ދިރާގު ދިވެހި ލީގަށް ކޮލިފައިވުމަށް ކުޅޭ ކޮލިފިކޭޝަންގައި މިއަދު ހަވީރު ޔުނައިޓެޑް ވިކްޓްރީ އާއި ބީޖީ ބައްދަލުކުރި މެޗު 0-5 ގެ ނަތީޖާއަކުން ބީޖީން ކާމިޔާބުކޮށްފިއެވެ.
މި މޮޅާއެކު ބީޖީ އަށް ވަނީ ކުޅުނު 2 މެޗުން ވެސް 6 ޕޮއިންޓް ލިބިފައެވެ. ކޮލިފިކޭޝަންގައި މާދަމާ ކުޅޭ މެޗުން އޭވައިއެލް މޮޅުވެއްޖެނަމަ އަންނަ އަހަރުގެ ދިރާގު ދިވެހި ލީގަށް ބީޖީ ކޮލިފައިވާނެއެވެ. ކުޅުނު ދެ މެޗުން ވެސް ބަލިވެ ދިރާގު ދިވެހި ލީގަށް ކޮލިފައިވުމުގެ މަގު މިހާރު ޔުނައިޓެޑް ވިކްޓްރީއަށް ވަނީ ބަންދުވެފައެވެ.
މިއަދުގެ މެޗުގެ ފުރަތަމަ ހާފްގައި މޮޅު ކުޅުމެއް ދެއްކި ބީޖީއަށް ވަނީ މެޗުގެ 23 ވަނަ މިނެޓްގައި ޕެނަލްޓީއެއް ލިބިގެން ގޮސްފައެވެ. ނަމަވެސް މި ޕެނަލްޓީ ދިޔައީ ގޯލުގެ ހުރަސް ދަނޑިމަތިން ބޭރަށެވެ.
ނަމަވެސް އޭގެ 3 މިނެޓްފަހުން ބީޖީން ވަނީ މެޗުގެ ފުރަތަމަ ގޯލްޖަހާ ލީޑުނަގާފަ އެވެ. އާދަމް ފަޒީހް (ފަޒިއްކޮ) ނަގައިދިން ހުރަހަކުން މި ގޯލް ކާމިޔާބުކޮށްދިނީ ނާވީ މުހައްމަދެވެ. އަދި އޭގެ 3 މިނެޓްފަހުން ބީޖީގެ ބޭރު ކުޅުންތެރިޔާ ކުދުސް ކެލާނީ ވަނީ ގޯލެއް ކާމިޔާބުކޮށްދީފައެވެ.
އަދި މެޗުގެ 33 ވަނަ މިނެޓްގައި ހަމްދާން ދިން ބޯޅައަކުން ބީޖީގެ ތިންވަނަ ގޯލް ކާމިޔާބުކޮށްދިނީ އެޓީމުގެ ފުރަތަމަ ގޯލްވެސް ކާމިޔާބުކޮށްދިން ނާވީއެވެ. މި 3 ގޯލަށްފަހު ވެސް ފުރަތަމަ ހާފްގައި ބީޖީއަށް ވަނީ ގޯލްޖަހާނެ ގިނަ ފުރުސަތުތަކެއް ލިބި ބޭކާރުވެފައެވެ.
މެޗުގެ ދެވަނަ ހާފް ފެށިގެން މާގިނަ އިރުތަކެއް ނުވެ ބީޖީގެ އަޖުވަދަށް ވަނީ ގޯލްޖަހާނެ ރަނގަޅު ފުރުސަތެއް ލިބިގެން ގޮސްފައެވެ. ނަމަވެސް އޭނާ ކުރިއަށް ފޮނުވާލި ބޯޅަ ދިޔައީ ގޯލުގެ ހުރަސް ދަނޑިއަށެވެ.
ދެވަނަ ހާފްގައި ޔުނައިޓެޑް ވިކްޓްރީން ވެސް ބީޖީގެ ގޯލަށް ނުރައްކާ ކުރަން މަސައްކަތް ކޮށްފައިވީ ނަމަވެސް އެޓީމަށް ވަނީ ގޯލެއް ކާމިޔާބުކުރެވޭ ގޮތް ނުވެފައެވެ.
މެޗުގެ 74 ވަނަ މިނެޓްގައި ބީޖީން ވަނީ އެޓީމުގެ ހަތަރުވަނަ ގޯލް ކާމިޔާބުކޮށްދީފައެވެ. މި ގޯލް ކާމިޔާބުކޮށްދިނީ އެޓީމުގެ ބޭރު ކުޅުންތެރިޔާ ކެލާނީއެވެ. އަދި އެޓީމުގެ ފަހު ގޯލް މެޗުގެ 82 ވަނަ މިނެޓްގައި ކާމިޔާބުކޮށްދިނީ އަޓާޕާ ކަޒީމްއެވެ.
ކޮލިފިކޭޝަންގައި މާދަމާ ހަވީރު ކުޅޭ މެޗުގައި ބައްދަލުކުރާނީ އޭވައިއެލް އާއި ޓީސީ ސްޕޯޓްސްއެވެ.
ކޮލިފިކޭޝަންގައި ޖުމްލަ 4 ޓީމު ވާދަކުރާއިރު ދިރާގު ދިވެހި ލީގަށް ކޮލިފައިވާނީ ކޮންމެ ޓީމެއް ކޮންމެ ޓީމަކާ ކުޅެ އެންމެ ގިނަ ޕޮއިންޓް ހޯދާ ދެ ޓީމެވެ.