ސަރުކާރު ހިންގާ ޕީޕީއެމްއާއެކު ޖުމްހޫރީ ޕާޓީން ހަދާފައިވާ ކޯލިޝަން ރޫޅާލައިފަވާ ކަމަށް ޕީޕީއެމުން ބުނި ދުވަހުން ފެށިގެން މި ސަރުކާރުގެ ގާނޫނީ ހައިސިއްޔަތެއް ނެތް ކަމަށް ޖުމްހޫރީ ޕާޓީގެ ލީޑަރު އޮނަރަބަލް ގާސިމް އިބްރާހިމް ވިދާޅުވެއްޖެ އެވެ.
މ. ކުނޫޒުގައި މިއަދު ބޭއްވި ބައްދަލުވުމުގައި ވާހަކަފުޅު ދައްކަވަމުން ގާސިމް އިބްރާހިމް ވިދާޅުވީ ޖޭޕީއާއެކު ޕީޕީއެމް އިން ހަދާފައިވާ ކޯލިޝަންގެ އެއްބަސްވުން ރޫޅާލިކަމަށް ޕީޕީއެމުން ބުނި ދުވަހުން ފެށިގެން މި ސަރުކާރުގެ ގާނޫނީ ހައިސިއްޔަތެއް ނެތް ކަމަށެވެ. އަދި ވިދާޅުވީ ރައީސް ޔާމީން ވެރިކަމަށް ގެނައުމުގައި ޖޭޕީން ބުރަ މަސައްކަތްތަކެއް ކޮށްފައިވާނެ ކަމަށާއި ޕީޕީއެމްއާއެކު ހެދި އެއްބަސްވުމަކީ ފަސް އަހަރު ވުމުގެ ކުރިން ބާތިލް ނުކުރެވޭނެ ގޮތަށް ހަދާފައިވާ އެއްބަސްވުމެއް ކަމަށެވެ.
އެމަނިކުފާނު ވިދާޅުވީ ގާނޫނީ އަސާސީގެ ހިމާޔަތުގައި ކުރިންވެސް މަަސައްކަތް ކޮށްފައިވާނެ ކަމަށާއި ހަމައެގޮތަށް މިހާރުވެސް ގާނޫނު އަސާސީގެ ހިމާޔަތުގައި ކޮންމެ ކަމެއްވެސް ކުރަން ޖެހިލުން ނުވާ ކަމަށެވެ. އެމަނިކުފާނު ވިދާޅުވީ މިހާރު ފެނިގެން މިދަނީ އެކެއްގެ އަތްމައްޗަށް ވެރިކަމުގެ ބާރުތައް ނަގަމުންދާ މަންޒަރު ކަމަށެވެ
ގާސިމް ވިދާޅުވީ މިހާރު ފެނިގެން ދަނީ ސަރުކާރު ޒިންމާދާރު ކުރަން ހުރި މުއައްސަސާތަކުންވެސް އެއްވެސް ބަހެއް ނުކިޔާ ސަރުކާރުން ބުނިހާ ގޮތެއް ހަދައިގެން ތިބޭ ދަރަޖައަށް ގޮސްފައިވާ މަންޒަރު ކަމަށާއި އެއީ އެއްގޮތަކަށްވެސް ބަލައިގަނެވޭނެ ކަމެއް ނޫން ކަމަށެވެ. އަދި ވިދާޅުވީ މުއައްސަސާތަކާއި ރައްޔިތުންގެ މަޖިލީހަށް މެމްބަރުންނަށް ޒިންމާތަކެއް ހަވާލުކުރައްވާފައިވަނީ ރައްޔިތުންގެ ހައްގުތަކުގައި މަސައްކަތް ކުރުމަށް ކަމަށާއި އެގޮތަށް މަސައްކަތްތައް ކުރިއަށް ގެންދަން ޖެހޭނެ ކަމަށެވެ.
ގާނޫނޫ އަސާސީގެ ހިމާޔަތުގައި ކަމަށް ބުނެ ޖޭޕީން އުޅެނީ ވެރިކަމުގެ ބޭނުމުގައި މަގު މައްޗަށް ނިކުންނަން ކަމަށް ޕީޕީއެމްގެ ނައިބް ލީޑަރު އަބްދުއްރަހީމް އަބްދުﷲ ވިދާޅުވެފައިވާތީ އެކަމަށް ރައްދު ދެއްވާ ގާސިމް ވިދާޅުވީ ޖޭޕީން މަގު މައްޗަށް ނިކުތުމުގެ އެއްވެސް ވިސްނުމެއް ނުގެންގުޅުއްވާ ކަމަށާއި އެހެންނަމަވެސް އެހިސާބަށް ކަންތައްތައް ގޮސްފިނަމަ އެކަންވެސް ކުރައްވާނެ ކަމަށެވެ.
"ހައްގުތައް ހޯދަން މަސައްކަތް ނުކޮށްފިއްޔާ ދާނީ އޮޔާ، ދެން ލައްގާނީ އެހެންތަނަކަށް. ޖޭޕީން ނެގި ސްޓޭންޑްގެ ސަބަބުން އަކި ފަރާތްތަކުގެ އުނދަގޫތައް އަންނާނެ. އަދި މިހާރުވެސް އަންނަމުން ދަނީ. އެހެން ނަމަވެސް ރައްޔިތުންގެ ހައްގުތަށް ހޯދައިދިނުމުގައި ފަހަތަކަށް ނުޖެހޭނަން،" ގާސިމް ވިދާޅުވި އެވެ.
އެމަނިކުފަނު ވިދާޅުވީ ސަރުކާރުގެ ސިޔާސީ މަގާމުތައް ހާހަކާ މިހާރު ކައިރި ކުރާނެ ކަަމަށް ލަފާ ކުރެއްވޭ ކަމަށާއި ވަކި ޕާޓީއެއްގެ ބަޔަކަށް ނޫނީ ވަޒީފާ ނުދިނުމުގެ ވިސްނުން ސަރުކާރުން ގެންގުޅޭ ކަމަށެވެ. އެހެން ކަންތައް ކުރުމަކީ ވަރަށް ނިކަމެތި ކަމަށާއި އަދި ޖޭޕީން ވެރިކަން ކުރާ ނަމަ ވަކި ޕާޓީއަކަށް ބަލައިގެން ވަޒީފާތައް ނުދޭނެ ކަމުގައިވެސް ވިދާޅުވި އެވެ.
ކުރީގެ ޑިފެންސް މިނިސްޓަރު މުހައްމަދު ނާޒިމުގެ ގެއަށް ދަންވަރުގެ ވަގުތުގައި ފުލުހުން ވަތް މައްސަލައަށް އިޝާރާތް ކުރައްވާ ގާސިމް އިބްރާހިމް ވިދާޅުވީ އެއީ ވަރަށް ދަށު ދަރަަޖައިގެ އަމަލެއް ކަމަށާއި ދަންވަރުގެ ވަގުތުގައި ގޭގެ ދޮރުފަޅާލާފައި ވަނުމަށް ވުރެއް ރީތި ގޮތްތައް އެބަހުރި ކަމަށެވެ.