އީރާނާއި އެމެރިކާއިން ވާގިވެރިވާ ބާރުތަކާ ދެމެދު ހިނގަމުންދާ ހަމަނުޖެހުންތަކުގެ ސަބަބުން ދުނިޔޭގެ ހަކަތައިގެ ސަޕްލައިއަށް ބުރޫއަރަމުންދާތީ، ހޮރުމުޒް ކަނޑުއޮޅި މެދުވެރިކޮށް ތެލާއި ގޭސް ރައްކާތެރިކަމާ އެކު އުފުލުމާ ގުޅޭ ގޮތުން ޗައިނާއިން އީރާނާ އެކު މަޝްވަރާ ކުރަމުންދާ ކަމަށް ޑިޕްލޮމެޓިކް މަސްދަރުތަކުން ހާމަކޮށްފި އެވެ.
ހަވަނަ ދުވަހަކަށް ދެމިގެން ގޮސްފައިވާ މި ހަނގުރާމައިގެ ސަބަބުން، ދުނިޔޭގައި ބޭނުންކުރާ ތެލާއި ގުދުރަތީ ގޭހުގެ ގާތްގަނޑަކަށް %20 އުފުލާ މައިގަނޑު ކަނޑުގެ މަގު ކަމުގައިވާ ހޮރުމުޒް ކަނޑުއޮޅީގެ ދަތުރުފަތުރުތައް ވަނީ ބޮޑުތަނުން ހުއްޓިފަ އެވެ.
މެދުއިރުމަތީގެ ހަކަތައަށް ވަރަށް ބޮޑަށް ބަރޯސާވާ ޗައިނާއަށް ބޭނުންވާ ތެލުގެ ގާތްގަނޑަކަށް %45 އެ ގައުމަށް އެތެރެކުރަނީ މި ކަނޑުއޮޅި މެދުވެރިކޮށެވެ. އެހެންކަމުން، ޗައިނާގެ އުޅަނދުފަހަރަށް ރައްކާތެރިކަމާ އެކު ދަތުރުކުރެވޭނެ އިންތިޒާމު ހަމަޖައްސައިދިނުމަށް އެ ގައުމުން ވަނީ އީރާނުގެ ކިބައިން އެދިފަ އެވެ.
ކަނޑުދަތުރުފަތުރުގެ ތަފާސްހިސާބުތަކުން ދައްކާ ގޮތުގައި، އަޔަން މެއިޑަން ނަމަކަށް ކިޔާ ޓޭންކަރަކީ ޗައިނާގެ މިލްކުވެރިކަން އޮތް އުޅަނދެއްކަން ހާމަކުރުމަށް ފަހު އެ ކަނޑުއޮޅި ހުރަސްކޮށްފައިވެ އެވެ.
ނަމަވެސް، މިހާތަނަށް އެ ސަރަހައްދުން ދަތުރުކޮށްފައިވަނީ ވަރަށް މަދު އުޅަނދެކެވެ.
އުޅަނދުފަހަރު ދަތުރުކުރާ ގޮތް ބަލާ ޑޭޓާތަކުން ދައްކާ ގޮތުގައި، ޖެނުއަރީ މަހުން ފެށިގެން ދުވާލަކު އެވްރެޖްކޮށް 24 އުޅަނދު ދަތުރުކުރި ނަމަވެސް، މި މަހުގެ 1 ވަނަ ދުވަހު އެ އަދަދު ވަނީ 4އަށް ތިރިވެފަ އެވެ. އަދި ގާތްގަނޑަކަށް 300އެއްހާ ތެޔޮ ޓޭންކަރު މިހާރު ވެސް އެ ސަރަހައްދުގައި ދަތުރު ނުކުރެވި ތާށިވެފައި އެބަހުއްޓެވެ.
ހަކަތަ އުފައްދާ ވަސީލަތްތަކަށާއި އުޅަނދުފަހަރަށް ދެމުންދާ ހަމަލާތަކާ ގުޅިގެން، ހަނގުރާމަ ފެށުނު ފަހުން ތެލުގެ އަގު ވަނީ %15އަށް ވުރެ ބޮޑަށް އުފުލިފަ އެވެ.
އެމެރިކާ އާއި އިޒްރޭލު އަދި އެ ގައުމުތަކުގެ ބައިވެރިންނާ ގުޅުންހުރި އުޅަނދުފަހަރަށް ހޮރުމުޒް ކަނޑުއޮޅިން ދަތުރު ނުކުރެވޭނެ ކަމަށް އީރާނުން މީގެ ކުރިން އިންޒާރު ދީފައިވީ ނަމަވެސް، އެ ބަޔާނުގައި ޗައިނާގެ ނަން ހިމަނާފައެއް ނުވެ އެވެ.