ޗައިނާއިން އާޓިފިޝަލް އިންޓެލިޖެންސް (އޭއައި) ދާއިރާގައި ފާހަގަކުރެވޭ ކުރިއެރުންތަކެއް ހޯދަމުންދެ އެވެ. ޑީޕްސީކްގެ އޭއައި މޮޑެލް ތައާރަފްކުރުމަށްފަހު، ޓިކްޓޮކްގެ ވެރި ކުންފުނި ބައިޓްޑާންސްއިން އޮމްނިހިއުމަން-1 ނަމަކަށް ކިޔާ އާ އޭއައި ޓޫލެއް ތައާރަފްކޮށްފި އެވެ. މި އިންގިލާބީ އޭއައި ޓޫލަކީ އެންމެ ފޮޓޯއަކުން ވަރަށް ރިއަލިސްޓިކް މީހުންގެ ވީޑިއޯތައް އުފެއްދުމުގެ ގާބިލުކަން ލިބިގެންވާ އެއްޗެކެވެ.
މި ޓެކްނޮލޮޖީ ކުރިއަރަމުން އަންނައިރު، ޑީޕްފޭކް ނަހަމަ ގޮތުގައި ބޭނުންކުރެވިދާނެކަމުގެ ބިރުވެރިކަން އުފެދިފައިވެ އެވެ. މި ތައާރަފްކުރީ ޑިޖިޓަލް ދޮގު މައުލޫމާތު  ދުނިޔޭގެ މައްސަލައެއްގެ ގޮތުގައި ފެތުރެމުންދާ ވަގުތެއްގަ އެވެ.
އޭބީސީގެ ރިޕޯޓެއްގައިވާ ގޮތުން، ބައިޓްޑާންސްގެ އޭއައި ޑިވިޝަންއިން ޝާއިއުކޮށްފައިވާ ރިސާޗް ޕޭޕަރަކުން ހާމަވެފައިވަނީ އޮމްނިހިއުމަން-1 މޮޑެލް ތަމްރީންކޮށްފައިވަނީ 18,700 ގަޑިއިރަށްވުރެ ގިނަ އިންސާނުންގެ ވީޑިއޯއަށް ބަލައިގެން ކަމަށެވެ. މިކަމުގެ ސަބަބުން މި ޓެކްނޮލޮޖީއަށް އިންސާނުންގެ ހަރަކާތްތައް ވަރަށް ސައްހަކަމާއެކު އުފެއްދުމާއި ވާހަކަދެއްކުމުގެ ހަރަކާތްތައް ސިންކްރޮނައިޒް ކުރުމުގެ ގާބިލުކަން ލިބިގެންވެ އެވެ. މި ޖެނެރޭޓިވް އޭއައި ޓެކްނޮލޮޖީގެ ކުރިއެރުމުގެ ސަބަބުން ގައުމީ ސަލާމަތަށް ހުރި ނުރައްކާތަކާ ގުޅޭ މަޝްވަރާތައް ފެށިފައިވެ އެވެ.
ރިސާޗް ޑޮކިއުމަންޓުގައި ދައްކާފައިވާގޮތުން، އޮމްނިހިއުމަން-1 ޓެސްޓުކޮށްފައިވަނީ އަލްބަޓް އައިންސްޓައިންގެ ސްޓެ  ފޮޓޯއެއް ބޭނުންކޮށްގެން އޭނާ ލެކްޗަރެއް ދޭ ފަދަ ފުޓޭޖެއް އުފެއްދުމުގެ ތެރެއިންނެވެ. މި ރިސާޗް ޕޭޕަރުގައި ދައްކާފައިވާ އެހެން މިސާލުތަކުގެ ތެރޭގައި އޭއައި އުފައްދާފައިވާ ޓެޑް ޓޯކް ސްޕީކަރުންނާއި މިއުޒިޝަނުން ހިމެނެ އެވެ. މި މިސާލުތަކުން މި މޮޑެލްގެ ތައުލީމީ، މުނިފޫހިފިލުވުމުގެ އަދި ވާހަކަ ކިޔުމުގެ އެޕްލިކޭޝަންތައް ދައްކުވައިދެ އެވެ. އޮމްނިހިއުމަން-1 ގެ މައިގަނޑު ފައިދާއަކީ މި ސިސްޓަމަށް އެކި ބޮޑުމިނުގެ ޕްރޮޕޯޝަންތަކުގައި ހައި ޑެފިނިޝަން ވީޑިއޯ ކޮންޓެންޓް އުފެއްދުމުގެ ގާބިލުކަން ލިބިގެންވުމާއި، ތުންފަތުގެ ހަރަކާތްތައް ނުވަތަ އަތާގުޅޭ ޑިފޯމޭޝަންތައް ނުބައިކޮށް އުފެއްދުން ފަދަ އޭއައި ޓެކްނޮލޮޖީގައި ކުރިމަތިވާ އާންމު މައްސަލަތައް ހައްލުކުރުމުގެ ގާބިލުކަން ލިބިފައިވުމެވެ.
ސައިންސްއިން ދައްކާގޮތުން އޮމްނިހިއުމަން-1 އިން އުފައްދާ ނަތީޖާތަކަކީ މިހާރު ހުރި އޭއައި މޮޑެލްތަކަށްވުރެ ރިއަލިޒަމްގެ މިންވަރު މަތީ ނަތީޖާތަކެކެވެ. މިކަމުގެ ސަބަބުން އޭއައި ޑިޓެކްޝަން ސިސްޓަމްތަކަށް ސިންތެޓިކް ކޮންޓެންޓް ދެނެގަތުމަށް އުނދަގޫވެ އެވެ.
ބައިޓްޑާންސްއިން މި އޭއައި އީޖާދު ތައާރަފްކޮށްފައިވަނީ ވަރަށް ނާޒުކު ވަގުތެއްގަ އެވެ. މިއީ  އޭއައި ބޭނުންކޮށްގެން އުފައްދާ ދޮގު މައުލޫމާތު ފެތުރުން ހުއްޓުވުމަށް ދުނިޔޭގެ އެކި ސަރުކާރުތަކުން ހައްލުތަކެއް ބޭނުންވެފައިވާ ދަނޑިވަޅެކެވެ. ބްރޫކިންގްސް އިންސްޓިޓިއުޝަނުން ފާހަގަކޮށްފައިވާ ގޮތުގައި، 2024 ވަނަ އަހަރުގެ އެމެރިކާގެ ރިޔާސީ އިންތިޚާބުގައި ވޯޓު ދޭ ފަރާތްތަކުން އިންތިޚާބީ މައްސަލަތައް މާނަކުރި ގޮތުގައި އާޓިފިޝަލް އިންޓެލިޖެންސް ނިންމުންތެރި ބައެއް ކަމުގައި ވިއެވެ.
ރަޝިޔާގެ ޕްރޮޕަގެންޑާއިން އޭއައި ބޭނުންކޮށްގެން އުފައްދާފައިވާ އިމިގްރޭޝަން މައްސަލަތަކާއި ކުށްތަކާ އަދި ބޭރުގެ ސިޔާސަތުތަކާބެހޭ މައުލޫމާތު ފެތުރިއެވެ. ދުނިޔޭގެ އެކި ގައުމުތަކުން މިހާރު މި ދަނީ އާޓިފިޝަލް އިންޓެލިޖެންސް ބޭނުންކޮށްގެން އުފައްދާ މަކަރުތަކުގެ ނުރައްކާތެރި ނަތީޖާތައް ތަޖުރިބާކުރަމުންނެވެ.
މިގޮތުން، ބަންގްލަދޭޝްގައި ސިޔާސީ ޑީޕްފޭކް ސްކޭންޑަލެއް ހިނގާފައިވެ އެވެ. މިއީ އެ ގައުމުގެ އިސް ސިޔާސީ ބޭފުޅަކު ބޭއަދަބީ މަންޒަރެއްގައި ވާކަމަށް ދައްކުވައިދޭ އޭއައިން އުފައްދާފައިވާ ކޮންޓެންޓެއް ނެރުމުން ހިނގާފައިވާ ކަމެކެވެ. މޮލްޑޯވާގެ ހުޅަނގުގެ ގައުމުތަކަށް ތާއީދުކުރައްވާ ރައީސް ޓެކްނޮލޮޖީ ބޭނުންކޮށްގެން މެނިޕިއުލޭޓްކޮށް، ރަޝިޔާއަށް ތާއީދުކުރާ ޕާޓީއަކަށް އެހީތެރިވާކަމަށް ދައްކާފައިވެ އެވެ. އޭއައި ޓެކްނޮލޮޖީ ބޭނުންކޮށްގެން އުފައްދާފައިވާ އެމެރިކާގެ ކުރީގެ ރައީސް ޖޯ ބައިޑެންގެ އަޑު ބޭނުންކޮށްގެން ނިއު ހެމްޕްޝަޔާގެ ރިޔާސީ ޕްރައިމަރީ އިންތިޚާބުގައި ވޯޓުދިނުން ހުއްޓުވުމަށް މަސައްކަތްކޮށްފައިވެ އެވެ. މިކަން ކުށްވެރިކޮށް އިންތިޚާބުގެ ސާފުކަމަށް ނުރައްކާވާކަމަށް ނިއު ހެމްޕްޝަޔާގެ ސަރުކާރުގެ ރަސްމީ ފަރާތްތަކުން ބުނެފައިވެ އެވެ.
އެމެރިކާއިން ދަނީ ބައިޓްޑާންސްގެ ޓެކްނިކަލް ކުރިއެރުންތަކާ އެއްފެންވަރަށް ދިއުމަށް މަސައްކަތްކުރަމުންނެވެ. ޕްރެޒިޑެންޓްކަމުގެ ދައުރުގައި، ރައީސް ޑޮނަލްޑް ޓްރަމްޕް 500 ބިލިއަން ޑޮލަރުގެ ޕްރައިވެޓް-ސެކްޓާ އޭއައި އިންވެސްޓްމަންޓް ސްކީމެއް ވަނީ ފަށްޓަވައިފަ އެވެ. މީގެތެރޭގައި އޯޕަންއޭއައި، ސޮފްޓްބޭންކް އަދި އޮރަކަލް ފަދަ ކުންފުނިތައް ހިމަނާ، އެމެރިކާގެ އޭއައި އިނޮވޭޝަން އަވަސްކުރުމަށް ދަނީ މަސައްކަތްކުރަމުންނެވެ.
ދުނިޔޭގައި އޭއައި  ބަދަލުވަމުންދާ ހަލުވި ދުވެލީގައި، އޮމްނިހިއުމަން-1 އާ ގުޅިގެން އަޚްލާގީ އަދި ރެގިއުލޭޓަރީ ޕޮލިސީތަކާ ގުޅޭ ކަންބޮޑުވުންތައް އިތުރުވެފައިވެ އެވެ. ބައިޓްޑާންސްއިން އެމީހުންގެ ޕްލެޓްފޯމްތަކުގައި އޮމްނިހިއުމަން ޓެކްނޮލޮޖީ ބޭނުންކުރާނީ ކިހިނެއްކަން އަދި ސާފުނުވިޔަސް، ފާހަގަކުރެވޭ ކަންތައްތަކުން ދައްކުވައިދެނީ އެމެރިކާ އަދި ޗައިނާގެ އޭއައި މާކެޓްތަކުގެ މެދުގައި ވަރަށްބޮޑު ވާދަވެރިކަމެއް އުފެދިވައިވާ  ކަމެވެ.
އޮމްނިހިއުމަން-1ން ދައްކުވައިދެނީ ކުރީގެ ހުރިހާ އާޓިފިޝަލް އިންޓެލިޖެންސް ސިސްޓަމްތަކަށްވުރެ ބޮޑެތި ކުރިއެރުންތަކެކެވެ. އޮމްނިހިއުމަން-1ން ކުރީގެ ޑީޕްފޭކް ޓެކްނޮލޮޖީތައް ފަހަނައަޅައި ދެއެވެ. އެއީ މުޅި ހަށިގަނޑުގެ ހަރަކާތްތަކަށް ރިއަލިސްޓިކް އެނިމޭޝަންތައް އުފައްދައިދޭއިރު، ކުރީގެ މޮޑެލްތައް މައިގަނޑު ގޮތެއްގައި ފޯކަސްކޮށްފައިވަނީ މޫނުގެ އެނިމޭޝަންތަކާއި ހަށިގަނޑުގެ މަތީބައިގެ ހަރަކާތްތަކަށެވެ. އޮމްނިހިއުމަން-1 އަކީ ވަރަށް ފުޅާކޮށް ކޮންޓެންޓް އުފެއްދުމުގެ ގާބިލުކަމާއެކު ތަރައްގީކުރެވިފައިވާ ޓެކްނޮލޮޖީ އެކެވެ. އާ މޮޑެލް ކުޑަ މަސައްކަތަކުން ފެންވަރު ރަނގަޅު ވީޑިއޯތައް އުފައްދައެވެ. ކުރީގެ މޮޑެލްތައް މަސައްކަތްކޮށްފައިވަނީ ބޮޑެތި ޑޭޓާސެޓްތަކާއި މަތީ ކޮމްޕިއުޓޭޝަނަލް ބޭނުންތަކާ އެކުގައެވެ.
އޮމްނިހިއުމަން-1 މާކެޓަށް ނެރެފައިވަނީ ޑީޕްސީކްގެ އާރް1 ޕްރޮޑަކްޓާ އެކުގަ އެވެ. އެމީހުން ވަނީ ކުޑަ އަގެއްގައި ބޭނުންކުރެވޭ ބޮޑު ލޭންގުއޭޖް މޮޑެލެއް އޭއައި ސެކްޓަރަށް ތައާރަފްކޮށްފައެވެ. ހައި-ޕަރފޯމަންސް ސެމިކޮންޑަކްޓާ ޗިޕްސް އެކްސްޕޯޓްކުރުމަށް އެމެރިކާގެ ހުރަސްތަކާ ކުރިމަތިވިޔަސް، އާރް1 މޮޑެލް ޑީޕްސީކްއިން ވަނީ ފާހަގަކުރެވޭ މިންވަރަށް ތައުރީފު ލިބިފަ އެވެ. މި ފަހުގެ ކާމިޔާބީން ދައްކުވައިދެނީ ބޭރުގެ ގޮންޖެހުންތަކާ ކުރިމަތިވިޔަސް، ޗައިނާގައި ދެމެހެއްޓެނިވި އަދި އީޖާދީ އޭއައި އިކޯސިސްޓަމެއް އޮތްކަމެވެ.
އިންޑަސްޓްރީގެ ކުރިއެރުންތަކުން ދައްކުވައިދެނީ ޗައިނާ ކުންފުނިތަކުން އޭއައި ދާއިރާގައި ބައިވެރިވުމަށް މަޑުންތިބޭކަށް ބޭނުންނުވާކަމެވެ. ޗައިނާއިން ދަނީ މި ރޭހުގައި ލީޑަޝިޕް ޕޮޒީޝަންތައް ނަގަމުންނެވެ. ބައިޓްޑާންސް އަދި ޑީޕްސީކްއިން މަދު ވަސީލަތްތަކަށް އޮޕްޓިމައިޒްކޮށްފައިވާ މޮޑެލްތަކާއި އޯޕަން-ސޯސް މެތަޑޮލޮޖީތައް ގެންގުޅެމުންދިއުމުން، އިންޑަސްޓްރީ ތެރޭގައި އާ ވާދަވެރިކަމެއް އުފެދި، ހުޅަނގުގެ ޓެކް ކުންފުނިތަކަށް ގޮންޖެހުންތައް ދަނީ ކުރިމަތިކުރުވަމުންނެވެ.
ޗައިނާގެ ހައި-ޓެކް ކުންފުނިތަކުގެ ހަލުވި ތަރައްގީން އިންޓާނޭޝަނަލް ޓެކް ސެކްޓާތަކުގައި ފާހަގަކުރެވޭ ބަދަލުތަކެއް އަންނަމުންދެ އެވެ. އޮމްނިހިއުމަން-1 ފަދަ އޭއައި އެޕްލިކޭޝަންތަކާއި ޑީޕްސީކްގެ އާރް1 ސްޓޮކް މާކެޓްތަކަށް އަސަރު ފޯރުވަން ފަށައިފި އެވެ.
އިންވެސްޓަރުން ޗައިނާގެ އޭއައި ސެކްޓަރުގައި އިތުރުވަމުންދާ ނުފޫޒު ބަލަމުންދެ އެވެ. އެކި އިންޑަސްޓްރީ އެނަލިސްޓުންގެ ލަފާގައި، 2025 އަށް ހުރިހާ ސެކްޓާތަކެއްގައި އޭއައި އެޕްލިކޭޝަންތައް ފުޅާކޮށް ބޭނުންކުރެވޭނެކަމަށް ބެލެވެ އެވެ. މި ދާއިރާގައި އިތުރުވަމުންދާ ގާބިލުކަން ދައްކުވައިދޭއިރު، ޗައިނާގެ އޭއައި ތަރައްގީއަށް ދުނިޔެއިން ދަނީ ގާތުން ބަލަމުންނެވެ.