މިކަމަށް ރައްދުދެއްވަމުން މާލޭ ސިޓީގެ މޭޔަރު އާދަމް އާޒިމް ވިދާޅުވެފައި ވަނީ އެޕަމްޕު ރޫޅައިލިއިރު މަސައްކަތް ނުކުރާތާ ފަސް މަސްވަރު ވެފައިވާ ކަމަށެވެ.
މާލޭ ސިޓީ ކައުންސިލުގެ އިހުމާލުން މާފަންނު ސަހަރާގައި ހުންނަ ފެން ހިންދާ ޕަމްޕު ހަލާކުވެފައިވާ ކަމަށް ވިދާޅުވެ ކޮންސްޓްރަކްޝަންސް މިނިސްޓަރު ޑރ އަބްދުﷲ މުއްތޮލިބު ނުރުހުން ފާޅުކުރައްވައިފި އެވެ.
މި ސްޓޯމްވޯޓާ ޕަމްޕު ސްޓޭޝަނަކީ މާލޭގައި ފެންބޮޑުވާ މައްސަލަ ހައްލުކުރުމަށް އެމްޑަބްލިއުއެސްސީން 2014 އާއި 2018 އަހަރާ ދެމެދު މާލޭގެ އެކި ތަންތަނުގައި ބެހެއްޓި ސްޓޭޝަންތަކުގެ ތެރެއިން މާފަންނު ސަރަހައްދުގައި ބެހެއްޓި މައި ސްޓޭޝަނެވެ.
ޕަމްޕަށް ލިބިފައިވާ ގެއްލުން ދައްކުވައިދޭ ފޮޓޯތަކެއް ހިއްސާކުރައްވަމުން މިނިސްޓަރު މުއްތޮލިބް މިއަދު އެކްސްގައި ވިދާޅުވެފައި ވަނީ ސަހަރާ ހުސްކުރުމުގެ މަސައްކަތުގެ ތެރެއިން މިނިސްޓްރީއަށް އެންގުމަކާނުލާ އެތަނުގައި ހުންނަ ޕަމްޕު ރޫޅާލާފައިވާ ކަމަށެވެ. އޭގެ ސަބަބުން އެސަރަހައްދުގައި އިންތިހާއަށް ފެންބޮޑުވެފައިވާ ކަމަށެވެ. އަދި ޕަމްޕު ރޫޅާލާ، އެއަށް ދީފައިވާ ގެއްލުމުގެ ސަބަބުން އެސަރަހައްދުން ފެން ހިނދުން ލަސްވާކަންވެސް މިނިސްޓަރ ފާހަގަކުރެއްވި އެވެ. 
މިކަމަށް ރައްދުދެއްވަމުން މާލޭ ސިޓީގެ މޭޔަރު އާދަމް އާޒިމް ވިދާޅުވެފައި ވަނީ އެޕަމްޕު ރޫޅައިލިއިރު މަސައްކަތް ނުކުރާތާ ފަސް މަސްވަރު ވެފައިވާ ކަމަށެވެ. ނަމަވެސް ރައްދުގައި މިނިސްޓަރު ވަނީ މިކަން ދޮގުކުރައްވައި، މިދިޔަ ހަފުތާގައި ވެސް ޕަމްޕު ހަމައަށް މަސައްކަތްކުރި ކަމަށާއި މާލެއަށް ވިއްސާރަކޮށް ފެންބޮޑުވާ ކޮންމެ ފަހަރަކު މާލޭގެ އެކި ހިސާބުތަކުގައި ހުރި ޕަމްޕުތަކުގެ ހާލަތު، މިނިސްޓްރީގެ މުވައްޒަފުން ބަލާކަމަށެވެ. އަދި ޕަމްޕު މަސައްކަތް ކުރާއިރާއި ނުކުރާއިރުގެ ތަފާތު އެސަރަހައްދުގައި ދިރިއުޅޭ ފަރާތްތަކަށް އިހުސާސްކުރެވޭނެ ކަމަށް މިނިސްޓަރު ވިދާޅުވި އެވެ.
މީގެ އިތުރުން ޕަމްޕު ބެހެއްޓުމުގެ ކުރިން އެސަރަހައްދު ރަނގަޅަށް ސާފުކޮށް މިނިކަށިތައް ނަގާފައިވާނެކަމަށް ވެސް މިނިސްޓަރު ވިދާޅުވި އެވެ. 
މިމަހުގެ ތިންވަނަ ދުވަހުގެ އިތުރުން ރޭގައި މާލެއަށް ކުރި ވިއްސާރައިގައި މާފަންނުގައި ވަރަށް ބޮޑަށް ފެންބޮޑުވެ، ގޭގެއަށް އެކިވަރުގެ ގެއްލުންތައް ލިބިފައިވެ އެވެ. ބައެއް ގެތަކުގެ ފާހާނަތަކުން ނަޖިސް ލީކުވެ، ދިރިނޫޅެވޭ ވަރު ވެފައިވެ އެވެ. 
އެންޑީއެމްއޭ އިން ބުނެފައިވާ ގޮތުގައި މިމަހުގެ ތިންވަނަ ދުވަހު ކުރި ވިއްސާރައިގާ 2.2 މިލިއަން ރުފިޔާގެ ގެއްލުން ލިބިފައިވެ އެވެ.
މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ