60 އަހަރަށް ފަހު ފްރާންސްގައި އެގައުމުގެ ބޮޑު ވަޒީރުކަމުގެ މަގާމުގައި ހުންނެވި ބޭފުޅެއްގެ އިތުބާރު ނެތްކަމުގެ ވޯޓެއް ނަގައި މަގާމުން ދުރުކުރަން ފާސްކޮށްފިއެވެ.
ފްރާންސްގެ ބޮޑުވަޒީރު މިޝެލް ބަރނިއޭގެ ސަރުކާރުގެ އިތުބާރު ނެތްކަމުގެ ވޯޓެއް އެގައުމުގެ ނެޝަނަލް އެސެމްބްލީގައި ނަގާފައިވާއިރު، ފްރާންސްގެ 577 ގޮނޑީގެ ޕާލިމެންޓުގެ ދަށު މަޖިލީހުގައި 331 މެންބަރުން ވޯޓުދީފައިވަނީ 73 އަހަރުގެ ބަރނިއޭގެ މެދުމިނުގެ މައިނޯރިޓީ ސަރުކާރު މަގާމުން ދުރުކުރުމަށެވެ.
ފްރާންސްގެ ސަރުކާރާއި އިދިކޮޅު ޕާޓީތައް އެއްބައިވެ މި މޯޝަން ފާސްކުރީ ބަރނިއޭ ބާރުގެ ބޭނުންކޮށްގެން ބަޖެޓާއި ބެހޭ ކަންތައްތަކެއް ޕާލިމެންޓުގެ ވޯޓަކާ ނުލައި ފާސްކުރުމުންނެވެ.
Advertisement
ވޯޓަށްފަހު، ޕާލިމެންޓުގެ ސްޕީކަރު ޔާއެލް ބްރޯން-ޕިވެޓް ވަނީ ބަރނިއޭ މިހާރުން މިހާރަނަށް އިސްތިއުފާ ހުށަހަޅަންޖެހޭނެ ކަމަށް ރައީސް އެމެނުއެލް މެކްރޯންއަށް އަންގައި، ޖަލްސާ ނިންމާލާފައެވެ.
ޔޫރަޕިއަން ޔޫނިއަންގެ ކުރީގެ ބްރެގްޒިޓް ނެގޯޝިއޭޓަރ، ބަރނިއޭ އަކީ ރައީސް އެމެނުއެލް މެކްރޯން އަމިއްލަފުޅަށް މިއަހަރުގެ ސެޕްޓެމްބަރު މަހު ބޮޑުވަޒީރުކަމަށް އައްޔަންކުރެއްވި ފަރާތެކެވެ. އޭނާގެ ސަރުކާރަކީ 60 އަހަރަށްވުރެ ގިނަ މުއްދަތަކަށްފަހު ފްރާންސްގައި އިތުބާރު ނެތްކަމުގެ ވޯޓަކުން ވައްޓާލެވުނު ފުރަތަމަ ސަރުކާރެވެ.