ވ.އަތޮޅު އަނބަރާ ނަމަކަށް ކިޔާ ފަޅު ރަށެއްގައި މަސްތުވާތަކެތި ބޭނުންކޮށްގެން ޕާޓީކުރަމުން ދަނިކޮށް ފުލުހުން ހިންގި އޮޕަރޭޝަނާއި ގުޅޭ މައުލޫމާތު މިއަދު ހަވީރު ހާމަކުރާނެ ކަމަށް ފުލުހުން ބުނެފި އެވެ.
ފުލުހުންގެ މީޑިއާ އޮފިޝަލަކު ވިދާޅުވީ އަންބަރާގައި ފުލުހުން ހުކުރު ދުވަހުގެރޭ ހިންގި އޮޕަރޭޝަނާއި ގުޅޭ ނޫސްވެރިންގެ ބައްދަލުވުމެއް މިއަދު ހަވީރު 4 ޖަހާއިރު އިސްކަންދަރު ކޮށީގައި ބޭއްވުމަށް ހަމަޖެހިފައިވާ ކަމަށެވެ.
މި ނޫސްވެރިންގެ ބައްދަލުވުމުގައި ބައިވެރިވުމަށް ރާއްޖޭގެ ހުރިހާ މީޑިއާތަކަށް މިހާރު ވަނީ ދައުވަތު އަރުވާފައެވެ.
އަންބަރާގައި ޕާޓީ ކުރަމުންދަނިކޮށް 198 މީހަކު ފުލުހުންގެ ބެލުމުގެ ދަށަށް ގެނެސް ބަލައި ފާސްކުރުމަށްފަހު ހައްޔަރުކޮށްފައިވަނީ 79 މީހެކެވެ. . އެމީހުން ހައްޔަރު ކުރިއިރު ބައެއް އަންހެނުން ބަރަހަނާ ހާލުގައި ވެސް ތިބި ކަމަށް މައުލޫމާތު ލިބިފައި ވެއެވެ. އަދި ހައްޔަރުކުރި މީހުންގެ ތެރޭގައި 18 އަހަރުން ދަށުގެ އަންހެން ކުއްޖަކާއި ބިދޭސީ ފިރިހެނެއް ހިމެނެ އެވެ.
މިހުރިހާ އެންމެންގެ ބަންދާއި މެދު ގޮތެއް ނިންމުމަށް ރޭ ކްރިމިނަލް ކޯޓަށް ކުޑަ އަންހެން ކުއްޖާ ފިޔަވައި ހުރިހާ އެންމެން ހާޒިރުކުރުމުން ކޯޓުން ވަނީ އެމީހުންގެ ބަންދަށް 10 ދުވަސް ޖަހާފައެވެ. އަދި އަންހެން ކުއްޖާ ޖުވެނައިލް ކޯޓަށް ހާޒިރުކުރުމުން އެކުއްޖާ ފަސް ދުވަސް ގޭބަންދުކުރަން ވަނީ އަމުރުކޮށްފައެވެ.
އެމްވީޔޫތައް މައުލޫމާތު ލިބިފައިވާ ގޮތުގައި ހައްޔަރުކުރި ގިނަ މީހުން ތިބީ މަސްތުވުމަށް ބޭނުންކުރާ “ބޭސް ގުޅައެއް” ކައިގެން މަސްތުވެގެންނެވެ. އަދި ބައެއް މީހުން ތިބީ “ތެޔޮ ބިޑި” ބޮއެގެން ކަމަށް ވެސް މައުލޫމާތު ލިބިފައި ވެއެވެ.
އަންބަރާގައި ޕާޓީ ކޮށްފައި ވަނީ ކޮންތަނެއްގައި ބާއްވާ ޑީޖޭ އެއްކަން ނޭންގޭ ގޮތައް ސޯޝަލް މީޑިއާގައި އިސްތިހާރު ވެސް ކޮށްގެންނެވެ. ސޯޝަލް މީޑިއާގައި އާންމުކޮށްފައިވާ އިސްތިހާރެއްގައި ބުނެފައިވާ ގޮތުން އެއިވެންޓްގެ ޓިކެޓް ވިއްކާފައި ވަނީ 1500 ރުފިޔާ އަށާއި 2000 ރުފިޔާ އަށެވެ. އަދި މިހަރަކާތް ފަށާގޮތައް ހަމަޖެހިފައި އޮތީ މިމަހުގެ 17 ވަނަ ދުވަހުގެ ރޭ ކަމަށާއި ނިންމާ ގޮތައް ހަމަޖެހިފައި ވަނީ 19 ވަނަ ދުވަހުގެ ރޭ ކަމަށް އެ އިސްތިހާރުގައި ބުނެފައި ވެއެވެ.
ޓްއަރިޒަމް މިނިސްޓްރީ އިން ބުނީ އަންބަރާ އަކީ 2004 ވަނަ އަހަރު “ޑްރީމް އޯޝަން” ކިޔާ ކުންފުންޏަކަށް ކުއްޔަށް ދޫކޮށްފައިވާ ރަށެއް ކަމަށެވެ.