ރައްޔިތުންގެ މަޖިލީހުގެ ކަނޑިތީމު ދާއިރާގެ މެމްބަރު މުހައްމަދު ހުސެން ޖުމްހޫރީ ޕާޓީ (ޖޭޕީ) އަށް މިއަދު ސޮއިކުރައްވައިފި އެވެ. ޖޭޕީގެ ކުނޫޒް ޖަގަހައިގައި މެންދުރުފަހު ބޭއްވި ރަސްމިއްޔާތެއްގައި މުހައްމަދު ހުސެންގެ ފޯމާ ހަވާލުވެވަޑައިގަތީ ޖޭޕީގެ ލީޑަރު ގާސިމް އިބްރާހިމް އެވެ. މި ރަސްމިއްޔާތުގައި ގާސިމް ވިދާޅުވީ މުހައްމަދު ހުސެނަކީ ވަރަށް ސާބިތުކަމާ އެކީގައި މަޖިލީހުގައި މަސައްކަތްކުރައްވަމުން ގެންދަވާ ބޭފުޅެއް ކަމަށެވެ. އެހެންކަމުން، މުހައްމަދު ހުސެން ޖޭޕީއާ ގުޅިވަޑައިގަތުމަކީ އެ ޕާޓީ އަށް ލިބުނު ވަރަށް ބޮޑު ކާމިޔާބީއެއް އަދި ޝަރަފެއް ކަމަށް އޭނާ ވިދާޅުވި އެވެ. "ޖުމްހޫރީ ޕާޓީ އަށް އަދި މި ކޯލިޝަނަށް ރައްޔިތުންގެ ފުރިހަމަ ތާއީދު ލިބޭނެ ކަމަށް، ކަނޑިތީމު ދާއިރާ އިން ވެސް އަދި މުޅި ރާއްޖޭން ވެސް ވަރަށް ތަނަވަސް އަޣުލަބިއްޔަތެއް އަޅުގަނޑުމެންނަށް ލިބިގެންދާނެ ކަން އަޅުގަނޑު ޝައްކެއް ނުކުރަން،" ގާސިމް ވިދާޅުވި އެވެ. މާޗު 22ގައި ބާއްވާ މަޖިލިސް އިންތިޚާބުގައި ކަނޑިތީމު ދާއިރާ އަށް ވާދަކުރެއްވުމަށް ޖޭޕީގެ ޓިކެޓް ކުރިން ލިބިވަޑައިގެންފައިވާ މުހައްމަދު ހުސެން ވަނީ މިދިޔަ އަހަރުގެ އޭޕްރީލް މަހު ޑީއާރުޕީން ވަކިވެވަޑައިގެންފަ އެވެ. އޭގެ ފަހުން މިހާތަނަށް ހުންނެވީ ޕާޓީއަކާ ނުގުޅި އެވެ. މަޖިލީހުގައި އެންމެ ގިނަ ދުވަސްވީ މެމްބަރުންގެ ތެރޭގައި މުހައްމަދު ހުސެން ހިމެނިވަޑައިގަންނަވަ އެވެ. އެގޮތުން، އޭނާ އަކީ މަޖިލީހުގެ ރިޔާސަތު ވެސް ބަލަހައްޓަވާ މެމްބަރެކެވެ.