ގއ. ވިލިނގިލީގެ ކަރަންޓުގެ މައްސަލައަށް ހައްލު ހޯދުމަށް މަސައްކަތް ކުރަމުންގެންދާ ކަމަށް ފެނަކަ ކޯޕަރޭޝަނުން ބުނެފިއެވެ.
ފެނަކަ ކޯޕަރޭޝަނުން މިރޭ ބުނީ ގއ. ވިލިނގިއްޔަށް ކަރަންޓު ދެމުން އައި 800 ކިލޯވޯޓުގެ އިންޖީނަށް ކުއްލިގޮތަކަށް ލިބުނު ގެއްލުމުގެ ސަބަބުން އެރަށުގެ ބޮޑުބައެއްގައި ކަރަންޓު ނެތުމަކީ އެ ކުންފުނިން ހިތާމަ ކުރާ ކަމެއް ކަމަށެވެ. އަދި ކަރަންޓުގެ މައްސަލަ ހައްލުކޮށް މުޅި ރަށަށް ކަރަންޓު ދިނުމަށް ކުރަންޖެހޭ މަސައްކަތް ކުރަމުން ދާނެ ކަމުގެ ޔަގީންކަން ވިލިނގިލީގެ ރައްޔިތުނަށް ދޭކަމަށް ފެނަކަ ކޯޕަރޭޝަނުން ބުނެފައިވެއެވެ. ވިލިނގިލީ ރައްޔިތުންގެ ފަރާތުން ކެތްތެރިކަމާއެކީ ކުންފުންޏަށް އެއްބާރުލުން ދިނުމަށް އެދޭކަމަށްވެސް ފެނަކަ ކޯޕަރޭޝަނުން ބުނެފައިވެއެވެ.
ވިލިނގިލީ ކައުންސިލްގެ މެންބަރު ހަބީބު ހަސަން "ވަން އޮންލައިން" އަށް މައުލޫމާތު ދެއްވަމުން ވިދާޅުވީ އިންޖީނަށް މައްސަލަ ދިމާވެ، ރަށުން ކަރަންޓު ދިޔައީ މިއަދު ހަވީރު ކަމަށާއި، އޭގެފަހުން އަނެއް އިންޖީނު ބޭނުންކޮށްގެން ބައިގަޑިން ބައިގަޑިން ކަރަންޓު ދެމުން ގެންގޮސްފައިވާ ކަމަށެވެ. މިހާރު ރަށުގެ މަގުތަކުގައާއި ބަނދަރު ސަރަހައްދުގައި ދިއްލާފައި ހުރި ބައްތިތައް ނިއްވާލައި، ރަށަށް ކަރަންޓުދީފައިވާ ކަމަށް އޭނާ ވިދާޅުވިއެވެ. އަދި މިދުވަސްވަރު ރަށުގެ ރައްޔިތުން ކަރަންޓުގެ ބޭނުން ކުރާއިރު، ކަރަންޓުގެ ލޯޑުބޮޑުނުވާނެ ފަދަގޮތަކަށް ކަރަންޓުގެ ބޭނުން ކުރުމަށް އެދޭކަމަށް އޭނާ ވިދާޅުވިއެވެ.
ހަބީބް ހަސަން ވިދާޅުވީ ރަށަށުގެ ކަރަންޓުގެ ހާލަތު ވަރަށް ދަށް ކަމަށާއި، ކަރަންޓުގެ މައްސަލަ ސަރުކާރުގެ ސަމާލުކަމަށް ގެނެސްފައިވާނެ ކަމަށެވެ.