ކުުރީގެ ރައީސް އަބްދުﷲ ޔާމީންގެ މައްޗަށް ސާބިތުވެ ހުކުމް އިއްވައިފައިވާ އެމްއެމްޕީއާރުސީ ހިޔާނާތަކީ ހަގީގަތުގައިވެސް އެމަނިކުފާނު ކުރެއްވެވި ކަމެއްކަން ޔަގީން ކުރެވުަނު ނަމަވެސް، 2023 ވަނަ އަހަރުގެ އިންތިހާބު ކާމިޔާބު ކުރެވިއްޖެ ނަމަ އެމަނިކުފާނު ޖަލުން ސަލާމަތް ކުރައްވާނެ ކަމަށް ކުރީގެ ހޯމް މިނިސްޓަރ އުމަރު ނަސީރު ވިދާޅުވެއްޖެއެވެ.
"ވަގުތު" އަށް ދެއްވި ބަސްތީގަތުމެއްގައި އުމަރު ވިދާޅުވީ 2023 ވަނަ އަހަރު ވެރިކަމަށް ކުރިމަތިލެއްވުމަށް މަސައްކަތް ކުރަމުން ގެންދަވާ ކަމަށާއި، ވެރިކަން ލިބިއްޖެ ނަމަ ރައީސް ޔާމީން ޖަލުން ސަލާމަތް ކުރައްވާނެ ކަމަށެވެ. އުމަރު ވިދާޅުވީ އެއްވެސް ޒަމާނެއްގައި ރައީސްކަން ކުރައްވާފައ ހުންނަވާ ބޭފުޅަކު ޖަލަށް ލުމަކީ ރަނގަޅު ނިންމެވުމެއް ނޫން ކަމަށެވެ.
"އަޅުގަނޑަށް ވެރިކަން ކާމިޔާބު ކުރެވިއްޖެ ނަމަ ރައީސް ޔާމީން ޖަލުން ސަލާމަތް ކުރާނަން. އެއްވެސް ރައީސަކު ޖަލަށް ލުމަކީ އެއީ ރަނގަޅު ގޮތެއް ނޫން. ރައީސް ކަން ކުރައްވާފައިވާ ބޭފުޅުން ޖަލަށްލާ ވަރަށްވުރެ ގަދަރުވެރި ދެއްތޯ" އުމަރު ވިދާޅުވިއެވެ.
އުމަރު ވިދާޅުވީ ދައުލަތުން ރައީސް ޔާމީންގެ މައްޗަށް ތުހުމަތުކޮށް ހުށަހަޅައިފައިވާ ހެކިތައް އެތައް ބައިވަރު ހުރި ކަމަށާއި އެހެން ނަމަވެސް ރައީސް ޔާމީންގެ ވަކީލުންގެ ޓީމަކަށް އެއާ ވާދަކުރެވޭ ވަރަށް ހެކި ހުށަހެޅިފައި ނުވާކަމަށެވެ. އެހެން ކަމުން ހައިކޯޓުން އެމައްސަލަ އިސްތިއުނާފްކޮށް ނިމުމުގެ ކުރިން ރައީސް ޔާމީންގެ މައްޗަށް ކޮށްފައިވާ ހުކުމާއި މެދު ވަކި އެއްޗެއް ވިދާޅުވާން ބޭނުންފުޅު ނުވާކަމަށް އުމަރު ވިދާޅުވިއެވެ.
"ރައީސް ޔާމީންގެ ވަކީލުންގެ ޓީމަކުން ނެތް އެންމެ އެކަށީގެންވާ ވަރަށް އެމަނިކުފާނާ އެއްކޮޅަށް ހެކި ހުށަހަޅާފައެއް. އަޅުގަނޑު ބެލިން އެ ޝަރީއަތް އެއްކޮށް. އެކަމާއި ގުޅޭގޮތުން އަޅުގަނޑުގެ އޮޕީނިއަން އެއް ހާމަކުރަން އެނގޭނީ ހައިކޯޓުން އެމައްސަލަ އިސްތިއުނާފް ކޮށް ނިމުމުން" އުމަރު ވިދާޅުވިއެވެ.
މީގެ އިތުރުން އޭނާ ވިދާޅުވީ 2023 ވަނަ އަހަރު ވެރިކަމަށް ކުރިމަތި ލައްވާނީ ޕީޕީއެމް ކޮޅުން ކަމެއް އަދި ޔަގީންކުރަން ނޭންގޭ ކަމަށާއި، އެކަމަކު އެފަދަ ފުރުސަތެއް ލިބިއްޖެ ހާލަތެއްގައި އެކަން ގަބޫލުކުރައްވައި ޕީޕީއެމްގެ ފަރާތުން ވެރިކަަމަށް ކުރިމަތި ލައްވާނެ ކަަމަށެެވެ.