އެމެރިކާ އާއި ނައިޖީރިއާގެ ސިފައިން ގުޅިގެން ހިންގި ހާއްސަ އޮޕަރޭޝަނެއްގައި، މުޅި ދުނިޔޭގައި ހަރަކާތްތެރިވާ އިސްލާމިކް ސްޓޭޓް (އައިއެސް) ޖަމާއަތުގެ ދެވަނައަށް އެންމެ އިސްވެރިޔާ އަބޫ ބިލާލް އަލް-މިނޫކީ މަރާލާފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ރޭ އިއުލާން ކުރައްވައިފި އެވެ.
ޓްރޫތު ސޯޝަލްގައި ކުރެއްވި ޕޯސްޓެއްގައި ޓްރަމްޕް ވިދާޅުވީ، މި އޮޕަރޭޝަނަކީ އޭނާގެ ސީދާ އިރުޝާދުގެ ދަށުން ހިންގުނު އޮޕަރޭޝަނެއް ކަމަށެވެ. އަދި މިއީ ދުނިޔޭގައި އެންމެ ނުރައްކާތެރިކޮށް ހަރަކާތްތެރިވާ ޓެރަރިސްޓް ހަނގުރާމައިގެ މައިދާނުން ނައްތާލުމަށްޓަކައި، ވަރަށް ފުރިހަމައަށް ރޭވިގެން ހިންގި އުނދަގޫ މިޝަނެއްކަން ވެސް އޭނާ ފާހަގަކުރެއްވި އެވެ.
ނައިޖީރިއާގެ ރައްޔިތެއް ކަމަށްވާ އަލް-މިނޫކީއާ ބެހޭ ގޮތުން ވާހަކަ ދައްކަވަމުން ޓްރަމްޕް ވިދާޅުވީ، އެފްރިކާ ބައްރުގައި އޭނާއަށް ފިލައިގެން އުޅެވޭނެ ކަމަށް ހީކުރި ނަމަވެސް، އޭނާގެ ހަރަކާތްތައް ވަރަށް ގާތުން ބަލަމުންދިޔަ މަސްދަރުތައް އެމެރިކާއަށް ލިބިފައިވާ ކަމަށެވެ. ނަމަވެސް، މި އޮޕަރޭޝަން ހިންގި ސީދާ ތަނެއް އޭނާ ހާމަކުރައްވާފައެއް ނުވެ އެވެ.
އަލް-މިނޫކީއަކީ 2023 ވަނަ އަހަރު އެމެރިކާ ސަރުކާރުން 'ހާއްސަ ބައިނަލްއަގުވާމީ ޓެރަރިސްޓެއް'ގެ ގޮތުގައި ކަނޑައަޅާފައިވާ މީހެކެވެ. މީގެ އިތުރުން، މި އޮޕަރޭޝަން ކާމިޔާބު ކުރުމުގައި ނައިޖީރިއާ ސަރުކާރުން ދިން އެއްބާރުލުމަށްޓަކައި ޓްރަމްޕް ވަނީ އެ ގައުމަށް ޝުކުރު އަދާކުރައްވާފަ އެވެ.
ފަހަކަށް އައިސް އެމެރިކާއިން ވަނީ ނައިޖީރިއާއަށް ދޭ ސަލާމަތީ އެހީތެރިކަން ވަރަށް ބޮޑަށް އިތުރުކޮށްފަ އެވެ. މީގެ ތެރޭގައި ޑްރޯން ބޭނުންކުރުމާއި ހުޅަނގު އެފްރިކާގައި ހަރަކާތްތެރިވާ އައިއެސް އަދި އަލް-ގައިދާއާ ގުޅުންހުރި ހަނގުރާމަވެރި ޖަމާއަތްތަކާ ދެކޮޅަށް މަސައްކަތް ކުރުމަށްޓަކައި، ތަމްރީނާއި ޖާސޫސީ މައުލޫމާތު ފޯރުކޮށްދިނުމަށް 200އެއްހާ ސިފައިން އެ ސަރަހައްދަށް ފޮނުވުން ހިމެނެ އެވެ. ނައިޖީރިއާގެ އޮފިޝަލުން ކުރިން ވިދާޅުވެފައިވަނީ އެމެރިކާގެ ސިފައިން އެ ގައުމުގައި ހަރަކާތްތެރިވަނީ ސީދާ ހަނގުރާމައިގައި ބައިވެރިނުވާ ގޮތަށް ކަމަށެވެ.