"މާސްޓަ ދުރްގާ ރާއޯ ގުރުޖީ" ނަމަކަށް ކިޔާ ހިންދޫ ފާދިރީއެއް ރާއްޖޭގައި، ރޫހާނީ ކަންކަމަސް ފަރުވާދޭކަމަށް ބުނެ އިޝްތިހާރުކޮށް، އެ ކަން ކުރާ މައްސަލައެއް ބަލަމުން އަންނަކަމަށް ފުލުހުން މިއަދު ބުނެފިއެވެ. ފޭސްބުކުގައި ހިންގާ ޕޭޖެއްގައި އޭނާ އަންނަނީ އޭނާ ދޭ ފަރުވާތައް އިޝްތިހާރުކުރަމުންނެވެ. އެގޮތުން އަތް ބެލުމާއި، މޫނު ބެލުމާއި، ހޮރޮސްކޯޕް ބަލައި ދިމާވެފައި ހުންނަ މައްސަލަތައް ދެނެގަނެ ފަރުވާދޭކަމަށް އިޝްތިހާރުކޮށްފައިވެއެވެ. އިތުރު މައުލޫމާތު ހޯދުމަށް އިޝްތިހާރުކުރަމުން އަންނަ ނަންބަރަށް ގުޅައިލުމުން އެނގުނު ގޮތުގައި، ފަރުވާ ދޭކަމަށް ބުނާ ފާދިރީ އުޅެމުން އަންނަނީ ހުޅުމާލޭގައެވެ. އަދި ފަރުވާ ދިނުމަށް އޭނާ 300 ރުފިޔާގެ ފީއެއް ވެސް ނަގައިކަމަށް ބުނެފައިވެއެވެ. މިކަމާ ގުޅިގެން ފުލުހުން ބުނީ ރާއްޖޭގައި ރޫހާނީ ފަރުވާގެ ޚިދުމަތްތަކެއް ދޭކަމަށް ބުނެ ސޯޝަލް މީޑިއާގެ މަންސަތަކުގައި އިޝްތިހާރު ކުރަމުންދާ މައްސަލަ ފުލުހުންގެ ސަމާލުކަމަށް އައިސްފައިވާ ކަމަށެވެ. މި މައްސަލައާ ގުޅިގެން، ޤާނޫނީ ގޮތުން އަޅަންޖެހޭ ފިޔަވަޅުތައް އެޅުމަށް ޓަކައި ފުލުހުން މަސައްކަތް ކުރަމުން އަންނަކަމަށް ވަނީ ބުނެފައެވެ. ފުލުހުން ބުނީ ދިވެހިންގެ ސަގާފަތާއި ދީނާ ޚިލާފު އެ ފަދަ ކަންކަމުގެ މަޢުލޫމާތު އެކަކު އަނެއްކަކާ ހިއްސާ ކުރުމުގެ ބަދަލުގައި ވީ އެންމެ އަވަހަކަށް ކަމާބެހޭ އިދާރާތަކުގެ ސަމާލުކަމަށް ގެނެސް ޤާނޫނީ ފިޔަވަޅު އެޅުމުގެ މަސައްކަތް ކުރިއަށް ގެންދިއުމަކީ މުހިންމު ކަމެއް ކަމަށެވެ. އެހެންކަމުން، އެ ފަދަ އިޝްތިހާރެއް ފެނިއްޖެ ނަަމަ ލަސްނުކޮށް އަންގަން ފުލުހުން ވަނީ އެދިފައެވެ. މިދިޔަ އަހަރުގެ އޮގަސްޓު މަހު ވެސް، ޓޫރިސްޓު ވިސާގައި އެ ފަދަ މީހަކު ރާއްޖެ އައިސްފައިވެއެވެ.