އަންނަ ޖޫން މަހުގެ ނިޔަލަށް ހިޔާ ފްލެޓްތަކުގައި ދިމާވާ ކަރަންޓްގެ މައްސަލަތަކާއި، ފެން ލީކްވާ މައްސަލައާއި، ޑްރެއިން ބްލޮކް ވާ މައްސަލައާއި، ބެލްކަނީ ސްލޯޕްގެ މައްސަލަތައް ހައްލުކޮށްދޭނެ ކަމަށް އާބަންކޯއިން ބުނެފިއެވެ.
ހިޔާ ފްލެތްތަކުގެ ކޮންޓްރެކްޓްގައިވާގޮތުން، "ކޮންޓްރެކްޓަރ ޑިފެކްޓްސް ލައިބިލިޓީ ޕީރިއަޑް" ނުތަވަ، ފްލެޓްތަކުގެ ހުރި މައްސަލަތައް އެޗްޑީސީން ޙައްލުކޮށްދޭނެ މުއްދަތުގެ ގޮތުގައި ލިޔެފައިވަނީ މިދިޔަ އަހަރުގެ ޑިސެމްބަރު 31ގެ ނިޔަލަށެވެ. އެގޮތުން ފްލެޓްތަކަށް ދިމާވާ ފެން ލީކުވުމުގެ މައްސަލައާއި، ފާޚާނާއާއި ބެލްކަނީގެ ސްލޯޕްތަކުގެ މައްސަލައިގެ އިތުރުން ފާޚާނާގެ ޑްރެއިން ބްލޮކްވުން އަދި ކަރަންޓުގެ މައްސަލަތައް ޙައްލުކޮށްދެމުން އައީ އެޗްޑީސީންނެވެ.
އެގޮތުން ހިޔާ ފްލެޓްތަކުގެ އެއްބަސްވުމުގައި، ފްލެޓް ހަވާލުވުމަށް ފަހު ފްލެޓްތައް ހުންނާނީ ދިރިއުޅޭ ފަރާތްތަކުގެ ފުރިހަމަ ޒިންމާގެ ދަށުގައި ކަމުގައި ބަޔާން ވެފައިވީ ނަމަވެސް، ހިޔާ ސަރަހައްދަކީ ބޮޑު އާބާދީއެއް އުޅޭ ސަރަހައްދެއްކަން ވަނީ ފާހަގަކޮށްފައެވެ. އެހެން ކަމުން އެއްފަހަރާ މީހުން ދިރިއުޅެން ފެށުމުން ދިމާވާ މައްސަލަތައް ހައްލު ކުރުމަށް އެ ކުންފުނިން ނިންމީ، އެ ޙިދުމަތް ހިޔާ ފްލެޓްތަކުގައި ދިރިއުޅޭ ފަރާތްތަކައް ވީހާވެސް ދިގު މުއްދަތަކަށް ފޯރުކޮށްދިނުމަށް ކަމަށެވެ.
އަދި ކުރިއަށް އޮތް ޖޫން މަހުގެ ނިޔަލަށް ޙިދުމަތް ފޯރުކޮށްދޭނެ ކަމަށް އާބަންކޯއިން ބުނެއެވެ. އެގޮތުން މިހާތަނަށްވެސް ހުށަހެޅުނު ގިނަ މައްސަލަތައް ހައްލުކޮށްދީފައިވާ ކަމަށާއި، މިހާރު މައްސަލަ ހުށަހެޅޭ މިންވަރު ދަށްވަމުންދާކަން ފާހަގަވާ ކަމަށް އެކުންފުނިން ބުނެއެވެ.
އެހެންކަމުން އަންނަ ޖުލައި މަހުން ފެށިގެން އެޗްޑީސީން ބަލަމުންދާނީ، ހިޔާ ފްލެޓްގެ އިމާރާތްތަކުގައި ހިމެނޭ އާއްމު ތަންތަނާއި ވަސީލަތްތަކަށް ދިމާވާ މައްސަލަތައް އެކަނި ކަމަށް އެ ކޯޕަރޭޝަނުން ބުނެއެވެ. ނަމަވެސް ފްލެޓްތަކުގެ އެތެރޭގެ މައްސަލަތަކުގައި، ފަންނީ އެހީ ފޯރުކޮށްދެމުންދާނެ ކަމަށް އެޗްޑީސީން ހާމަކުރެއެވެ.