ހުޅުލެއާއި މާލެއާ ދެމެދު އަޅާފައިވާ، ތާރީޚީ ބްރިޖުގެ މަސައްކަތް، ކާމިޔާބުކަމާއެކު ނިންމާލެވުމުން، އެކަމުގެ ޙައްޤު ތައުރީފު ލިބެން ޖެހޭ ފަރާތްތަކުގެ ލިސްޓުގައި ކުރީގެ ރައީސް އަލްއުސްތާޛު މައުމޫން އަބްދުލް ޤައްޔޫމް ނެތުމުން، އެމަނިކުފާނަށް ތާއީދު ކުރާ ފަރާތްތަކުން ރުޅި ގަދަވެއްޖެއެވެ.
މައުމޫން ރިފޯމް މޫވްމަންޓް (އެމްއާރްއެމް) ގެ ނަމުގައި މަސައްކަތް ކުރަމުންދާ ފަރާތްތަކުންވަނީ މިކަމާ ގުޅިގެން މީސް މީޑިޔާގެ އެކި ވަސީލަތްތަކުގައި ނުރުހުން ފާޅުކޮށްފައެވެ.
އެފަރާތްތަކުން ރުޅި ގަދަވެފައިވަނީ، ކުރީގެ ރައީސް ޑރ. މުޙައްމަދު ވަޙީދު ޙަސަން މަނިކު އާއްމުކުރައްވާފައިވާ ލިސްޓުގައި ރައީސް މައުމޫނުގެ ނަން ނެތުމުންނެވެ. ރައީސް ވަހީދު ވިދާޅުވެފައިވާ ގޮތުގައި، ހުޅުލެއާއި މާލެއާ ދެމެދު ބްރިޖެއް ބިނާކުރުމުގެ ވިސްނުން އެންމެ ފުރަތަމަ ގެންގުޅުއްވާފައިވަނީ ކުރީގެ ރައީސް މުޙައްމަދު ނަޝީދެވެ. އެހެންނަމަވެސް، އެކަން ހަޤީޤަތަކަށް ހައްދަވައި ދެއްވުމުން، އެކަމުގެ ހުރިހާވެސް ކްރެޑިޓެއް، ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ޤައްޔޫމަށް ލިބެން ޖެހޭނެކަމަށް ވިދާޅުވެފައިވެއެވެ.
ރައީސް ވަހީދު ވިދާޅުވި ވިދާޅުވުމަށް ނުރުހުން ފާޅުކުރައްވާ، އެމްއާރްއެމްގައި މަސައްކަތް ކުރައްވާ އައިމިނަތު ނާދިރާ ކުރެއްވި ޓްވީޓެއްގައި ވިދާޅުވެފައިވަނީ، މި މަސައްކަތު ތަޞައްވުރު އެންމެ ފުރަތަމަ ގެންގުޅުއްވި ފަރާތަކީ ރައީސް މައުމޫނުކަމުގައެވެ. އަދި، ރައީސް މައުމޫނުގެ ތަޞައްވުރަކީ ހަމައެކަނި އެދެރަށް ގުޅާލުން ނޫންކަމަށާއި، އޭގެ ބަދަލުގައި އެސަރަޙައްދުގައި ހުރި ސިނާއީ އެހެން ރަށްތަކާއި މީހުން އުޅޭ އެހެން ރަށްތައްވެސް ގުޅާލުންކަމުގައެވެ.
މީގެއިތުރުންވެސް، ނާދިރާ ވިދާޅުވެފައިވަނީ ހުޅުލެއާއި މާލެއާ ދެމެދު ބްރިޖެއް އެޅުމަށްޓަކައި ހިނގާނެ ޚަރަދުތަކާއި އެކަން ފެށުމުގެ ކުރިން ކުރަން ޖެހޭ ދިރާސާތައްވެސް، ރައީސް މައުމޫނުގެ ދައުރުގައި ކުރައްވާފައިވާކަމުގައެވެ. ރައީސް މައުމޫނާއި ރައީސް މައުމޫނުގެ ޓީމަކީ އަބަދުވެސް ރައްޔިތުންނަށް ފައިދާހުރި ކަންކަން ރޭއްވެވި ބޭފުޅެއްކަމަށްވެސް ނާދިރާ ވިދާޅުވެފައިވެއެވެ.
މި ބިނާގެ ކްރެޑިޓް ނެގުމަށް އެހެން ފަރާތްތަކުންވެސް މަސައްކަތް ކޮށްފައިވެއެވެ. އެގޮތުން، މި ސަރުކާރުގައި ނައިބު ރައީސްކަމާއި ޓޫރިޒަމް މިނިސްޓަރުކަން ކުރައްވާފައިވާ އަޙުމަދު އަދީބުވެސް، މި މަސައްކަތުގެ ކްރެޑިޓް ނެގުމަށް މަސައްކަތްކޮށްފައިވެއެވެ.
ހުޅުލެއާއި މާލެއާ ދެމެދު ބްރިޖެއް އެޅުމަކީ ރައީސް ޔާމީނުގެ ރިޔާސީ ވައުދުފުޅެކެވެ. އެމަނިކުފާނުގެ ވެރިކަމުގައި، ޗައިނާގެ ބޮޑު މަދަދަކާއެކު މި ބްރިޖުގެ ހުވަފެނުގައި ކުލަ ޖައްސައިދީފައިވާއިރު، މިއީ ރާއްޖޭގެ ތަރައްޤީގެ ނިޝާންކަމުގައި ވެގެންދާނެއެވެ. ހަމައެހެންމެ، ރާއްޖެއަކީ، އުމްރާނީ ތަރައްޤީގެ ބިޔަ މަޝްރޫޢުތަކާއި އިންވެސްޓްމަންޓްތައް ހިންގޭނެ ތަނެއްކަން، މިކަމުން ކިތަންމެ ރަނގަޅަކަށްވެސް ހާމަވެގެން ދާނެއެވެ.