ކޮންމެ މީހަކީވެސް ފާފަކުރެވޭނެ މީހެއް ފަދައިން ކޮންމެ މީހަކީވެސް ކުށް ކުރެވޭނެ މީހެކެވެ. ކައިވެނިކުރުމަށްފަހުގައިވެސް ކުށެއް ކުރެވިދާނެއެވެ. އަދި ބައިވަރު ކުށްތަކެއްވެސް ކުރެވިދާނެއެވެ. އެކަން ޢޭނާއަށް ވިސްނި އެކަންކަން އިޞްލާޙްކޮށްފިނަމަ އެމީހަކު ވާނީ ޖަވާހިރެއް ފަދަ ބައިވެރިއަކަށެވެ. އެފަދަ މީހަކާއި އެއްގޮތަކަށްވެސް ވަކިވެގެން ނުވާނެއެވެ.  
އެއީ ކީއްވެގެންކަންވެސް މިބުނެދެނީއެވެ. ﷲ ތަޢާލާގެ ޙަޟްރަތުގައި ދަރަޖަ އުފުލިގެންވަނީ ފާފަކުރެވުމުން ތައުބާވާ މީހުން ފަދައިން ދިރިއުޅުމުގައި ކުށްކުރެވުމުން އެކަން ޤަބޫލުކޮށް ޢަމަލު އިޞްލާޙްކުރީމާ ދިރިއުޅުމުގައި އެމީހެއްގެ ދަރަޖަވެސް އުފުލިގެންދާނެއެވެ.  
ވިސްނާށެވެ! މިއަދު ގިނައީ ކުށަށް އިޢްތިރާފްވެސް ނުވާ މީހުންނެވެ. ކުށް ނުކުރާ ކަމަށް ބުނެ ދޮގުހަދާ މީހުންނެވެ. ދެން އިތުރަށް ކުށެއް ނުކުރާނެ ކަމަށް ބުނެ ވަޢުވެފައި ވަޢުދު އުވާލާ މީހުންނެވެ. އެހެންކަމަށްވާއިރު ކުށެއް ކުރެވުމުން އެކަން ޤަބޫލުކޮށް ޢަމަލުތައް އިޞްލާޙްކުރާ މީހާއަށް ދޭންޖެހޭނެ މަތިވެރި ޤަދަރު އެއޮތީ ވަރަށް ރަނގަޅަށް އެނގޭށެވެ. އެމިހާ ވާނީ އަގުބޮޑު ޖަވާހިރަކަށް ނޫންހެއްޔެވެ؟  
ހިތާމައަކީ ދެމަފިރިންގެ ދިރިއުޅުމުގެ ކަންކަން އެނގޭ މީހުން، އެކުވެރިން، ގާތް މީހުން މިކަން މިގޮތަށް ނުވިސްނާކަމެވެ. ބައިވެރިޔާއަށް ކުރިން ކުރެވުނު ކުށް ތިބާއަށް ހަނދާންކޮށްދޭކަމެވެ. ޙަޤީޤަތުގައި އެކަންވާނީ ނިވިފައިވާ އަލިފާންގަނޑަކަށް އަލުން ޕެޓްރޯލްޖަހައި ރޯކުރުން ފަދަ ކަމަކަށެވެ. ތިބާއަށް އުފާވެރި ދިރިއުޅުމެއް ލިބެން އެދޭ މީހަކު އެފަދަ ކަންކަމެއް ނުކުރާނެއެވެ. 
އެކުވެރިންގެ ގޮތުގައި އެފަފަދަ މީހުން ނުގެންގުޅޭށެވެ! އެފަދަ ވާހަކަތައް ދައްކާ މީހުންނާއި ދިރިހެލި ނުވެވޭނަމަ، އެމީހުންގެ ވާހަކަތައް އަޑުއަހާނަމަ ބައިވެރިޔާގެ މައްޗަށް ނަފްރަތު އުފެދޭނެއެވެ. އުފާވެރި ދިރިއުޅުމެއް ނުލިބޭނެއެވެ.