މީޑިއާ ރެގިއުލޭޓްކުރުމުގެ ނަމުގައި ސަރުކާރުގެ ބާރު ފޯރުވޭ ކޮމިޝަނަކުން މީޑިއާތަކުގެ މައްސަލަތައް ބަލާ ގޮތަށް ރައްޔިތުންގެ މަޖިލީހަށް ހުށަހަޅާފައިވާ ބިލާ ގުޅޭ ގޮތުން ހުރިހާ ޕާޓީއެއްގެ ބައްދަލުވުމެއް ބޭނުންތެރި ކަމަށް ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
ވީކިހިނެއް؟ - މީޑިއާތަކާއި ވަކިވަކި ނޫސްވެރިންނާއި ސޯޝަލް މީޑިއާގައި ހިޔާލުފާޅުކޮށް ކޮންޓެންޓް ގެނެސްދޭ ވަކިވަކި ފަރުދުންނަށް ވެސް ހަރުކަށި ފިޔަވަޅުތަކެއް އެޅޭ ގޮތަށް އޮތް އެ ބިލު ބޭރުކުރުމަށް ނޫސްވެރިންނާއި ރާއްޖެއާއި ބޭރުގެ ޖަމިއްޔާތަކުން ގޮވާލަމުން ދަނިކޮށް ބިލު މަޖިލީހަށް ބަލައިގަނެ ބިލަށް ހިޔާލު ހޯދުމުގެ މަސައްކަތް ވަނީ ފަށައިފަ އެވެ.
ހިޔާލު ހޯދުމުގެ ގޮތުން މަޖިލީހަށް ހާޒިރުކުރަން ނިންމާފައިވަނީ:
ބްރޯޑްކާސްޓިން ކޮމިޝަން (ބްރޯޑްކޮމް)
މޯލްޑިވްސް މީޑިއާ ކައުންސިލް (އެމްއެމްސީ)
ޔޫތު މިނިސްޓްރީ
އެޓާނީ ޖެނެރަލް
މޯލްޑިވްސް ޖާނަލިސްޓްސް އެސޯސިއޭޝަން (އެމްޖޭއޭ)
ރާއްޖޭގައި ރަޖިސްޓްރީކޮށްފައިވާ މީޑިއާތައް
ބުނީ ކީކޭ؟ - ސިޔާސީ މަސައްކަތަށް ނުކުންނެވުމުގެ ކުރިން ނޫސްވެރިއެއްގެ ގޮތުގައި މަސައްކަތްކުރެއްވި ނަޝީދު ވިދާޅުވީ ނޫސްވެރިކަމުގެ މިނިވަންކަން އިންތިހާއަށް މުހިންމު ކަމަށާއި ނޫސްވެރިން ޒިންމާދާރުވުން ވެސް މުހިންމު ކަމަށެވެ.
"އަޅުގަނޑަށް ފެންނަ ގޮތުގައި މީޑިއާ ބިލާ ގުޅޭ ގޮތުން ހުރިހާ ސިޔާސީ ޕާޓީއެއްގެ ބައްދަލުވުމެއް ބޭނުންތެރި،" މަލްޓި ޕާޓީ ޑިމޮކްރެސީ ގެނައުމަށް ހިންގި އިސްލާހީ ހަރަކާތުގައި ވެސް މަސައްކަތްކުރައްވާފައިވާ ނަޝީދު ލިއުއްވި އެވެ.
ފާހަގަކޮށްލެވޭ - ނަޝީދު ކުރިން ވަނީ ލިޔުންތެރިއެއްގެ ހައިސިއްޔަތުންނާއި އެމްނެސްޓީ އިންޓަނޭޝަނަލްގެ ޕްރިޒަނާ އޮފް ކޮންސައިންސްގެ ހައިސިއްޔަތުން މިހާރު މަޖިލީހަށް ހުށަހަޅާފައިވާ ބިލު ތަސްދީގުނުކުރުމަށް ރައީސް މުހައްމަދު މުއިއްޒަށް ގޮވާލައްވައިފަ އެވެ.