާހަގަކުރައްވާފައެވެ.
މި ސަރުކާރުން ރާއްޖޭގެ މަސްވެރިކަމުގެ ސިނާއަތް ކުރިއެރުވުމަށް ގިނަ މަސައްކަތްތަކެއް ކުރަމުން އަންނައިރު އެ ދާއިރާއިން މަތީ ތައުލީމު ހޯދުމުގެ ފުރުސަތުތައްވެސް އަންނަނީ ފަހިކޮށްދެމުންނެވެ.