މޯލްޑިވްސް ބްރޯޑްކާސްޓިން ކޯޕަރޭޝަން (އެމްބީސީ)ގެ މައްޗަށް މޯލްޑިވްސް ނެޝަނަލް ބްރޯޑްކާސްޓިން ކޯޕަރޭޝަން (އެމްއެންބީސީ) އިން ދައުވާ ކުރާ މައްސަލައިގައި ހުކުމް ކުރަންދެން ނުވަތަ ކޯޓުން ވަކި ގޮތެއް ކަނޑައަޅަންދެން އެމްއެންބީސީގެ އެއްވެސް މުދަލެއް ވިއްކައިގެން ނުވާނެ ކަމަށް ހައި ކޯޓުން މިއަދު އަމުރުކޮށްފި އެވެ. އެމްއެންބީސީގެ ހަވާލުގައިވާ ހުރިހާ މުދަލާއި މުވައްޒަފުން 20 ދުވަހުގެ ތެރޭގައި އެމްބީސީ އަށް ހަވާލު ކުރުމަށް ސިވިލް ކޯޓުން ނިންމުމުން އެ މައްސަލަ ހައި ކޯޓަށް ހުށަހަޅާފައި ވަނީ އެމްއެންބީސީގެ ފަރާތުންނެވެ. އެމްއެންބީސީގެ އަތޮޅު ތެރޭގެ ބައެއް މީޑިއާ ސެންޓަރުތަކާއި ބައެއް މުވައްޒަފުން މި ޑިސެމްބަރު ތެރޭގައި ދޫކޮށްލަން އުޅޭ ކަމަށް ބުނެ އެކަން ހުއްޓުވައިދިނުމަށް ހައި ކޯޓުގައި އެދިފައި ވަނީ އެމްބީސީގެ ފަރާތުންނެވެ. މިއަދު ހައި ކޯޓުން ނެރެފައިވާ އަމުރުގައި ބުނެފައި ވަނީ ދަށު ކޯޓުގެ ހުކުމަށް އަމަލު ނުކުރެވޭނެ ފަދަ ގޮތަކަށް ނުވަތަ އެ ހުކުމުގެ މަގްސަދު ހާސިލް ނުކުރެވޭނެ ފަދަ ގޮތަކަށް އެއްވެސް ފަރާތަކުން އަމަލު ކުރުމަކީ އަދުލް އިންސާފުގެ ހަމަތަކުގެ މަތިން ބަލާއިރު ކުރެވިގެންވާނެ ކަމެއް ނޫން ކަމަށެވެ. އަދި އެފަދަ އަމަލެއް ކޮށްފި ނަމަ އިއާދަ ނުކުރެވޭނެ ފަދަ ގެއްލުމެއް ލިބިދާނެ ކަމަށް ވެސް އެ އަމުރުގައި ބަޔާން ކޮށްފައިވެ އެވެ. "ގަޒިއްޔާގެ ހުކުމަށް އަމަލު ނުކުރެވޭ ފަދަ ނުވަތަ އެ ހުކުމުގެ މަގްސަދު ހާސިލް ކުރުމަށް ހުރަސްއެޅޭ ފަދަ އެއްވެސް އަމަލެއް އެއްވެސް ފަރާތަކުން ކުރުމަކީ އަދުލް އިންސާފުގެ ހަމަތަކުން ބަލާއިރު ކުރެވިގެންވާނެ ކަމެއް ނޫން،" އެ އަމުރުގައިވެ އެވެ. "އަދި އެފަދަ އަމަލެއް ކޮށްފި ނަމަ އިއާދަ ނުކުރެވޭނެ ފަދަ ގެއްލުމެއް ލިބިދާނެ." އެ އަމުރުގައި އިތުރަށް ބުނެފައި ވަނީ ހައި ކޯޓަށް ހުށަހަޅާފައިވާ މައްސަލައެއްގައި ވަކި ކަމެއް ކުރުމަށް ނުވަތަ ވަކި ކަމެއް ނުކުރުމަށް އެންގުމުގެ ބާރު ހައި ކޯޓަށް ލިބިގެންވާ ކަމަށެވެ. އެހެންކަމުން އެ މައްސަލައިގައި ހައި ކޯޓުން ހުކުމް ކުރަންދެން ނުވަތަ ވަކި ގޮތެއް ކަނޑައަޅަންދެން އެމްއެންބީސީގެ އެއްވެސް މުދަލެއް ބަދަލުކޮށް، ވިއްކައި، ނައްތާލައިގެން ނުވާނެ ކަމަށް އެ އަމުރުގައިވެ އެވެ. "އެމްއެންބީސީގެ ފަރާތުން ދިވެހިރާއްޖޭގެ ހައި ކޯޓަށް ހުށަހަޅައި ބެލެވެމުންދާ މައްސަލަ ނިމުމުގެ ކުރިން ނުވަތަ ދިވެހިރާއްޖޭގެ ހައި ކޯޓުން އެހެން ގޮތަކަށް ކަނޑައެޅެންދެން އެމްއެންބީސީގެ އެއްވެސް މުދަލެއް ވިއްކައި، ދޫކޮށް، ބަދަލުކޮށް ނުވަތަ ނައްތާލުން ފަދަ ސިވިލް ކޯޓުގެ ނަންބަރު [ގަޒިއްޔާގެ ނަންބަރު] ގަޒިއްޔާގެ ހުކުމަށް އަމަލު ނުކުރެވޭ ފަދަ ނުވަތަ އެ ހުކުމުގެ މަގްސަދު ހާސިލް ކުރުމަށް ހުރަސްއެޅޭ ފަދަ އެއްވެސް އަމަލެއް ނުކުރުމަށް އެމްއެންބީސީ، ދައުލަތް، ކޮމިއުނިކޭޝަން އޮތޯރިޓީ އޮފް މޯލްޑިވްސް އަދި މޯލްޑިވްސް ނެޝަނަލް ބްރޯޑްކާސްޓިން ކޯޕަރޭޝަންގެ ޑިރެކްޓަރުންގެ ބޯޑުގެ މެންބަރުންނަށް އަންގައި އަމުރުކޮށްފިން،" ހައި ކޯޓު އަމުރުގައިވެ އެވެ.