މި އަހަރު ހައްޖުގެ މުގައްދަސް އަޅުކަން އަދާކުރުމަށް ރާއްޖެއިން ފުރާ ހައްޖުވެރިންގެ ފުރަތަމަ ގްރޫޕް މިއަދު ސައުދީ އަރަބިއްޔާއަށް ފުރައިފިއެވެ. މި ގްރޫޕްގައި ހިމެނޭ 238 ހައްޖާޖީން ފުރާފައިވަނީ މިއަދު ހަވީރު 15:34 ހާއިރު ސައުދީ އެއާލައިންގެ މަތިންދާ ބޯޓެއްގައެވެ.
އިސްލާމިކް މިނިސްޓްރީން ވިދާޅުވި ގޮތުގައި، މި މަތިންދާ ބޯޓު ސައުދީ އަރަބިއްޔާގެ އެއާޕޯޓަށް ޖައްސާނެ ކަމަށް ލަފާކުރެވެނީ ރާއްޖެ ގަޑިން މިރޭ 20:34 ހާއިރެވެ. މިއަހަރު ހައްޖުވެރިން އުފުލުމަށް ހަމަޖެހިފައިވަނީ ސައުދީ އެއާލައިންގެ އިތުރުން ގައުމީ އެއާލައިން، މޯލްޑިވިއަންގައެވެ.
މިއަދު ފުރި ހައްޖުވެރިންނަށް އަލްވަދާއު ކިޔުމަށާއި އެމީހުންނާ ބައްދަލުކުރެއްވުމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދާއި ސައުދީން ރާއްޖެއަށް ކަނޑައަޅުއްވާފައި ހުންނަވާ ސަފީރު ޔަހްޔާ ހަސަން އަލްގަހްތާނީ ވެލާނާ އިންޓަނޭޝަނަލް އެއާޕޯޓަށް ވަޑައިގެންނެވިއެވެ.
ހައްޖުވެރިން އެއާޕޯޓަށް ދިއުމަށް ލުއިފަސޭހަ ކޮށްދިނުމުގެ ގޮތުން ސަރުކާރުން ވަނީ ހާއްސަ އިންތިޒާމުތަކެއް ހަމަޖައްސާފައެވެ. އެގޮތުން މާލެ އާއި ހުޅުމާލެއިން ބަހުގައި އެއާޕޯޓަށް ދެވޭނެ އިންތިޒާމުތައް ވަނީ ފޯރުކޮށްދީފައެވެ. މިއީ ހައްޖުވެރިންގެ ދަތުރު ވީހާވެސް އޮމާންކަމާއެކު ކުރިއަށް ގެންދިއުމަށް އެޅި ފިޔަވަޅެކެވެ.
މިދިޔަ އަހަރެކޭ އެއްގޮތަށް މިއަހަރު ވެސް ދިވެހި ހައްޖުވެރިން ފުރަނީ "މައްކާ ރޫޓު އިނީޝިއޭޓިވް" ގެ ދަށުންނެވެ. މީގެ ސަބަބުން ސައުދީގެ އިމިގްރޭޝަންގެ ހުރިހާ މަރުހަލާއެއް ރާއްޖޭގައި ތިބެގެން ފުރިހަމަކުރުމުގެ ފުރުސަތު ހައްޖުވެރިންނަށް ލިބިގެންދެއެވެ. ރާއްޖެއަށް ކޮންމެ އަހަރަކު ވެސް ހައްޖަށް ދިއުމަށް ލިބެނީ 1،000 ޖާގައެވެ.
މިއަދު ފުރި ފުރަތަމަ ގްރޫޕަށްފަހު، ބާކީ ތިބި ހައްޖުވެރިން ފުރުމަށް ހަމަޖެހިފައިވަނީ ކުރިއަށް އޮތް އާދިއްތަ، ހޯމަ އަދި އަންގާރަ ދުވަހުއެވެ.