ނެށުމުގެ ހުނަރުން ބެލުންތެރިންގެ ލޯބި ހޯދުމަށްފަހު އެކްޓިންގް ދާއިރާއާ ގުޅިފައިވާ އިންޑިއާގެ ކުޅަދާނަ ނެށުންތެރިޔާ އަދި އެކްޓަރު ރާގަވް ޖުޔަލްގެ ކެރިއަރުގެ ފުރަތަމަ ތެލުގޫ ފިލްމުގައި ކުޅޭ ކެރެކްޓަ ދައްކާލައިފިއެވެ. ދެކުނު އިންޑިއާގެ ސިނަމާތަކަށް ރާގަވް ތައާރަފްވާ ފުރަތަމަ ފިލްމު "ދަ ޕެރެޑައިސް"ގައި ކުޅޭ ކެރެކްޓާ ތައާރަފުކުރުމަށްޓަކައި 40 ސިކުންތުގެ ކުރު ވީޑިއޯއެއް ވެސް ވަނީ އާންމުންނަށް ދައްކާލާފައެވެ. މި ވީޑިއޯއިން ފެންނަނީ އަލިފާނާއި، ވާރޭ އަދި ހަލަބޮލި މާހައުލެއްގެ ތެރެއިން ރާގަވްގެ ވަރުގަދަ އަދި ބިރުވެރި ސިފަތަކެކެވެ. އޭނާ މި ފިލްމުގައި ފެންނަނީ ކަރުގައި ބޮޑެތި ރަން ފަށްތަކެއް އަޅައިގެން، ވަރަށް ނުފޫޒުގަދަ ޝަހްސިއްޔަތެއްގެ ގޮތުގައި ބެލުންތެރިންނާ ކުރިމަތިލާ މަންޒަރެވެ. ފިލްމު "ކިލް"ގެ މަންޒަރެއްގައި ރާގަވް--ފޮޓޯ/މިޑްޑޭ މީގެ ކުރިން "ކިލް" އަދި "ޔުދްރާ" ފަދަ ފިލްމުތަކުން ރާގަވް ފެނުނީ ވިލެންއެއްގެ ރޯލްއިން ކަމަށްވިޔަސް ފިލްމު "ޕެރެޑައިސް"ގައި އޭނާ ކުޅޭ ވިލެންގެ ރޯލް ތަފާތުވެފައި މާ ވަރުގަދަވާނެ ކަމަށް ރިޕޯޓުތަކުން ބުނެއެވެ. ނެށުމުގެ ވައްޓަފާޅި ކަމަށްވާ "ސްލޯ މޯޝަން"އަށް ގެންނަ ބަދަލުތަކުން ބެލުންތެރިންގެ ބޮޑު ތަރުހީބެއް ލިބުނު ރާގަވް އަކީ ފިލްމު އިންޑަސްޓްރީއަށް މިފަހުން ތައާރަފްވި ޒުވާން އެކްޓަރުންގެތެރެއިން އެންމެ އުޖާލާ ކުރިމަގެއް އޮތް މަދު އެކްޓަރުންގެތެރޭ ހިމެނޭ ފަންނާނެއްގެ ގޮތުގައި ގިނަ ބަޔަކު ސިފަކުރެއެވެ. ރާގަވްގެ ކުރިއަށްހުރި ފިލްމުތަކުގެތެރޭ މި އަހަރުގެ ޑިސެމްބަރު މަހު ސިނަމާތަކަށް ގެންނަން ތާވަލުކޮށްފައި އޮތް ފިލްމު "ކިންގް" ވެސް ހިމެނެއެވެ. ދެކުނު އިންޑިއާގެ ކުޅަދާނަ އެކްޓަރު ނާނީ ލީޑް ރޯލްއިން ފެންނާނެ މި ފިލްމަކީ، މި އަހަރު ރިލީޒްކުރާ ސައުތު އިންޑިއާ ފިލްމުތަކުގެތެރެއިން ބެލުންތެރިން ދިގު އިންތިޒާރެއް ކުރަމުން އަންނަ ފިލްމެއްކަން ފާހަގަކޮށްލެވެއެވެ. ޑައިރެކްޓަރު ސްރީކާންތު އޮޑޭލާ އުފައްދާ މި ފިލްމަކީ، 2023 ވަނަ އަހަރު ރިލީޒްކުރި ކާމިޔާބު ފިލްމު "ދަސަރާ" އަށް ފަހު އޭނާ އާއި ނާނީ އެކުގައި މަސައްކަތްކުރާ ދެވަނަ ފިލްމެވެ. އެސްއެލްވީ ސިނަމާސްއިން އުފައްދާ "ދަ ޕެރަޑައިސް" ސިނަމާތަކަށް އަންނާނީ މި އަހަރުގެ އޯގަސްޓް މަހުގެ 21 ވަނަ ދުވަހުއެވެ. މި ފިލްމު ޖުމްލަ 8 ބަހަކުން ރިލީޒްކުރުމަށް ވަނީ ހަމަޖެހިފައެވެ. އެއީ ތެލުގޫ، ހިންދީ، ތަމަޅަ، ކަންނަޑާ، މަލަޔާލަމް، ބެންގާލީ، އިނގިރޭސި އަދި ސްޕެނިޝް ބަހުންނެވެ.