އިދިކޮޅު ފަރާތްތަކުން މިދިޔަ މަހުގެ 16 ގައި ބޭއްވި މުޒާހަރާގައި ހައްޔަރުކުރި، އެމްޑީޕީ ގައުމީ މަޖިލީހުގެ ކަނޑިތީމު ދާއިރާގެ ރައީސް އަބްދުﷲ ޝަހީމް ފުލުހުންގެ ބަންދުން މިއަދު ދޫކޮށްލައިފި އެވެ.
ކުއްލި ނުރައްކަލުގެ ހާލަތުގެ ދަށުން އެމްޑީޕީގެ ހަރުގެ ކައިރިން ހައްޔަރުކުރި ޝަހީމު ދޫކޮށްލާފައި ވަނީ އޭނާ އަށް ބޭސްފަރުވާގެ ހައްގު ނުލިބޭ ކަމަށް ބުނެ އެމްޑީޕީން ކަންބޮޑުވުން ފާޅުކޮށްފައި ވަނިކޮށެވެ.
އެ ޕާޓީން ބުނީ ޝަހީމް ހައްޔަރު ކުރުމުގެ ތެރޭގައި އޭނާގެ ކަކުލަށް އަނިޔާ ލިބިފައިވާ ކަމަށެވެ. އެއީ ކުރިން ވެސް ކަކުލުގެ މައްސަލަ ހުންނަ ބޭފުޅެއް ކަމަށާއި އެހެންވެ އޮޕަރޭޝަނެއް ކުރުމަށް ޑޮކްޓަރުން ވަނީ އޭނާ އަށް ލަފާ ދީފައި ކަމަށް ވެސް އެމްޑީޕީން ބުނެ އެވެ.
ޝަހީމްގެ އިތުރުން އެމްޑީޕީ ގައުމީ މަޖިލީހުގެ އެހެން މެމްބަރުންތަކަކާއި އެމްޑީޕީގެ ނައިބު ރައީސް މުހައްމަދު ޝިފާޒް ވެސް ފުލުހުން ވަނީ ހައްޔަރުކޮށްފަ އެވެ. އަދިވެސް އެމީހުން ތިބީ ދޫނިދޫގައި ހައްޔަރުކޮށްފަ އެވެ.