މި އަހަރުގެ ރިޔާސީ އިންތިހާބުގައި ވާދަކުރައްވާ ޑީއާރްޕީގެ ރިޔާސީ ކެންޑިޑޭޓް މައުމޫން އަބްދުލް ގައްޔޫމް ކެމްޕޭން ކުރެއްވުމަށް ފުވައްމުލަކަށް، ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހީމް ކެމްޕޭން ކުރެއްވުމަށް ބުރާސްފަތި ދުވަހު އައްޑު އަށް ވަޑައިގެންފި އެވެ.
ކެމްޕޭން ކުރެއްވުމަށް ގާސިމް އައްޑު އަތޮޅަށް ވަޑައިގަތުމުން އޭނާ އަށް މަރުހަބާ ދެންނެވުމަށް އޭނާ އަށް ސަޕޯޓްކުރާ ގިނަ އަދަދެއްގެ ބަޔަކު ގަމުގެ ބައިނަލްއަގްވާމީ ވައިގެ ބަނދަރަށް ޖަމާވެފައިވެ އެވެ. އައްޑު އަށް ވަޑައިގެން ޖުމްހޫރީ ޕާޓީގެ ވަފުދު ހިތަދޫގައި ހުޅުވައިފައިވާ އެޕާޓީގެ އޮފީހަށް ޒިޔާރަތްކޮށްފައިވެ އެވެ. އަދި އެޕާޓީގެ ފަރާތުން ސަޕޯޓަރުންނަށް އިސްލާމިއްޔާ ސްކޫލުގައި ބުރާސްފަތި ދުވަހު ރޯދަ ވީއްލުމެއް ދިނުމަށް ވަނީ ހަމަޖައްސައިފަ އެވެ. މީގެއިތުރުން ބުރާސްފަތި ދުވަހުގެ ރޭ އެޕާޓީގެ އާންމު ޖަލްސާ އެއް ހިތަދޫ ސްކޫލުގައި ބޭއްވުމަށް ވެސް ވަނީ ހަމަޖައްސައިފައި ކަމަށް ގާސިމްގެ ކެމްޕޭން އޮފީހުން ބުންޏެވެ.
ކެމްޕޭން ކުރެއްވުމަށް މައުމޫން ފުވައްމުލަކަށް ވަޑައިގަތުމަށް ބުރާސްފަތި ދުވަހު ގަމަށް ވަޑައިގަތުމުން، އެމަނިކުފާނަށް ތާއީދުކުރާ ގިނަ ބަޔަކު މަރުހަބާ ދެންވުމަށް އެއާޕޯޓަށް ހާޒިރުވެފައިވެ އެވެ. ފުވައްމުލަކުގައި ކެމްޕޭން ކުރެއްވުމަށް މައުމޫން އައްޑު އަށް ވަޑައިގެން މިއަތޮޅުގެ ރަށްރަށުގައި ވެސް ކެމްޕޭން ކުރައްވާ ގޮތަށް ވަނީ ހަމަޖެހިފަ އެވެ.