އެމްޑީޕީގެ ޓިކެޓްގައި ކުރިއަށް އޮތް ރައްޔިތުންގެ މަޖިލީހަށް ކުރިމަތިލާނެ ފަރާތްތައް ހޮވުމަށް އިއްޔެ ބޭއްވި ޕްރައިމަރީގައި ބ. ކެންދޫ ދާއިރާގެ ޓިކެޓް، ކެންދޫގައި ވޯޓުނުލައި ޑީއާރްޕީގެ ކުރީގެ ލީޑަރު އަހުމަދު ތަސްމީން އަލީ އަށް ދީފި އެވެ.
އިއްޔެ ބޭއްވި ޕްރައިމަރީގައި ތަސްމީނަށް ކެންދޫ ދާއިރާގެ ޓިކެޓް ދީފައި ވަނީ ކެންދޫ ފިޔަވައި އެ ދާއިރާގެ އެހެން ރަށްރަށުގަޔާއި މާލޭގައި ބޭއްވި އިންތިހާބުން 391 ވޯޓް ހޯއްދަވައިގެންނެވެ. އެއީ 66 ޕަސެންޓެވެ. ތަސްމީނާ ވާދަކުރެއްވި މައުރޫފް ޒާކިރަށް ލިބިފައި ވަނީ 181 ވޯޓެވެ.
ކެންދޫގައި ވޯޓްލުން ނުބާއްވާ އިރު އެ ރަށަށް ވޯޓްލުމަށް 260 މީހުން ވަނީ ރަޖިސްޓްރީކޮށްފަ އެވެ.
އެމްޑީޕީ އިންތިހާބާ ބެހޭ ކޮމެޓީގެ މެމްބަރު އިބްރާހިމް ވިދާޅުވީ ކެންދޫގައި ވޯޓް ލުން ކުރިއަށް ނުގެންދިޔައީ އެ ރަށުގައި ވޯޓްލާނެ މާހޯލެއް ނުލިބުމުން ކަމަށެވެ.
"އަޅުގަނޑުމެންނަކަށް ނެތް އެކަން ދެއްމޭކަށް، އަޅުގަނޑުމެން މަސައްކަތް ކުރީ މާލެ އިން އޮފިޝަލުން ގެންގޮސްގެން ވޯތްލާން. ނަމަވެސް އެ ރަށުން ވޯޓުލެވޭނެ މާހޯލެއް ނުލިބުނު،" އިބްރާހިމް ވަހީދު ވިދާޅުވި އެވެ.
އޭނާ ވިދާޅުވީ އެކަމުގެ ސަބަބުން ދެން ނުކުންނާނެ ނަތީޖާ އަކަށް ވިސްނާނީ އެމްޑީޕީ އިން ކަމަށާއި އެ ޕާޓީގެ އިންތިހާބާ ބެހޭ ކޮމެޓީ އިން އެގޮތަށް ނިންމީ އިތުރަށް އެކަން ދަންމަން ވަގުތެއް ނެތުމުން ކަމަށެވެ.
އިބްރާހިމް ވަހީދު ވިދާޅުވީ އެ ދާއިރާގެ އިންތިހާބު އަލުން ބޭއްވުމުގެ ވިސްނުމެއް އެ ޕާޓީ އިން ނުގެންގުޅޭ ކަމަށެވެ.
އިއްޔެ ބޭއްވި ފޭދޫ ދާއިރާގެ ޕްރައިމަރީ އިން އަލްހާން ފަހުމީ އަށް ނާކާމިޔާބުވެވަޑައިގެންފައިވާ އިރު އޭނާ ވަނީ އެ އިންތިހާބު ބާތިލް ކުރުމަށް ހުށައަޅާފަ އެވެ. އިއްޔެ ވޯޓުލަމުން ދިޔަ ވަގުތު އަލްހާން ހުށައެޅުއްވި މައްސައަކީ ވޯޓާސް ލިސްޓްގައި އެމްޑީޕީ އަށް ނިސްބަތް ނުވާ މެމްބަރުން ތިބި ކަމުގެ ޝަކުވާ އެވެ.
އެމްޑީޕީ އިންތިހާބާ ބެހޭ ކޮމެޓީގެ މެމްބަރު އަލީ ނިޔާޒް ވިދާޅުވީ އެ އިންތިހާބުގައި ވޯޓްލާފައި ވަނީ އެމްޑީޕީގެ މެމްބަރުން ކަމަށެވެ. އެގޮތުން އިލެކްޝަންސް ކޮމިޝަނުގެ ރަޖިސްޓްރީގައި ތިބި އެ ޕާޓީގެ މެމްބަރުންގެ އަދަދަކީ 43،000 ކަމުގައި ވީ ނަމަވެސް 57،000 މީހުން އެމްޑީޕީގެ ޕްރައިމަރީގައި ވޯޓްލުމަށް ރަޖިސްޓްރީކޮށްފައިވާ ކަމަށާއި ސަބަބަކީ އެ ޕާޓިގައި ރަޖިސްޓްރީވާން އެދޭ ހިސާބުން ވޯޓްލުމުގެ ހައްގު ލިބިގެންދާތީ ކަމަށެވެ.
މިހާތަނަށް ހުށައަޅާފައިވާ ޝަކުވާތަކަށް ބަލާ އިރު އެމްޑީޕީ އިން ބޭއްވި އެއްވެސް ޕްރައިމަރީއެއް ބާތިލު ކުރަން ނުޖެހޭ ކަމަށް ނިޔާޒް ވިދާޅުވި އެވެ.