ލ. ގަމުގެ ތުނޑި އަވަށާއި އަލަށް އާބާދުވާ ސަރަހައްދު ގުޅާލައިގެން އެއް ސްޓޭޝަނެއް މެދުވެރިކޮށް އެ ދެ ސަރަހައްދަށް ކަރަންޓުގެ ޚިދުމަތްދޭން ފަށައިފި އެވެ.
މިދިޔަ އާދީއްތަ ދުވަހު ގަމުގެ ތުނޑި އަވަށާއި އަލަށް އާބާދުވާ ސަރަހައްދު ގުޅާލައިގެން ކަރަންޓު ދިނުމުގެ ހިދުމަތް ފައްޓަވައި ދެއްވީ ހޯމް މިނިސްޓްރީގެ ސްޓޭޓް މިނިސްޓަރު އަދި ގަމު ދާއިރާގެ ކުރީގެ މަޖިލިސް މެންބަރު ޔޫސުފް އަބްދުލް ގަފޫރު އެވެ.
ފެނަކަ ކޯޕަރޭޝަންގެ މެނޭޖިން ޑިރެކްޓަރު މުހައްމަދު ނިމާލް ވިދާޅުވީ އެ ދެ ސަރަހައްދު ގުޅާލައިގެން ކަރަންޓުގެ ޚިދުމަތްދޭން ފެށީ އެ ދެ އަވަށަށް ދިމާވެފައިވާ ކަރަންޓްގެ މައްސަލަ ހައްލުކުރުމަށް ކަމަށެވެ.
އެ ދެ ސަރަހައްދަށް ކަރަންޓް ދިނުމަށް މިހާރު ގާއިމްކޮށްފައިވާ ސްޓޭޝަންގައި 800 ކިލޯ ވޯޓުގެ ޖަނަރޭޓަރެއް ހުންނާނެ ކަމަށް ވެސް ނިމާލް ވިދާޅުވި އެވެ. އަދި ޖަނަރޭޓަރަށް މައްސަލައެއް ދިމާވެއްޖެ ނަމަ "ބެކްއަޕް"ގެ ގޮތުގައި ބޭނުންކުރާނެ ސިސްޓަމެއް ތުނޑީ އަވަށުގައި މިހާރު ގާއިމްކޮށްފައިވާނެ ކަމަށް ވެސް ނިމާލް ވިދާޅުވި އެވެ.
އަތޮޅުތެރޭގެ ރަށްތަކަށް ދިމާވެފައިވާ ކަރަންޓުގެ މައްސަލައަށް ހައްލު ގެނައުމަށް ރާއްޖެ އަށް ގެންނަށް ނިންމާފައިވާ 77 ޖަނަރޭޓަރު މިހާރު ހުރީ މާލޭ ކަސްޓަމްސް ބަނދަރުގައި ކަމަށާއި އެ ޖަނަރޭޓަރުތަށް ވަރަށް އަވަހަށް އަތޮޅުތެރޭގެ ރަށްތަކަށް ފޮނުވާނެ ކަމަށް ވެސް ނިމާލް ވިދާޅުވި އެވެ.