ރޯދަ މަހު "ހަވީރު"ން ބާއްވާ ކުރުވާހަކަ ލިޔުމުގެ މުބާރާތ، "ފިނި ހަވީރު"ގެ ގަވާއިދަށް އިސްލާހެއް ގެނެސް، ވާހަކަ ފޮނުވުމުގެ މުއްދަތު މިއަދު އިތުރުކޮށްފި އެވެ.
އެއް ވަނަ އަށް ހޮވޭ ވާހަކަ ލިޔާ މީހަކަށް 10،000ރ. އާއި "ހަވީރު" ގައި ވާހަކަ ލިޔުމުގެ ފުރުސަތު ލިބޭ މި މުބާރާތަށް ވާހަކަ ފޮނުވުމުގެ މުއްދަތު މިހާރު ވަނީ މި މަހުގެ 15 ވަނަ ދުވަހާ ހަމައަށް އިތުރުކޮށްފަ އެވެ. ކުރިން އޮތީ 10ގެ ކުރިން ވާހަކަ ފޮނުވަންޖެހޭ ގޮތަށެވެ.
ވާހަކަ ފޮނުވުމުގެ މުއްދަތު އިތުރުކޮށްފައި މި ވަނީ ވާހަކަތަކަށް މާކްސް ދިނުމުގައި ބަލާނެ ކަންކަމަށް ގެނައި އިސްލާހަކާ އެކުގަ އެވެ. ސޯޝަލް މީޑިއާގައި ވާހަކަ ޝެއާކުރާ މިންވަރަށް 50 ޕަސެންޓް މާކްސް ދިނުމަށް ކުރިން ހަމަޖައްސާފައި ވިޔަސް، ގިނަ ބައެއްގެ ހިޔާލާ އެކު މިހާރު ވަނީ އެ ޕަސެންޓޭޖް 30 އަށް ކުޑަކޮށްފަ އެވެ. މާކްސް ދިނުމުގައި ހުށަހަޅައިދިނުމަށް 20، ކޮންސެޕްޓަށް 20، ތަފާތު ކަމަށް 10 އަދި ޝައުގުވެރިކަން ހިފެހެއްޓުމަށް 20 ޕަސެންޓް މާކްސް ދޭނެ އެވެ.
މި މުބާރާތުގައި ބައިވެރިކުރާ ވާހަކަތަކަކީ މީގެ ކުރިން ޝާއިއު ކޮށްފައިވާ ވާހަކައަކަށް ވެގެން ނުވާނެ އެވެ. މި މުބާރާތުގައި ކޮންމެ މީހަކަށް ބައިވެރި ކުރެވޭނީ އެއް ވާހަކަ އެވެ. ފޮނުވާ ވާހަކަތަކުގައި 1000-1300 ބަހުގެ ދިގުމިން ހުންނަންޖެހޭނެ އެވެ. ވާހަކަ ފޮނުވާނީ މައިކްރޮސޮފްޓް އޮފީސް ވޯޑް ފޯމެޓްގަ އެވެ.