އިލެކްޝަންސް ކޮމިޝަން (އީސީ)ގެ މެންބަރުކަމަށް ހިއުމަން ރައިޓްސް ކޮމިޝަން (އެޗްއާރުސީއެމް) ގެ ކުރީގެ ނައިބު ރައީސް, މުހައްމަދު ޒާހިދާއި ހޯމްލޭންޑް މިނިސްޓްރީގެ ކުރީގެ ޕާމަނަންޓް ސެކްރެޓަރީ އަބްދުއްރަހްމާން ސަލާހު ރަޝީދު އައްޔަނުކުރުމަށް ރައްޔިތުންގެ މަޖިލީހުން މިއަދު ފާސްކޮށްފިއެވެ.
މިދެބޭފުޅުން އެ ކޮމިޝަނުގެ މެންބަރުކަމަށް އައްޔަނުކުރުމަށް ފެންނަކަމަށް މަޖިލީހުން ފާސްކޮށްފައިވަނީ ދައުރުން ބޭރުން މިއަދު ބޭއްވި ޖަލްސާގައެވެ.
އިލެކްޝަންސް ކޮމިޝަނަށް ދެ މެންބަރެއްގެ މަގާމު ހުސްވެފައިވަނީ އެ ކޮމިޝަނުގެ ކުރީގެ ނައިބު ރައީސް އަލީ ނަޝާތާއި މެންބަރު މުހައްމަދު އާސިފް ވަކި ކުރުމަށް މަޖިލީހުން ފާސްކުރުމުންނެވެ. ނިމުނު ރިޔާސީ އިންތިޚާބުގެ ޑޭޓާބޭސް އިން އެޕްލިކޭޝަން ހަދައިގެން ވިއްކުމާއި، ރީރެޖިސްޓްރޭޝަން އޮޅުވާލުން ފަދަ ބޮޑެތި ތުހުމަތުތަކެއް އެ ބޭފުޅުންނަށް ކޮށްފައިވެއެވެ.
އިލެކްޝަންސް ކޮމިޝަންގެ މެންބަރުކަމަށް އައްޔަނުކުރުމަށް ރައީސް ހުށަހަޅުއްވާފައިވަނީ ޒާހިދާއި އަބްދުއްރަހްމާން ސަލާހުގެ ނަމެވެ.
މިއަދުގެ ޖަލްސާގައި އެ ކޮމިޝަނަށް ޒާހިދާއި އަބްދުއްރަހްމާން އައްޔަނުކުރުމާމެދު ވަކި ވަކިން ވޯޓަށް އެހުމުން ވޯޓުގައި ބައިވެރިވެވަޑައިގަތް 68 މެންބަރުންވެސް ވޯޓު ދެއްވީ އެ ދެބޭފުޅުން އިލެކްޝަންސް ކޮމިޝަންގެ މެންބަރުކަމަށް އައްޔަނުކުރުމަށް ފެންކަމަށެވެ.