ޝަރުއީ ދާއިރާ އޮތީ އިދާރީ ގޮންޖެހުންތައް ހައްލުކުރަން ހާއްސަ މަސައްކަތެއް ކުރަންޖެހޭ ހިސާބުގައި ކަމަށް ބާކައުންސިލްގެ މެންބަރު އަހުމަދު މުއިއްޒު ވިދާޅުވެއްޖެއެވެ.
ރައްޔިތުންގެ މަޖިލީހުގެ ޖުޑިޝަރީ ކޮމިޓީގެ މިއަދުގެ ބައްދަލުވުމުގައި ކެންދޫ ދާއިރާގެ މެންބަރު މައުރޫފް ޒާކިރް ވަނީ ޝަރީއަތްތައް ދިގުލައިގެންދާ މައްސަލަތަކުގައި އާންމުންގެ ކަންބޮޑުވުން އޮތްކަން ފާހަގަކޮށް އެކަމާ ގުޅޭގޮތުން ސުވާލު ކޮށްފައެވެ.
އެ ސުވާލާ ގުޅިގެން ވާހަކަ ދައްކަވަމުން ބާކައުންސިލްގެ މެންބަރު މުއިއްޒު ވިދާޅުވީ މައްސަލަތައް ލަސްވުމުގެ މައްސަލައަކީ ވަރަށް ބޮޑު ވެފައިވާ މައްސަލައެއް ކަމަށެވެ. އެކަމަށް ހައްލެއް ގެނައުމަށް އަދުލު އިންސާފުގެ ދާއިރާ، ވަކީލުން އަދި ބަންޑާރަނައިބު މަޝްވަރާ ކުރަންޖެހޭ ވަރަށް ގުޅިގެން މަސައްކަތް ކުރެވޭ ކަމަށް ގަބޫލު ނުކުރާ ކަމަށެވެ. އަދި މިކަމުގައި އިތުރު މަސައްކަތްތަކެއް ކުރަންޖެހޭ ކަމަށް ވިދާޅުވިއެވެ.
ކްރިމިނަލް ކޯޓަށް ޖާގައިގެ ދަތިކަން ދިމާވެފައިއޮތްތާ ވަރަށް ދުވަސްތަ ވެފައިވާކަން ފާހަގަކޮށް މުއިއްޒު ވިދާޅުވީ އެކޯޓަށް ވަގުތީ ޖާގައެއް ލިބި މައްސަލަތައް ރަނގަޅަށް ހިނގަންފެށީ ވަރަށް ފަހުން ކަމަށެވެ. މީގެއިތުރުން ސިވިލް ކޯޓުގައި ފަނޑިޔާރުން ތިއްބެވިއިރު ވަކީލުން، ޚަސްމުން އަދި އާންމުން އެދޭ މިންވަރަށް މައްސަލަތައް ކުރިއަށް ނުދާކަން ފާހަގަކުރެވޭ ކަމަށެވެ. އެކަމުގައި ތަފާތު ސަބަބުތައް ހުރިކަން ފާހަގަކޮށް މުއިއްޒު ވިދާޅުވީ އިޖުރާއަތުގެ ޤާނޫނަށް އަމަލުކުރަން ފެށުނީ ވަރަށް ފަހުން ކަމަށާއި އަދި އެ ގާނޫނަކީ އެއާއެކު "ހިނގައިގަންނަން އެހާ ފަސޭހަ" ގާނޫނަކަށް ނުވާ ކަމަށެވެ. އަދި ވަރަށް ގިނަ ގޮންޖެހުންތައް އެބަހުރި ކަމަށާއި ވަސީލަތްތައް ބޭނުންވާ ކަމަށް ވިދާޅުވިއެވެ.
"އަޅުގަނޑަށް ހީވަނީ ބަންޑާރަނައިބާ، އަދުލުއިންސާފު ގާއިމުކުރާ ދާއިރާއާ، ވަކީލުންނާ ބައިވެރިވެގެން އިދާރީގޮތުން މިހުރި ގޮންޖެހުންތައް ހައްލުކުރުމަށް ހާއްސަ މަސައްކަތްތަކެއް ކުރަންޖެހޭ ހިސާބުގައިހެން ރާއްޖޭގެ އަދުލުއިންސާފު ގާއިމު ކުރުމުގެ ހާލަތު މިއޮތީ." މުއިއްޒު ވިދާޅުވިއެވެ.
މީގެއިތުރުން މިސުވާލާ ގުޅިގެން ބާކައުންސިލްގެ ރައީސް ހުސައިން ސިރާޖު ވިދާޅުވީ މައްސަލަތައް ލަސްވުމަކީ ވަރަށް ބޮޑު މައްސަލައެއް ކަމަށެވެ. އަދި އެކަން އެގޮތަށް ދިމާވަނީ މައްސަލަތަކުގެ އަދަދު ގިނަވުން ކަމަށް ފާހަގަ ކުރެއްވިއެވެ.