މިވަރުގެ ސަރުކާރެއް ނެތް ކަމަށް ރައްޔިތުން ބުނެފައިވާ ކަމަށް ޕީއެންސީގެ ޕީޖީ ލީޑަރު އަދި އިނގުރައިދޫ ދާއިރާގެ މެންބަރު އިބްރާހީމް ފަލާހު ވިދާޅުވެއްޖެ އެވެ.
ޕީއެންސީ ސަރުކާރަށް ދެ އަހަރު ފުރުމުގެ ގޮތުން އާޓިފިޝަލް ބީޗްގައި ބޭއްވި ބޮޑު އެއްވުމުގައި ވާހަކަދައްކަމުން ފަލާހު ވިދާޅުވީ ގައުމުގެ ކަންކަން ދަނީ ގޯސް މަގުން ކަމަށް އިދިކޮޅު ފަރާތްތަކުން ބުނަމުންދާ ކަމަށާއި ނަމަވެސް ރޭގެ އެއްވުމަށް ގިނަ އަދަދެއްގެ ރައްޔިތުން ޖަމާވެ އެ ވާހަކަތަކަށް ޖަވާބުދީފައިވާ ކަމަށެވެ.
"ރާއްޖޭގެ ހުރިހާ ކަންކޮޅުތަކުން ރައްޔިތުން އެއްވެ މިރޭ، ދިވެހިރާއްޖޭގައި ބޭއްވޭ އެންމެ ބޮޑު ސިޔާސީ މި ހަރަކާތުގައި ތި ވިދާޅުވަނީ، އަޅުގަނޑުމެންގެ އިއްޒަތްތެރި ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރު ވަރުގެ ސަރުކާރެއް ނެތޭ." ގިނަ އަދަދެއްގެ ރައްޔިތުން ބައިވެރިވި އެއްވުމުގައި ފަލާހު ވިދާޅުވި އެވެ.
މި އެއްވުމުގައި ފަލާހު ވަނީ އިދިކޮޅު އެމްޑީޕީއަށް ވަރަށް ބޮޑަށް ފާޑު ވިދާޅުވެފަ އެވެ. އެގޮތުން ކޮވިޑުގެ ބަލިމަޑުކަމުގައި ބޭރުގެ ފަރާތްތަކުން ރާއްޖެއަށް ދިން އެހީތަކަށް ވެސް އެމްޑީޕީ ސަރުކާރުން ހިޔާނާތްތެރިވެފައިވާ ކަމަށާއި އެގޮތުން އެހީގެ ގޮތުގައި އެ ދުވަސްވަރު ލިބުނު އެތައް މިލިއަން ޑޮލަރެއްގެ ފައިސާ އެމްޑީޕީ ސަރުކާރުގެ އިސްވެރިން ބޭރުގެ އެކައުންޓްތަކުގައި ރައްކާކުރި ކަމަށް ފަލާހު ވިދާޅުވި އެވެ.
އަދި އެ ފަހަރުގެ ރިޔާސީ އިންތިހާބުގައި ރައްޔިތުން އެމްޑީޕީއަށް ނޫނެކޭ ބުނީ އެފަދަ ވަރަށް ގިނަ ނުބައި ސަބަބުތަކާ ހެދި ކަމަށް ފަލާހު ވަނީ ވިދާޅުވެފަ އެވެ.