ލަންޑަން (މާޗް 6) - އިނގިރޭސި ޕްރިމިއާ ލީގުގެ އެއް ވަނައިގައި އޮތް އާސެނަލުން މެޗުތަކުގައި ވަގުތު ލަސްކުރަން ކުރާ މަސައްކަތްތަކަކީ ފުޓްބޯޅައިގައި އެ މިންވަރަށް ފުރުސަތު ދެވިގެންވާނެ ކަމެއް ނޫން ކަމަށާއި ޕްރިމިއާ ލީގުން އެކަން ހުއްޓުވަން އަމަލުކުރަން ޖެހޭ ކަމަށް ބްރައިޓަން ކޯޗު ފަބިއަން ހާޒެލާ ބުނެފި އެވެ.
ބްރައިޓަން ދަނޑުގައި އާސެނަލުން 1-0 އިން މޮޅުވިއިރު، މެޗުގައި އާސެނަލުން ލަނޑު ޖެހީ ނުވަ ވަނަ މިނިޓްގަ އެވެ. ސްޓެޓިސްޓިކްސް ދައްކާގޮތުން، މި މެޗުގެ ތެރެއިން، ތިރީހަކަށް މިނިޓާ ގާތްކުރާ މުއްދަތަކަށް މެޗު ތެރެއިން ވަގުތު ގެއްލިފައިވެ އެވެ.
އެ މެޗަށް ފަހު، ހާޒެލާ، 33، ބުނެފައިވަނީ، ދަނޑުމަތިން ފެނުނީ ފުޓްބޯޅަ ކުޅެން އުޅުނު އެއް ޓީމު ކަމަށާއި ބަލިވިޔަސް އެ ޓީމަކީ ބްރައިޓަން ކަމަށްވާތީވެ، ހިތްހަމަޖެހޭ ކަމަށެވެ. ހާޒެލާ ބުނީ، ކޯޗެއްގެ ގޮތުގައި މަސައްކަތްކުރާއިރު، އޭނާ ބޭނުންވަނީ ކުޅުންތެރިން ޑިވެލޮޕްކުރުމަށް ކަމަށާއި މެޗުގެ ފުރިހަަމަކަން ގެއްލޭފަދަ ވަގުތު ބޭކާރުކުރަން ހިތްވަރުދޭ ކޯޗަކަށް އޭނާ ނުވާނެ ކަމަށެވެ.
"އަހަންނަށް އެނގޭ ކޮންމެ ޓީމެއް ވެސް މެޗު މެނޭޖްކޮށްފައި ވަގުތު ދުއްވަން މަސައްކަތް ކުރާނެ. އެކަމަކު، އެ ކަމުގައި ވެސް ހައްދެއް އޮންނަންވާނެ. އެއީ ކިހާ މިންވަރެއްތޯ ކަނޑައަޅަން ޖެހޭނީ ޕްރިމިއާ ލީގުން، މި ފަދަ ގޮތަކަށް މިކަން ވިޔަނުދީ ހުއްޓުވަން ޖެހޭ،" ހާޒެލާ ހިތްހަަމަނުޖެހިފައި ހުރެ ބުންޏެވެ.
އިނގިރޭސި ޕްރިމިއާ ލީގުގައި ކޯޗުކޮށްދޭ އެންމެ ޒުވާން ކޯޗުގެ މަގާމު 31 އަހަރުގައި ހޯދި، ހާޒެލާ ބުނީ، ކަނޑައެޅިފައި އޮތް ގޮތެއް ރެފްރީންގެ މެދުގައި ވެސް ނިންމާފައި އޮންނަން ޖެހޭނެ ކަމަށާއި މިހާރު ފެންނަން އޮތީ ބަޔަކު ބޭނުންހާ ގޮތަކަށް މެޗުގެ ތެރެއިން ވަގުތުނަގާލެވޭ ގޮތަށް ކަަމަށެވެ.
ބްރައިޓަން އާއި އާސެނަލް މެޗު ކުރިއަށްދިޔައިރު، އާޓެޓާ އާއި ހާޒެލާއާ ދެމެދުގައި ބަހުގެ ހަމަލާތަކެއް ބަދަލުކުރިތަން ވަނީ ކެމެރާތަަކަށް އަރައިފަ އެވެ.
ހާޒެލާގެ ވާހަކަތަކާ ގުޅޭގޮތުން، އާޓެޓާއާ ސުވާލުކުރުމުން، ސީދާ ޖަވާބެއް ދިނުމުގެ ބަދަލުގައި އާސެނަލް ކުޅުންތެރިން ކުރާ މަސައްކަތަށް ތައުރީފުކުރާ ކަމަށާއި ޓީމުގެ ކުޅުންތެރިންނާ މެދު ފަހުރުވެރިވާ ކަމަށް ވަނީ ބުނެފަ އެވެ.