ވެރިރަށް މާލޭގައި ދުއްވާފަ ދިޔަ, ސައިކަލެއްގައި ގަސްތުގައި ޕިކަޕަކުން ޖެއްސި ކަމަށް ތުހުމަތު ކުރެވޭ މައްސަލައެއްގައި ދުވަސްވީ މީހަކު ހައްޔަރުކޮށްފިއެވެ. ސައިކަލެއްގައި ގަސްތުގައި ޕިކަޕަކުން ޖެއްސި ކަމަށް ބުނާ މައްސަލައާ ގުޅިގެން މިދިޔަ ބުދަ ދުވަހު ހައްޔަރުކޮށްފައިވަނީ، ގއ. ވިލިނގިއްޔަށް ނިސްބަތްވާ އުމުރުން 60 އަހަރުގެ މީހެކެވެ. އޭނާ ހައްޔަރުކޮށް, ބަންދުގެ މުއްދަތު ޖެހުމަށް އިއްޔެ ކޯޓަށް ހާޒިރުކުރުމުން އޭނާގެ ބަންދަށް ކޯޓުންވަނީ ފަސް ދުވަސް ޖަހައިފައެވެ. އޭނާގެ ބަންދު އަމުރުގައިވާ ގޮތުން އޭނާގެ ބަންދު މުއްދަތު ނިމޭނީ މި މަހުގެ 10 ވަނަ ދުވަހުއެވެ. އޭނާގެ މައްޗަށް ފުލުހުން ކުރާ ތުހުމަތަކީ، ނުރައްކާތެރިކޮށް ދުއްވައިގެން އެއްގަމު އުޅަނދު އެކްސިޑެންޓްވުމުގެ ތުހުމަތެވެ. އޭނާގެ ބަންދު އަމުރުގައިވާ ގޮތުން އޭނާވަނީ އޭނާ ދުއްވަމުން ދިޔަ ޕިކަޕް ކުއްލިއަކަށް ސައިކަލް ލޭނާ ދިމާލަށް ދުއްވައި، ސައިކަލެއްގައި ގަސްތުގައި ޖައްސައިފައެވެ. އެކަމުގެ ސަބަބުން ސައިކަލު ދުއްވަން އިން މީހާއަށް އަނިޔާވެފައިވާ ކަމަށް އައިއޯއާ ހަވާލާދީ ބަންދު އަމުރުގައި ބުނެފައިވެއެވެ. ނުރައްކާތެރިކޮށް އެއްގަމު އުޅަނދު ދުއްވުމަކީ ދިވެހިރާއްޖޭގެ ޤާނޫނުތަކުގެ ދަށުން މަނާކޮށްފައިވާ އަދި ބޮޑެތި އަދަބުތައް ކަނޑައެޅިފައިވާ ކަމެކެވެ. އެއްގަމު ދަތުރުފަތުރުގެ ޤާނޫނުގެ 62 ވަނަ މާއްދާގައި ބަޔާންކުރަނީ އެއްވެސް މީހަކު އެއްގަމު އުޅަނދެއް ދުއްވަންވާނީ، މަގުމަތީގެ ސަލާމަތަށް ބަލައިގެން، އެހެން މީހުންނަށް ނުރައްކާ ނުވާނެ ގޮތެއްގެ މަތިން ކަމަށެވެ. މީހެއްގެ ފުރާނައަށް ނުވަތަ މުދަލަކަށް ނުރައްކާވެދާނެ ފަދަ ގޮތަކަށް އުޅަނދު ދުއްވުމަކީ ކުށެކެވެ. ނުރައްކާތެރިކޮށް ދުއްވާ ފަރާތްތަކުގެ ލައިސަންސް ވަކި މުއްދަތަކަށް ހިފެހެއްޓުން ނުވަތަ ބާތިލުކުރުމާއި އުޅަނދު ވަކި މުއްދަތަކަށް ފުލުހުންގެ ބެލުމުގެ ދަށަށް ގެންދިއުމުގެ އިތުރުން، ޤާނޫނުގައި ކަނޑައެޅިފައިވާ މިންވަރަށް ޖޫރިމަނާކުރުމުގެ ބާރު ފުލުހުންނަށް ލިބިގެންވެއެވެ. މި ރޯދަ ފެށުނުފަހުން އެމަޖެންސީގައި ދިޔަ އެމްބިއުލާންސަކަށް ފުރުސަތު ނުދީ މުދާ ބާލަން އޮތް ޕިކަޕު ޑްރައިވަރެއްގެ މައްސަލަ ވެސް ވަނީ ފެންމަތިވެފައެވެ. ފުލުހުން ވަނީ އޭނާއާ މެދު ވެސް ފިޔަވަޅު އަޅައިފައެވެ.