ދުނިޔޭގެ ޤައުމުތަކަށް ބަލާށެވެ! ކޮންމެ ދުވަހަކު އެއްވެސް ކުށެއް ނެތި އެތައް ސަތޭކަބައަކު ނުމަރާ ޤައުމެއް މަދެވެ. ދެމީހެއްގެ މެދުގައި ޚިޔާލުތަފާތުވެ ދެބަސްވާންޖެހުނަސް އަނެކާއަށް ހަމަލާދީ މަރާލަން ޖެހިލުމެއް ނުވެއެވެ. އިންސާނުންގެ ފުރާނައަކީ އެއްވެސް އަގެއް ނެތް އެއްޗަކަށް މިވަނީ ހަދައިފައެވެ.  
މުސްލިމަކު އޭނާގެ ދިފާޢުގައި ކުރާކަމަކުން ނަމަވެސް މީހަކު މަރުވެއްޖެނަމަ އެކަމަކީ ވަރަށް ބޮޑު ކަމަކަށް ހަދައެވެ. ދުނިޔޭގެ ހުރިހާ މުސްލިމުން ކުށްވެރިކުރެއެވެ. އެކަމަކު އެހެން ދީނެއްގެ ބައަކު ކިތަންމެ ބޮޑު ޤަތުލްޢާންމެއް ހިންގިނަމަވެސް އެއީ އެއްވެސް ކަމަކަށް ނުވެއެވެ.  
މުޝަރިކުންގެ ޒަމާނުގައިވެސް އެއް ޤަބީލާގެ ބައަކު އަނެއް ޤަބީލާގެ މީހަކަށް އަނިޔާކޮށް ގެއްލުންދީފިނަމަ ދިފާޢުގައި އޭނާގެ ޤަބީލާގެ މީހުން ނުކުމެއެވެ. އެހެންވެ ކޮންމެވެސް ވަރަކަށް ޖެހިލުންވެސްވެއެވެ. ނަމަވެސް މުސްލިމުންގެ މިއަދު ޙާލަތަށް ބަލައިފިނަމަ އެފަދަވެސް ނެތެވެ. އަނިޔާ ލިބޭ މީހުންގެ ދިފާޢުގައި ކަމެއް ކުރާނެ މީހަކު ނުވަތަ ބައަކު ނެތެވެ.  
މުސްލިމުންގެ މިޘާލަކީ އެއްހަށިގަނޑުގެ މިޘާލުކަމަށާއި ގުނަވަނެއްގައި ވޭން އަޅާނަމަ އެކަމުގެ އަސަރު ހުރިހާ ގުނަވަންތަކަށް ކުރާނެ ކަމަށް އޮންނަ ޙަދީޘްބަސްފުޅު ހަނދާން ނައްތާލައިފިއެވެ. އެއީ ހަމައެކަނި ދައްކާ ވާހަކައަކަށް ހަދައިފިއެވެ.  
ފެންނަމުން މިދަނީ ހަމަ ފަހުޒަމާނުގެ ޢަލާމާތްތަކެވެ. ބިރުވެތިވާށެވެ. ތިމާސަލާމަތްކަން ހޯދަން ކޮންމެ މީހަކުވެސް ގަދައަޅައި މަސައްކަތްކުރާށެވެ!  
ގުޅުންހުރި ލިޔުމެއް!:  
އިންސާނުންގެ ފުރާނައަކީ އެއްވެސް އަގެއް ނެތް އެއްޗަކަށްވެ އެއްވެސް ކުށެއް ނެތި މީހުން މަރައި ޤަތުލްޢާންމުތައް ހިންގަމުން ގެންދާނެ ކަމާއި އެއީ ފަހުޒަމާނުގެ ޢަލާމާތެއްކަން އޮތީ އެނގޭށެވެ! އަހަރެމެންނަށް ކުރެވެން އޮތް ކަމަކީ މިފަދަ ކަންކަމަށް ވިސްނައި އަމިއްލަ ނަފްސް އިޞްލާޙްކުރަން މަސައްކަތްކުރުމެވެ. އެބާވަތުގެ ނުބައި ކަންކަމުން އަމިއްލަ ނަފްސް ސަލާމަތްކުރަން މަސައްކަތްކުރުމެވެ.  
ދުނިޔެއަށް އެއިރު މަޝްހޫރުވެގެންދިއަ ކުޑަކުޑަ ޙާދިސާއެއްގެ ވާހަކަ ކިޔައިދޭނަމެވެ. މިއީ ސޯމާލިއާގެ މަންމައެއްގެ ވާހަކަތަކެވެ. މިއީ މުސްލިމް އެތައް ޤައުމެއްގެ މިއަދުގެ ޙާލަތެވެ! ކޮންމެ ދުވަހަކީ މިފަދަ އެތައް ޙާދިސާތަކެއް ހިނގަމުންދާ ދުވަހެކެވެ. އެތައް ބައަކު މަރުވަމުންދާ ދުވަހެކެވެ. އެތައް ބައަކު ގެއްލި، ވިއްސި ވިހާލވަމުންދާ ދުވަހެކެވެ!   
"ޓެރަރިސްޓުން ހަމަލާދޭން ފެށުމުން ސަލާމަތްވުމަށް ގެއިން ނުކުތީ 6 ދަރިން ގޮވައިގެންނެވެ. އެއިރުވެސް ވަށައިގެން ހަމަލާތައް އާދެއެވެ. ދެދަރިންނަކީ ދުވެވޭވަރުގެ ދަރިންނެއް ނޫނެވެ. އަނެއްބައި ބަރިން ގެންގުޅެން ޖެހުނީ އަތުގައި ހިފައިގެންނެވެ.  
ފަސް އެނބުރި ބަލައިލާނެ ފުރުޞަތެއް ނުލިބެއެވެ. އެޙާލުގައި ދުވަމުން ދަނިކޮށް ހޭނެތިގެން ވެއްޓުނީއެވެ. ހޭއަރައިގެން ވިސްނައިލެވުނުއިރު ބަޑިޖަހާ އަޑެއް ނުއިވެއެވެ. ކައިރީގައި ތިބީ އުރައިގެން ގެންގުޅުނު ދެކުދިންނެވެ. ހޯދަހޯދައިވެސް އަނެއް 4 ކުދިންނެއް ނުފެނުނެވެ. އެމީހުން އަތުލައިގަނެގެން ގެންދިއައީ ނޫންކަމެއްވެސް ނުއެނގެއެވެ. ނޫނީ ފިލަން ދުވަމުން ގޮސް ބައަކާއިއެކު ދެވުނީ ނޫން ކަމެއް ވެސް ނުއެނގެއެވެ. މިހާރު 6 މަސް ފާއިތުވީއެވެ. އަދި އެއިން ކުއްޖެއްގެ އެއްވެސް ޚަބަރެއް ނުވެއެވެ!"  
މިއީ މީގެ 4 އަހަރުކުރީގެ ޙާދިސާއެކެވެ. ހަމަ މިއަދުވެސް ހިނގަމުންދާ ކަންކަމެވެ. އެއް ބައަކު ފައުޅުގައި ހަނގުރާމަތައްކޮށް ގިނަބައަކު މަރަމުން ގެންދަނީއެވެ. އަނެއްބައަކު ރޭގަނޑު މީހުން ނިދުމުން ފަޤީރުންގެ އަވަށްތަކަށް އަރައިގަނެ ޤަތުލު ޢާންމުތައް ހިންގައި އެތައް ބައަކު މަރަމުން ގެންދަނީއެވެ.  
ހަތިޔާރު ނުގެންގުޅޭ މީހަކު ނެތެވެ. ކުޑަކުދިންވެސް ގެންގުޅެނީއެވެ. ކުޑަކުދިން ހަތިޔާރު ހިފައިގެންގޮސް ސްކޫލްތަކުގައި ކުޑަކުދިންތަކަށް ޙަމަލާދީ މަރަމުން ގެންދަނީއެވެ. މީހުން މެރުން މިވަނީ މިހައި ޢާންމުކަމަކަށްވެފައެވެ. އެއްވެސް ބިރެއްނެތި ކުރާ ކަމަކަށްވެފައެވެ.  
މިކަންކަމުން އެނގިގެންމިދަނީ ދުނިޔެ ނިމެން ދާދިގާތްވެއްޖެކަމެވެ. ޤިޔާމަތްވުން ދާދިގާތްވެއްޖެކަމެވެ. އަހަރެމެން އެންމެން އެކަމަށް މަސައްކަތްކުރިނަމަވެސް ދުނިޔެ ނިމުމެއް ނުހުއްޓުވޭނެއެވެ. ނަމަވެސް ބިރުވެތިވެ ތިމާއަކީ ހެޔޮލަފާ މީހަކަށްވެވިދާނެއެވެ. ﷲ ތަޢާލާއަށް ބިރުވެތިވާ އަޅެއްގެ ގޮތުގައި މަރުވާން މަސައްކަތްކުރެވިދާނެއެވެ.
މިހުރިހާ ވާހަކަތަކެއް ދެއްކުމުގެ ބޭނުން ދެންމެ މިބުނީއެވެ. އީމާންކަން ވަރުގަދަކުރަން ގަދައަޅައި މަސައްކަތްކުރާށެވެ. ހެޔޮލަފާ އަޅެއްގެ ގޮތުގައި މަރުވާން ގަދައަޅައި މަސައްކަތްކުރާށެވެ. އާޚިރަތް ދުވަހަށް ބިރުވެތިވުމަކީ އެއީއެވެ.   
ތަކުރާރުކޮށްލާނަމެވެ. ފަހު ޒަމާނުގެ ޢަލާމާތްތަކުގެތެރެއިން މީހުން މެރުމަކީ ޖެހިލުމެއް ނެތިކުރާ ޢާންމުކަމަކަށްވުން މިއަދު މިވަނީ ދުނިޔެއަށް ޢާންމުވެފައެވެ. ސަލާމަތްކަން ލިބޭނީ ﷲ ތަޢާލާގެ ޙަޟްރަތުން ރައްކައުތެރިކަން ލިބިގަންނަން މަސައްކަތްކުރި މީހަކަށެވެ.  
- އިސްލާމީ ތިލަފަތުގެ ދަރުސަކުން