ޒަވާޖީ ހަޔާތް ފަށައި ކުރިއަށް ދަމުން ގޮސް ވަކިހިސާބަކަށް ކަންކަން ދިއުމުން އިތުރަށް ކުރިއަށް ދިއުމާއިމެދު ގޮތް ނިންމަންޖެހޭ ޙާލަތަށް ކަންކަން ދެއެވެ. އެއީ ހަމަ ވަރަށް ގިނައިން ކުރިމަތިވާ ޙާލަތެކެވެ.  
މިޘާލަކަށް ބައިވެރިޔާގެ ކިބައިން ފާހަގަކުރެވޭ ނުރަނގަޅު ސިފަތައް އިޞްލާޙްކުރަން ބުނެ އެކަމަށް މުއްދަތުދެމުންގޮސް އެތައް ދުވަހެއް ފާއިތުވެގެންދާއިރުވެސް އަނެކާގެ ޢަމަލުތަކަށް އެއްވެސް ބަދަލެއް ނުގަންނަމައެވެ. އިޞްލާޙްކުރާނެ ކަމަށް ދުލުން ބުނި ނަމަވެސް ޢަމަލުން އެކަން ނުފެންނަ ނަމައެވެ. އަނިޔާވެރިވާނަމައެވެ. ބޭވަފާތެރިވާނަމައެވެ. މިފަދަ ކޮންމެ ކަމެކެވެ.  
ދެން ބައެއްފަހަރު ކުރިމަތިވާ މައްސަލައަކީ ކައިވެނި ރޫޅިއްޖެނަމަ އެކުވެރިން ކުރާނެ މަލާމާތަށް ލަދުން ކެތްތެރިވެގެން ހުންނަނީއެވެ. އެހެން ހުއްޓައި ދަރިން ލިބެނީއެވެ. 2،3 ކުދިންވެސް ލިބެނީއެވެ. އެއިރުވެސް މައްސަލަތައް އޮންނަނީ ހަމަ ކުރިޢާއި އެއްގޮތަކަށެވެ.  
އެންމެ ފަހުން ކެތްތެރިކަން ކޮޅުލައިގެން ކައިވެނި ރޫޅައިލަންބަލާއިރު މިއޮންނަނީ ހަތަރު އުދަރެސް ފެނުޖެހޭ ހިސާބުގައެވެ. އެންމެ ފަހުން ހަތަރު އުދަރެސް ފެނުޖެހުނަސް، ދިރިއުޅުން ޣަރަޤްވިޔަސް ހެޔޮކަމަށް ކައިވެނި ރޫޅައިލެވޭއިރު މިއޮންނަނީ ކުރަންޖެހޭ ހިތާމަ އިންތިހާއަށް ބޮޑުވެފައެވެ.  
ވީމާ އަބަދުވެސް ބުނާ ފަދައިން ފުރަތަމ މަސައްކަތްކުރަންވީ ނަޞޭޙްތަދީގެން، ވިސްނައިދީގެން ކަންކަން އިޞްލާޙްކުރުވޭތޯއެވެ. އެކަމަށް މަގެއް ނުފެނިއްޖެނަމަ، ޚާއްޞަކޮށް މަގެއް ފެންނާނެ ކަމުގެ އުންމިދު ގެއްލިއްޖެނަމަ ވަޤުތު ފާއިތުނުވަނީސް އަޅަންޖެހޭ ފިޔަވަޅު އަޅާށެވެ. އެކުވެރިން ނުވަތަ އެނޫންވެސް ބައަކު ކިޔައިފާނެ އެއްޗަކަށް ނުބަލާށެވެ. މުހިންމީ އެމީހުން ކިޔައިފާނެ އެއްޗެއް ނޫނެވެ. ތިމާގެ އަމިއްލަ ދިރިއުޅުމެވެ. އުފާވެރި ދިރިއުޅުމެއް ލިބުމެވެ.  
އިސްލާމް ދީނުގައި ވަރި ހުއްދަކުރައްވަވާފައިވަނީ މި ސަބަބަށްޓަކައެވެ. އެހެންކަމާއިއެކުވެސް އެކަން ކުރަންވާނީ ވިސްނަންޖެހޭ ހުރިހާ ކަމަކަށް ވިސްނުމަސްފަހުގައެވެ. ފަހުން ހިތާމަކުރަން ނުޖެހޭނެކަން ޔަޤީންކުރުމަށްފަހުގައެވެ. ޚާއްޞަކޮށް އިޝްތިޚާރާ ކުރުމަށްފަހުގައެވެ.
 
- އިސްލާމީ ތިލަފަތުގެ ދަރުސަކުން