އަންނަ އަހަރުގެ ޖުލައި މަހުގެ ކުރިން، އައްޑުއަށް ދިމާވެފައިވާ ކަރަންޓު ކެނޑުމުގެ މައްސަލައަށް ދިގުދެމިގެންދާ ހައްލެއް އަންނާނެ ކަމަށް، ރައީސް ޑރ. މުޙައްމަދު މުޢިއްޒު މިރޭ ވިދާޅުވެއްޖެއެވެ. ވެރިކަންކުރާ ޕީއެންސީން އައްޑުއަށް ކަނޑައަޅާފައިވާ މެނިފެސްޓޯ "ދަ ގްރޭޓާ އައްޑޫ" ލޯންޗުކުރުމަށް ހެންވޭރު އާޓިފިޝަލް ބީޗުގައި ބޭއްވި ރަސްމިއްޔާތުގައި ރައީސް ވަނީ، އައްޑުއަށް ދިމާވެފައިވާ އެންމެ ބޮޑު އެއް މައްސަލަ ކަމަށްވާ ކަރަންޓު ކެނޑުމުގެ މައްސަލަ ދިމާވާން ފެށީ އެތައް ދައުރެއް ކުރިން ކަން ފާހަގަކުރައްވައިފައެވެ. ރައީސް ވިދާޅުވީ، ކޮންމެ ސަރުކާރަކުންވެސް އައްޑޫގެ ކަރަންޓު މައްސަލަ ހައްލުކުރާ ވާހަކަ ދެއްކި ކަމަށާއި، ނަމަވެސް އަމަލީ ސިފައެއް އެކަމަށް ނާންނަ ކަމަށެވެ. "ކައުންސިލުގެ މެޖޯރިޓީ އޮތް، މަޖިލީހުގެ ސުޕަމެޖޯރިޓީ އޮތް، ފަސް އަހަރު ނިމުނީ، ހައްލެއްނުވޭ،" ކުރީގެ ރައީސް އިބްރާހީމް މުޙައްމަދު ޞާލިޙްގެ ސަރުކާރަށާއި މިހާރު އޮތް އައްޑޫ ކައުންސިލަށް އިޝާރާތްކުރައްވައި ރައީސް ވިދާޅުވިއެވެ. އެމަނިކުފާނު ވިދާޅުވީ، އައްޑޫގެ ކަރަންޓުގެ މައްސަލައަށް ދާއިމީ ހައްލެއް ގެނައުމަށް ބޭނުންވާ އެއްބަސްވުމުގައި މިއަދު ހަވީރުގެ ވަގުތެއްގައި ވާނީ ސަރުކާރުން ސޮއިކޮށްފައި ކަމަށެވެ. ނަމަވެސް އެ އެއްބަސްވުމުގެ މާ ބޮޑު ތަފުސީލެއް ހިއްސާނުކުރައްވައެވެ. "ސައްބީސް މެގަވޮޓްގެ ކަރަންޓު ފޯރުކޮށްދޭނެ ނިޒާމު އިރާދަކުރެއްވިއްޔާ މި އެއްބަސްވުމުގެ ދަށުން ގާއިމްކުރެވިގެން ދާނެ، މި އަންނަ އަހަރުގެ ޖުލައި މަހާ ހަމައަށް ދާއިރުގަ އިރާދަކުރެއްވިއްޔާ މުޅިން އެކުގަ މި މަޝްރޫއު ނިމި، ކުރިއަށް އޮތް 20 އަހަރު ދުވަހަށް އިރާދަކުރެއްވިއްޔާ އައްޑޫ ސިޓީގެ ކަރަންޓުގެ މައްސަލަ ހައްލުވެގެން ދާނެ މިކަމުގެ ސަބަބުން،" ރައީސް ވިދާޅުވިއެވެ. ސަރުކާރާ އިދިކޮޅު ކެންޑިޑޭޓުންނަށް ކައުންސިލުގެ އަޣުލަބިއްޔަތު ދީފިނަމަ، ބާރުތައް ބޭނުންކޮށްގެން ކުރާ ކުޑަ ކަމަކުން ތަރައްގީގެ މަޝްރޫއުތައް އެތައް މަހެއް ފަހަތަށް ޖެހޭނެ ކަމަށް ވިދާޅުވެ، އެމަނިކުފާނު އިލްތިމާސްކުރެއްވީ އައްޑޫ ކައުންސިލަށް ޕީއެންސީގެ ކެންޑިޑޭޓުން އިންތިޚާބުކޮށްދިނުމަށެވެ. އައްޑުއަށް ކުރިމަތިވެފައިވާ ކަރަންޓުގެ މައްސަލަ ހައްލުކުރުމަށް މިދިޔަ މާރިޗު މަހުގެ 13ވަނަ ދުވަހު އެ ސިޓީއަށް އެއް މެގަވޮޓުގެ ޖެނެރޭޓަރު ސެޓެއް ގެންދިޔައެވެ. އެއަށް ފަހު، ހަމަ އެ މަހުގެ 25ވަނަ ދުވަހު ވަނީ 1.8 މެގަވޮޓްގެ އިތުރު ޖަނަރޭޓަރެއް އެ ސިޓީއަށް ފޮނުވައިފައެވެ. އެ ޖަނަރޭޓަރު އޮޕަރޭޝަނަށް ގެނައީ މާރިޗު މަހުގެ 31ވަނަ ދުވަހުގައެވެ. ފެނަކައިންނާއި އައްޑޫ ސިޓީ ކައުންސިލުން ވެސް މީގެ ކުރިން ބުނި ގޮތުގައި އައްޑޫގެ ކަރަންޓުގެ މައްސަލަ ހައްލުކުރުމަށް ބޭނުންވަނީ 15 ކިލޯވޮޓްގެ ޖަނަރޭޓަރެވެ. ގިނަ ބަޔަކު ދެކޭ ގޮތުގައި އައްޑޫގެ ކަރަންޓު މައްސަލަ ހައްލުވާނީ އެ ސިޓީގައި އަލަށް ގާއިމުކުރާ އިންޖީނުގެ ނިމުމުންނެވެ. ނަމަވެސް، އެ ތަނުގެ މަސައްކަތް މި ސަރުކާރުން ޗައިނާގެ ކުންފުންޏަކާ ހަވާލުކޮށްފައިވީ ނަމަވެސް މަޝްރޫއުގެ އަމަލީ މަސައްކަތް ފަށާފައެއް ނުވެއެވެ.