އެސްޓޯނިއާގެ ރައީސް ޑރ. އަލާރް ކާރިސްގެ ދައުވަތަކަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެ ގައުމަށް ރަސްމީ ދަތުރުފުޅެއް ކުރައްވަން ހަމަޖެހިއްޖެއެވެ.
މިކަމާގުޅިގެން ރައީސް އޮފީހުން ވިދާޅުވީ މި ދަތުރުފުޅުގައި ދެ ޤައުމުގެ ދޭދޭ ގުޅުން އިތުރަށް ހަރުދަނާ ކުރެއްވުމާއި ދެ ޤައުމު ގުޅިގެން މަސައްކަތް ކުރެވޭނެ ދާއިރާތަކާ ގުޅޭގޮތުން ދެ ރައީސުން މަޝްވަރާ ކުރައްވާނެ ކަމަށާއި ޑިޖިޓަލް ދާއިރާ އާއި ސައިބަރ އަދި އީ-ގަވަނެންސް ދާއިރާ އާއި މޫސުމީ ބަދަލުތަކާއި ތިމާވެއްޓާ ގުޅުންހުރި ދާއިރާތަކުން ވެސް ގުޅުން ބަދަހިކުރުމަށް މަޝްވަރާ ކުރައްވާނެ ކަމަށެވެ.
މި ދަތުރުފުޅުގައި ޑރ. ކާރިސް އާއި އެސްޓޯނިއާގެ ޤާނޫނު ހަދާ މަޖިލީހުގެ ރައީސް ލޮރީ ހުސާރާއި، މިނިސްޓަރ އޮފް އެޑިޔުކޭޝަން އެންޑް ރިސަރޗް، ހަރ އެކްސެލެންސީ ކްރިސްޓީނާ ކަލާސް އާއި، މިނިސްޓަރ އޮފް ކްލައިމެޓް ޔޯކޯ އެލެންޑަރ، މިނިސްޓަރ އޮފް ހެލްތް ރިއާނާ ސިކުޓް، މިނިސްޓަރ އޮފް ޖަސްޓިސް އެންޑް ޑިޖިޓަލް އެފެއާޒް ލިސާ-ލީ ޕަކޮސްޓާ އަދި މިނިސްޓްރީ އޮފް ފޮރިން އެފެއާޒްގެ ސެކްރެޓަރީ ޖެނެރަލް މިސްޓަރ ޖޮނަތަންއާ ރައީސް ޑރ. މުޢިއްޒު ބައްދަލުކުރެއްވުމަށް ވަނީ ހަމަޖެހިފައެވެ.
މިއީ ރާއްޖޭގެ ރައީސަކު އެސްޓޯނިއާއަށް ކުރައްވާ ފުރަތަމަ ރަސްމީ ދަތުރުފުޅެވެ. ރައީސް މުއިއްޒު މި ދަރުތުފުޅު ކުރައްވާނީ މި މަހުގެ 13 ވަނަ ދުވަހުން 16 ވަނަ ދުވަހަށެވެ.