ކުރިއަށް އޮތް ރިޔާސީ އިންތިހާބުގައި ޖުމްހޫރީ ގުޅުމުގެ ރިޔާސީ ކެންޑިޑޭޓް ޤާސިމް އިބްރާހިމަށް ތާއީދުކުރައްވަން ޕީޕީއެމްގެ ކުރީގެ ނައިބު ރައީސް އަދި ނިމިދިޔަ ރިޔާސީ އިންތިހާބުގައި ވާދަކުރެއްވި އުމަރު ނަސީރާއި އޭނާގެ ޓީމުން ނިންމައިފިއެވެ.
އުމަރުގެ ޓީމުން ޤާސިމަށް ތާއީދުކުރައްވަން ނިންމެވިކަން އިއުލާނުކުރެއްވީ މިއަދު ހަވީރު މޫކައި ސުއިޓްސްގައި ބޭއްވި ނޫސްވެރިންގެ ބައްދަލުވުމެއްގައި އުމަރު ނަސީރުއެވެ.
ނޫސްވެރިންގެ މިބައްދަލުވުމުގައި އުމަރު ނަސީރު ވިދާޅުވީ އޭނާގެ ޓީމުން ޤާސިމް އިބްރާހިމަށް ތާއީދުކުރައްވަން ނިންމެވީ އިންތިހާބުގައި ވާދަކުރައްވާ ކެންޑިޑޭޓުން ވަރަށް ބޮޑަށް ދިރާސާކުރެއްވުމަށްފަހު ގިނަ މަޝްވަރާތަކެއްވެސް ކުރެއްވުމަށްފަހުގައި ކަމަށެވެ.
އުމަރު ވިދާޅުވީ އޭނާގެ ޓީމުގައި ޕީޕީއެމްގެ ކައުންސިލް މެންބަރުންނާއި، ޕީޕީއެމްގެ ތަފާތު ކޮމިޓީތަކުގައި މަސައްކަތް ކުރައްވާ ބޭފުޅުން ގިނަ އަދަދަކަށް ހަރަކާތްތެރިވާ ކަމަށާއި، އެބޭފުޅުން ޕީޕީއެމްގެ ރިޔާސީ ކެންޑިޑޭޓް އަބްދުﷲ ޔާމިންއަށް ތާއީދު ނުކުރަން ނިންމީ ރައީސް މައުމޫންގެ ފިކުރާއި އެއްގޮތަށް ޔާމިން ޕީޕީއެމް ކުރިއަށް ގެންދަން މަސައްކަތް ނުކުރައްވާތީ ކަމަށެވެ.
އުމަރު ވިދާޅުވީ ޔާމިން ކުރިން އިސްވެ ހުރި ޕީޕަލްސް އެލަޔަންސް (ޕީއޭ) ގައި އޭރު ތިއްބެވި ކޮރަޕްޓް ހުރިހާ ބޭފުޅުން ޕީޕީއެމްއާ ގުޅިވަޑައިގަތުމުން ޕީޕީއެމް މިއަދު އޮތީ ކޮރަޕްޓް ބޭފުޅުންގެ އަތްދަށުގައި ހިސޯރުވެފައި ކަމަށެވެ.
އުމަރު ވިދާޅުވީ ޤައުމަށް މިހާރު ކުރިމަތިވެފައިހުރި ދީނީ، އިޖުތިމާއީ އަދި އިޤްތިސޯދީ ބޮޑެތި މައްސަލަތަކާއި ގުޅިގެން އެމައްސަލަތައް ހައްލުކުރެއްވޭނެ ބޭފުޅަކު އިންތިހާބުގައި ރައްޔިތުން ހޮވަން ޖެހޭ ކަމަށެވެ. ރިޔާސީ އިންތިހާބުގައި ވާދަކުރައްވާ ކެންޑިޑޭޓުންގެ ތެރޭގައި ހުންނެވި އެފަދަ ހަމައެކަނި ބޭފުޅަކީ ޤާސިމް އިބްރާހިމް ކަމަށްވެސް އުމަރު ވިދާޅުވިއެވެ.
އޭނާ ވިދާޅުވީ މުޅި ޤައުމު މިއަދު ބުރަވަމުންދަނީ ޖުމްހޫރީ ގުޅުމަށް ކަމަށާއި، ޖުމްހޫރީ ގުޅުމުގައި އެތައް ސިޔާސީ ޕާޓީއަކާއި އިލްމީ ޤާބިލް ބޭފުޅުން އެބަ ތިއްބެވި ކަމަށެވެ. ޕީޕީއެމްއާ އެމްޑީޕީ މިއަދު ނިކަމަތިވަމުންދާ ކަމަށާއި އެދެޕާޓީއާ ކޯލީޝަން ހަދާނެ ޕާޓީއެއް މިހާރު ނެތް ކަމަށްވެސް އުމަރު ވިދާޅުވިއެވެ.
އުމަރު ވިދާޅުވީ އޭނާ ޖުމްހޫރީ ޕާޓީއާ ގުޅުނީ ޝަރުތުތަކަކާއެކު ކަމަށާއި، ޖުމްހޫރީ ޕާޓީގެ ވެރިކަމެއްގައި އޭނާގެ ޓީމުގައި ހިމެނޭ ބޭފުޅުންނަށް ސަރުކާރުގެ ތެރެއިން ފުރުސަތު ދެއްވުމަށް ހުށަހަޅުއްވާފައިވާނެ ކަމަށެވެ. ނަމަވެސް އެއީ ސަރުކާރުގެ ކިތައް ޕަސަންޓް ކަމެއް އުމަރު ވިދާޅުވެފައެއް ނުވެއެވެ. މީގެ އިތުރުން އުމަރު ވިދާޅުވީ މީގެ ކުރީގެ ސަރުކާރު ތަކުގައި އޭނާ މަޤާމެއް އަދާކުރައްވާފައި ނުވި ނަމަވެސް ޖުމްހޫރީ ގުޅުމުގެ ސަރުކާރެއްގައި އޭނާ އިސް މަޤާމަކުން ފެންނާނެ ކަމަށެވެ.
ޖުމްހޫރީ ގުޅުމަށް ތާއީދުކުރަން ނިންމެވުމަށްފަހު އުމަރު މިއަދު ވަނީ އޭނާގެ ހުރިހާ ސަޕޯޓަރުން ޖުމްހޫރީ ގުޅުމަށް ތާއީދުކޮށް ޤާސިމަށް ވޯޓް ދެއްވުމަށްވެސް ގޮވާލައްވާފައެވެ. އުމަރު އިތުރަށް ވިދާޅުވީ ކުރިއަށް އޮތް ރިޔާސީ އިންތިހާބު ޤާސިމް އިބްރާހިމް ކާމިޔާބު ކުރައްވާނެ ކަމަށް މިހާރު ބެލެވޭތީ ޤާސިމަށް ބޮޑެތި ހަމަލާތަކެއް އަންނާނެ ކަމަށާއި، އެފަދަ ކޮންމެ ހަމަލާއެއްގައި ޤާސިމްގެ ދިފާއުގައި ތެދުވާނެ ކަމަށެވެ. އުމަރު ޖުމްހޫރީ ގުޅުމަށް ތާއީދުކުރެއްވި ނަމަވެސް ޖުމްހޫރީ ޕާޓީއަށް އަދި އުމަރު ސޮއިކުރައްވާފައެއް ނުވެއެވެ.