ރައްޔިތުންގެ މަޖިލީހުގެ ރައީސްގެ މަގާމުން މިއަދު އަބްދުﷲ މަސީހު އިސްތިއުފާ ދެއްވުމާއި ގުޅިގެން އާ ރައީސަކު ހޮވުމަށް ބޭއްވި ޖަލްސާގައި ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ އާ ވާދަކޮށް، މާމިގިލި ދާއިރާގެ މެމްބަރު ގާސިމް އިބްރާހިމް ބޮޑު ތަފާތަކުން ކާމިޔާބުކޮށް މަޖިލީހުގެ ރައީސްގެ މަގާމަށް އިންތިޚާބު ވެއްޖެއެވެ.
މިރޭ ނެގި ވޯޓުގައި 80 މެމްބަރުން ބައިވެރިވަޑައިގެންފައި ވާއިރު ގާސިމް އިބްރާޙިމް ވަނީ 62 މެމްބަރުންގެ ވޯޓު ހޯއްދަވާފައެވެ. ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ އަށް ލިބިފައިވަނީ އެންމެ 16 ވޯޓެވެ. ބާތިލު ދެ ވޯޓު ހިމެނިފައިވާއިރު މިރޭ ނެގި ވޯޓުން ޕީޕީއެމްގެ ނައިބު ރައީސަށް މަޖިލީހުގައި ތިއްބެވި ޕީޕީއެމް ބައެއް މެމްބަރުން ވެސް ވޯޓު ނުދެއްވާ ކަން މިވަނީ ހާމަވެގެން ގޮސްފައެވެ.
މެމްބަރު އަބްދުއްރަހީމް ވަނީ އެމަނިކުފާނު މަޖިލީހުގެ ރައީސް ކަމަށް އިންތިޚާބުކޮށްފި ނަމަ މެމްބަރުންގެ މުސާރަ 150،000 ރުފިޔާއަށް ހައްދަވާނެ ކަމަށް ވިދާޅުވެފައެވެ.
ނަމަވެސް ރައީސް ކަމަށް ހޮވުނު ގާސިމް އިބްރާހިމްގެ ފަރާތުން އެފަދަ އެއްވެސް ވައުދެއް މެމްބަރުންނަށް ވެފައިނުވާކަން ފާހަގަކޮށްލެވެއެވެ.