އިޒްރޭލުން ހިންގި އުދުވާނުގެ ސަބަބުން ފަލަސްތީނުގެ ގާޒާގައި ހާލުގައި ޖެހިފައިވާ މީހުންނަށް އެހީވުމަށް ދިވެހިންގެ ފަރާތުން ހަދިޔާކުރުމަށް ހަމަޖައްސާފައިވާ 29 މިލިއަން ރުފިޔާ ޑޮލަރަށް ބަދަލުކޮށްދިނުމަށް ބޭންކް އޮފް މޯލްޑިވްސް (ބީއެމްއެލް) އިން ނިންމައިފި އެވެ. ހެލްޕް ގާޒާ ފަންޑުން މިއަދު ނެރުނު ބަޔާނުގައި ބުނެފައި ވަނީ ގާޒާ ފަންޑްގެ 6.3 މިލިއަން ރުފިޔާ އާއި ދިވެހި މީޑިއާ އިން އިސްނަގައިގެން މި މަހު 8 އަދި 9 ވަނަ ދުވަހު ބޭއްވި ޓެލެތޯނުން އެއްކުރި 23.16 މިލިއަން ރުފިޔާއާ އެކު ޖުމްލަ 29.46 މިލިއަން ރުފިޔާ އަށްވާ 1.91 މިލިއަން ޑޮލަރު ވިއްކަން ބޭންކުން ނިންމާފައިވާ ކަމަށެވެ. އަދި އެ ބޭންކްގެ ޑެޕިޔުޓީ ސީއީއޯ އައިޝަތު ނޫރައްދީން ސޮއިކުރައްވައި ހެލްޕް ގާޒާ ޓެލެތޯންގެ ސްޓިއަރިން ކޮމެޓީގެ ޗެއާމަން އިބްރާހީމް އުމަރު މަނިކަށް އިއްޔެ ފޮނުއްވި ސިޓީއެއްގައި އެކަން ޔަގީންކޮށްދެއްވާފައިވާ ކަމަށް ވެސް އެ ބަޔާނުގައި ވެ އެވެ. ބީއެމްއެލް އިން ކުރިން ބުނެފައި ވަނީ ގާޒާގައި ދިރިއުޅޭ އާއިލާތަކަށް ފައިސާ ފޮނުވަމަށް އެ ބޭންކުން ލޯކަލް އެއްވެސް ޗާޖެއް ނުނަގާނެ ކަމަށާއި ބޭންކްގެ ރަސްމީ ރޭޓް 15.42 ރުފިޔާގެ ރޭޓުން ޑޮލަރު ވިއްކާނެ ކަމަށެވެ. ސަރުކާރުގެ ބޮޑު ހިއްސާއެއް އޮންނަ ބީއެމްއެލް އިން އެ ފައިސާ ވިއްކާ ގޮތަށް ނިންމީ ރައީސް އަބްދުﷲ ޔާމީނާއި އެމްއެމްއޭގެ ގަވަރުނަރު އަޒީމާ އާދަމަށް ހެލްޕް ގާޒާ ޓެލެތޯންގެ ސްޓިއަރިން ކޮމެޓީން ދަންނަވާފައި ވަނިކޮށެވެ. ގާޒާގައި ހާލުގައި ޖެހިފައިވާ ފަރާތްތަކަށް ދިވެހި ރައްޔިތުން ދިން ފައިސާ އިން ހަރަދު ކުރަންވާނެ ގޮތް ބަޔާންކޮށް، ހެލްޕް ގާޒާ ޓެލެތޯންގެ ސްޓިއަރިން ކޮމެޓީ އާއި ގާޒާ ފަންޑް މޯލްޑިވްސް އާއި ރެޑްކްރެސެންޓް ސޮސައިޓީން އެއްބަސްވުމުގައި މިރޭ ސޮއި ކުރުމަށް ވަނީ ހަމަޖައްސައިފަ އެވެ. އެ ފައިސާ އިން ހަރަދު ކުރުމަށް ތިން ފަރާތުން އެއްބަސްވާ ގޮތަކީ ގާޒާގައި ހާލުގައި ޖެހިފައިވާ ފަރާތްތަކަށް ސާފު ބޯފެން ފޯރުކޮށް ދިނުމާއި ބޭސް ފަރުވާ އާއި ކާބޯ ތަކެތި ފޯރުކޮށް ދިނުން ކަމަށް ހެލްޕް ގާޒާ ފަންޑްގެ ބަޔާނުގައި ވެ އެވެ. އަދި އެ ފައިސާ އިން ގާޒާގައި ހާލުގައި ޖެހިފައިވާ ފަރާތްތަކަށް ނޫން ބަޔަކަށް ހަރަދު ނުކުރެވޭނެ ކަމަށާއި އެއީ ދިވެހި ރައްޔިތުން ގާޒާގައި ހާލުގައި ޖެހިފައިވާ އާއިލާތަކަށް ހަދިޔާ ކުރި އެއްޗެއްކަން އެނގޭ ގޮތަށް ދިވެހި ދިދަ ނޫނީ ދިވެހި ދައުލަތުގެ ނިޝާން، އެ ފައިސާ އިން ގަންނަ ތަކެތީގައި ޖަހަން ޖެހޭނެ ކަމަށް ވެސް ދެ ފަރާތުން އެއްބަސްވާނެ އެވެ. މި ފައިސާއާ ހަވާލުވުމަށް ގަތަރު ރެޑް ކްރެސެންޓުގެ ރައީސް ޑރ. މުހައްމަދު ބިން ޣާނިމް އަލް މާދީދް އިއްޔެ ވަނީ މާލެ ވަޑައިގެންފި އެވެ.