ގެއިންސައިޓް ހެކްކުރުމުގެ ސަބަބުން 200 އަށްވުރެ ގިނަ ކުންފުނީގެ ޑޭޓާ ވަގަށް ނަގާފައިވާ ކަމަށް ގޫގުލްއިން ބުނެފިއެވެ. ގޫގުލްއިން ކަށަވަރުކޮށްދީފައިވާ ގޮތުގައި، ބޮޑު ސަޕްލައި ޗެއިން ހެކެއްގެ ސަބަބުން 200 އަށް ވުރެ ގިނަ ކުންފުނީގެ ސޭލްސްފޯސްގައި ރައްކާކުރެވިފައިވާ ޑޭޓާ ހެކަރުން ވަނީ ވަގަށް ނަގައިފައެވެ. މި ހެކް ކޮށްފައިވަނީ ކަސްޓަމަރުންނަށް ސަޕޯޓް ދިނުމުގެ ޕްލެޓްފޯމެއް ކަމަށްވާ ގެއިންސައިޓްއިން ޝާއިއުކޮށްފައިވާ އެޕްތަކެއް މެދުވެރިކޮށެވެ. ގޫގުލް ތްރެޓް އިންޓެލިޖެންސް ގްރޫޕްގެ މައިގަނޑު ތްރެޓް އެނަލިސްޓް އޮސްޓިން ލާސަން ވިދާޅުވެފައިވާ ގޮތުގައި، 200 އަށްވުރެ ގިނަ ސޭލްސްފޯސްގެ އެކައުންޓަށް މިކަމުގެ އަސަރުކޮށްފައިވާކަން ގޫގުލްއަށް އެނގެއެވެ. https://sun.mv/208444 މި ހެކްގެ ޒިންމާ ނަގާފައި ވަނީ މަޝްހޫރު ހެކިންގް ގްރޫޕެއް ކަމަށްވާ ސްކެޓާޑް ލެޕްސަސް ހަންޓާސްއިންނެވެ. މި ގްރޫޕްގައި ޝައިނީހަންޓަރސްގެ ގޭންގް ވެސް ހިމެނެއެވެ. މި ގްރޫޕުން ވަނީ އެޓްލާސިއަން، ކްރައުޑްސްޓްރައިކް، ޑޮކިއުސައިން، އެފް5، ގިޓްލެބް، ލިންކްޑިން، މޯލްވެއާބައިޓްސް، ސޮނިކްވޯލް، ތޮމްސަން ރޮއިޓާސް، އަދި ވެރައިޒަން ފަދަ ބޮޑެތި ކުންފުނިތަކަށް ހަމަލާދީފައިވާ ކަމަށް ބުނެފައެވެ. ނަމަވެސް، މި ކުންފުނިތަކުގެ ތެރެއިން ބައެއް ކުންފުނިތަކުން ވަނީ އެމީހުންގެ ޑޭޓާއަށް އެއްވެސް އަސަރެއް ނުކުރާކަމަށް ބުނެފައެވެ. މިގޮތުން، ކްރައުޑްސްޓްރައިކްއިން ބުނެފައި ވަނީ އެމީހުންގެ ކަސްޓަމަރުންގެ ޑޭޓާ ރައްކާތެރިކޮށްފައިވާ ކަމަށެވެ. ޑޮކިއުސައިންއިން ވެސް ބުނެފައިވަނީ އެމީހުންގެ ޑޭޓާ ވަގަށް ނަގާފައިވާކަމުގެ އެއްވެސް ހެއްކެއް ނެތް ކަމަށެވެ. ހެކަރުން ބުނާގޮތުގައި، ގެއިންސައިޓްއަށް ވަދެވުނީ މީގެ ކުރިން ސޭލްސްލޮފްޓްގެ ކަސްޓަމަރުންނަށް ދިން ހަމަލާއެއްގެ ސަބަބުންނެވެ. ގެއިންސައިޓްއަކީ ސޭލްސްލޮފްޓްގެ ކަސްޓަމަރެކެވެ. އެ ހަމަލާގައި ވަގަށް ނެގި ޑްރިފްޓް އޮތެންޓިކޭޝަން ޓޯކަންތައް ބޭނުންކޮށްގެން، ހެކަރުންނަށް ގެއިންސައިޓްގެ ސޭލްސްފޯސް އެކައުންޓްތަކަށް ވަދެ ޑޭޓާ ނެގުނެވެ. ސޭލްސްފޯސްއިން ބުނެފައިވަނީ މި މައްސަލަ ދިމާވީ އެމީހުންގެ ޕްލެޓްފޯމްގެ ބަލިކަށިކަމަކުން ނޫން ކަމަށާއި، އެއީ ގެއިންސައިޓްގެ އެޕްލިކޭޝަންގެ ބޭރުގެ ކަނެކްޝަނަކުން ދިމާވި މައްސަލައެއް ކަމަށެވެ. މިހާރު ގެއިންސައިޓްއިން ދަނީ ގޫގުލްގެ އިންސިޑެންޓް ރެސްޕޮންސް ޔުނިޓް ކަމަށްވާ މެންޑިއަންޓްއާ ގުޅިގެން މި މައްސަލަ ތަހުގީގު ކުރަމުންނެވެ. ހެކަރުންގެ ގްރޫޕް ކަމަށްވާ ސްކެޓާޑް ލެޕްސަސް ހަންޓާސްއިން ވަނީ އަންނަ ހަފްތާގައި މި ހަމަލާގެ ޝިކާރައަށް ވެފައިވާ ކުންފުނިތަކަށް ބިރުދެއްކުމަށް ޚާއްސަ ވެބްސައިޓެއް އިފްތިތާހު ކުރާނެ ކަމަށް ބުނެފައެވެ.