މިއަދު ހަވީރު ހުޅުލޭގައި ކާރަކާއި ސާއިކަލެއް ޖެހި ހިނގި އެކްސިޑެންޓްގައި މީހަކަށް އަނިޔާވެއްޖެއެވެ.
ފުލުހުން ބުނީ، މި އެކްސިޑެންޓް ހިނގި ކަމުގެ ރިޕޯޓް ލިބިފައި ވަނީ މިއަދު ހަވީރު 4:20 ހާއިރު ކަމަށެވެ. ވެލާނާ އިންޓަނޭޝަނަލް އެއާޕޯޓްގެ ޕޭ ޕާކިން ސަަރަހައްދުން ނިކުތް ސައިކަލެއް ވަނީ އެއާޕޯޓުން ނިކުންނަން ދިޔަ ކާރެއްގައި ޖެހިފައި ކަމަށް ފުލުހުން ބުނެއެވެ.
މި އެކްސިޑެންޓްގައި އަނިޔާ ވެފައި ވަނީ ސައިކަލު ދުއްވަން އިން މީހާއަށެވެ. އެމީހާއަށް ފަރުވާ ދިނުމަށް ވަނީ ހޮސްޕިޓަލަށް ގެންގޮސްފައި ކަމަށް ފުލުހުން ބުނެއެވެ. އެމީހާއަށް ލިބުނު އަނިޔާތަކުގެ ތަފްސީލެއް ފުލުހުން ހާމައެއް ނުކުރެއެވެ.
މި އެކްސިޑެންޓްގެ ހާދިސާ ފުލުހުން ދަނީ ތަހުގީގު ކުރަމުންނެވެ.