ކުރިއަށް އޮތް ފަސް އަހަރުގެ މައިގަނޑު އަމާޒަކީ މަސްތުވާތަކެއްޗާ ހަނގުރާމަކޮށް، އެ މައްސަލަތައް ހައްލުކުރުން ކަމަށް ރައީސް އަބްދުﷲ ޔާމީންގެ ސަރުކާރުގެ ހޯމް މިނިސްޓަރުކަމަށް އިއްޔެ އައްޔަންކުރެއްވި އުމަރު ނަސީރު މިއަދު ވިދާޅުވެއްޖެ އެވެ.
"ހަވީރާ" ވާހަކަ ދައްކަވަމުން އުމަރު ވިދާޅުވީ ހުރިހާ ކުށްތަކެއްގެ އަސްލަކީ މަސްތުވާތަކެތި ކަމަށް ގަބޫލުކުރައްވާ ކަމަށާއި އެހެންވެ އެންމެ އިސްކަން ދެއްވަނީ އެކަންކަން ހުއްޓުވުމަށް ކަމަށެވެ.
"ރާއްޖެ އަށް މަސްތުވާތަކެތި އެތެރެކުރުމާއި ފުޅާ ދާއިރާއެއްގައި އެ ތަކެތި ޑިސްޓްރިބިއުޓް ކުރުމާއި މަސްތުވާތަކެތި މަގުމަތީގައި ވިއްކާ މީހުންނާއި ބޭނުންކުރާ މީހުންނަށް އަޅުގަނޑު ވަރަށް ބޮޑަށް އެޑްރެސް ކުރާނަން. ސަބަބަކީ މި މުޖުތަމައުގައި މިހިރަ ފެންނަ ހުރިހާ ކުށްތަކުގެ އަސްލަކީ ޑްރަގް ކަމަށްވުން. މިކަން ހަމަޔަކަށް އަޅުވައިގެން ނޫން ގޮތަކަށް ނެތް ހަމަޖެހުމެއް ނެތް،" ހޯމް މިނިސްޓަރު ވިދާޅުވި އެވެ.
މިނިސްޓަރު ވިދާޅުވި ގޮތުގައި މަސްތުވާތަކެތީގެ މައްސަލަތައް ހައްލުކުރުމަށްޓަކައި ވަކި ޕްލޭނެއް ތައްޔާރުކޮށް ކަންކަން ހާސިލްކުރުމަށް މަސައްކަތް ކުރައްވާނެ އެވެ.
ހޯމް މިނިސްޓްރީގެ ދާއިރާގައި މިހާރު ހުރި އެންމެ ބޮޑު މައްސަލަ އަކީ ކޮބައިތޯ ދެންނެވުމުން އުމަރު ވިދާޅުވީ މި ވަގުތު އޭނާ އުޅުއްވަނީ ތިން ހަފުތާގެ އޮރިއެންޓޭޝަނެއްގައި ކަމަށެވެ. އަދި މިނިސްޓްރީގެ ދަށުގައި ހުރި ސެކްޓާތަކާ ބައްދަލުކޮށް، ހުރި މައްސަލަތައް ދެނެގަނެ ހައްލުކުރައްވަން މަސައްކަތްކުރައްވާނެ ކަމަށް އުމަރު ވިދާޅުވި އެވެ.