ޝަރީޢަތާއި ޤާނޫނުގެ ދާއިރާއިން 20 ވަނަ ރައްޔިތުންގެ މަޖިލީހުގެ މެންބަރުން މަތީ ތަޢުލީމަށް ތަމްރީނު ކުރުމަށް އެޑްވާންސްޑް ސެޓްފިކެޓް އިން ޝަރީޢާ އެންޑް ލޯ ކޯހެއް އިއްޔެ ފަށައިފިއެވެ.
މި ކޯހަކީ ދިވެހިރާއްޖޭގެ އިސްލާމީ ޔުނިވަރސިޓީ (އައިޔޫއެމް) އާއި ރައްޔިތުންގެ މަޖިލީހާ ގުޅިގެން ފަށާފައިވައިވާ ކޯހެކެވެ.
މި ކޯސް ފެށުމަށް ބޭއްވު ބައްދަލުވުމުގައި ކޯހުގެ ބައިވެރިންނާއި، އައިޔޫއެމްގެ އިސްވެރިންނާއެކު މަޖިލީހުގެ ރައީސް ޢަބްދުއްރަޙީމް ޢަބްދުﷲ ބައިވެރިވެވަޑައިގެންފައިވާއިރު، މި ބައްދަލުވުމުގައި މަޖިލީހުގެ ރައީސް ޢަބްދުއްރަޙީމް ދެއްކެވި ވާހަކާގައި މިފަދަ ކޯހެއް ހިންގުމުގެ މައިގަނޑު ބޭނުމަކީ 20 ވަނަ ރައްޔިތުންގެ މަޖިލީހަކީ މަތީ ތަޢުލީމު ޙާޞިލުކޮށްފައިވާ ޢިލްމީގޮތުން ޤާބިލު މެންބަރުންތަކެއް ތިބި އަދި ޢިލްމީ މަސައްކަތްތަކެއް ކުރާ ނަމޫނާ މަޖިލީހެއްގެ ގޮތުގައި ހެއްދެވުމަށް ކަމުގައި ވިދާޅުވިއެވެ. އަދި މިއީ ރައީސް ޑރ. މުހައްމަދު މުޢިއްޒު ވެސް ވަރަށް ބޮޑަށް އެދިވަޑައިގެންނެވި ކަމެއްކަމަށް ވިދާޅުވިއެވެ. އެހެންކަމުން މަޖިލީހުގެ ރައީސް ވަނީ މެންބަރުންގެ ތަޢުލީމާއި ގުޅޭ މިފަދަ ފުރުޞަތެއް ފެށުމުގައި ރައީސް ދެއްވި ލަފާފުޅާއި، ބެހެއްޓެވި ޝަޢުޤުވެރިކަމަށްޓަކައި ޝުކުރުއަދާކުރައްވާފަވެއެވެ.
1 އަހަރު ދުވަހުގެ މުއްދަތަށް ހިންގުމަށް ހަމަޖެހިފައިވާ އެޑްވާންސްޑް ސެޓްފިކެޓް އިން ޝަރީޢާ އެންޑް ލޯ މި ކޯހުގައި މަޖިލީހުގެ މެމްބަރުން ހިމެނޭހެން ޖުމުލަ 8 ބޭފުޅަކު ބައިވެރިވެވަޑައިގަންނަވައެވެ.
އިސްލާމިކް ޔުނިވަރސިޓީން މަޢުލޫމާތު ދެއްވި ގޮތުގައި، ޝަރީޢަތާއި ޤާނޫނުގެ ދާއިރާއިން މަޖިލީހުގެ މެންބަރުންނަށް ބެޗްލަރ ޑިގްރީ ކޯހެއްވެސް ދާދިއަވަހަށް ފެށުމުގެ އިދާރީ މަސައްކަތްތަކެއް މިހާރު ކުރިއަށް އެބަގެންދެވެއެވެ.
އައި.ޔޫ.އެމް އަކީ ސްޓޭޓް-އޮފް-ދި އާޓް މޫޓް ކޯޓަކާއެކު ޝަރީޢަތާއި ޤާނޫނުގެ ދާއިރާއިން ފުޅާދާއިރާއެއްގައި ސެޓްފިކެޓް ލެވެލް އިން ފެށިގެން ޕީ.އެޗް.ޑީ އާ ހަމައަށް ކޯސް ހިންގާ ޔުނިވަރސިޓީއެކެވެ.
މި ޕްރޮގްރާމް ފެށުމަކީ ރައްޔިތުންގެ މަޖިލީހުގެ މެންބަރުންގެ ޤާނޫނީ އަދި ޝަރުޢީ ހުނަރުތައް އިތުރުކޮށް، ޤާނޫނު ހެދުމުގެ މަސައްކަތުގައި އިތުރު ފުރިހަމަކަމެއް ގެނައުމަށް އެޅޭ މުހިންމު ފިޔަވަޅެއް ކަމުގައި ބެލެވެއެވެ.
Thiladhun © 2019 – 2023| Made with ❤️ in #Thiladhunmathi
Thiladhun © 2019 – 2022
Made with ❤️ in #Thiladhunmathi