ތޫނު ހަތިޔާރުން ބިރުދައްކައިގެން ފޭރުނު މައްސަލައެއްގައި ހޯދަމުންދިޔަ ތިން މީހުންގެ ތެރެއިން އެކަކު އަދިވެސް ނުފެންނަ ކަމަށާއި އޭނާ ހޯދުމުގެ މަސައްކަތް ކުރަމުންދާ ކަމަށް ފުލުހުން ވިދާޅުވެއްޖެއެވެ.
ފުލުހުން ވިދާޅުވީ މިމައްސަލައިގައި މިހާރު ހޯދަމުންދަނީ ލ. ގަން/ތުނޑި، ކީމިޔާގެ، ޙަސަން ރާޝިދު (20އ) އެވެ.
ފުލުހުން ވިދާޅުވީ ތޫނު ހަތިޔާރުން ބިރުދައްކައިގެން ފޭރުނު މައްސަލައެއްގައި ހޯދަމުންދިޔަ 3 މީހުންގެ ތެރެއިން ގއ. ކޮލަމާފުށި، ނިވައިދަށުގެ، ޢަލީ ރަފާޙް ރިޔާޟް (19އ) އާއި ސ. ހިތަދޫ، ޑިސެމްބަރު، ޙުސައިން ޝާނީޒް (21އ) ފުލުހުންގެ އިދާރާއަށް އަމިއްލައަށް ހާޒިރުވެއްޖެކަމަށާއި އެމީހުން ކޯޓު އަމުރެއްގެ ދަށުން ހައްޔަރުކޮށް ފުލުހުން މިހާރު ދަނީ އެމީހުންގެ މައްޗަށް ތުހުމަތު ކުރެވޭ މައްސަލައާ ގުޅިގެން އިތުރަށް ސުވާލުކޮށް މައުލޫމާތު ސާފުކުރަމުން ކަމަށެވެ.
މިމައްސަލައިގައި ހޯދަމުންދާ ޙަސަން ރާޝިދާބެހޭ އެއްވެސް މައުލޫމާތެއް ލިބިފައިވާ ފަރާތެއްވާނަމަ އެ މައުލޫމާތެއް މޯލްޑިވްސް ޕޮލިސް ސާވިސްގެ ސީރިއަސް އެންޑް އޮގަނައިޒްޑް ކްރައިމް ޑިޕާޓްމަންޓްގެ ނަންބަރު 9911099، ނުވަތަ ހޮޓްލައިން ނަންބަރު 3322111 އަށް ގުޅުއްވައި ހިއްސާކުރެއްވުމަށް ފުލުހުން އެދިވަޑައިގަންނަވައެވެ.
މިފަދަ މައްސަލަތަކާ ގުޅިގެން މަޢުލޫމާތު ދޭ ފަރާތްތައް ސިއްރުކޮށްދޭނެކަމުގެ ޔަޤީންކަން އަރުވާކަމަށާާއި އަދި މިފަދަ ކަންކަމުގައި ރައްޔިތުންގެ ފަރާތުން ފުލުހުންނަށް ލިބެމުންދާ އެހީތެރިކަން ފާހަގަކޮށް މި ފުރުޞަތުގައި ޝުކުރު ދަންނަވާ  ކަމަށް ފުލުހުން ވިދާޅުވިއެވެ.